অসমৰ অগ্ৰণী স্বেচ্ছাসেৱী সংস্থা প্ৰাগ্জ্যোতি কমিউনিকেশ্যনচ আৰু মৰিগাঁও জিলা প্ৰশাসনৰ যুটীয়া উদ্যোগত ৫ জুন তাৰিখে মৰিগাঁও জিলাৰ ঝাৰগাঁৱত থকা মোহন বাঁশী দাস কনিষ্ঠ মহাবিদ্যালয়ত চলিত বৰ্ষৰ বিশ্ব পৰিৱেশ দিৱস অতি উলহ-মালহেৰে পালন কৰা হয়। ২০১১ চনৰ পৰাই এই দিৱস পালন কৰি অহা সংস্থাটোৱে এইবাৰো দিনজোৰা কাৰ্যসূচীৰে ছাত্ৰ-ছাত্ৰী আৰু ৰাইজৰ মাজত পৰিৱেশ সজাগতা সৃষ্টিৰ প্ৰয়াস কৰে। মহাবিদ্যালয়খনৰ অধ্যক্ষ বিপুল দাসে আদৰণী ভাষণ প্ৰদান কৰা এই সমগ্ৰ অনুষ্ঠানটো সুন্দৰকৈ পৰিচালনা কৰে জ্যেষ্ঠ সাংবাদিক নজৰুল ইছলামে।
ৰাতিপুৱা ৮ বজাত প্ৰাগ্জ্যোতিৰ অধ্যক্ষ দীপাঙ্ক হাজৰিকাই পৰিৱেশপ্ৰেমী জুবিন গাৰ্গৰ সোঁৱৰণত এটি নাহৰ গছৰ পুলি ৰোৱাৰ লগে লগে কাৰ্যসূচীৰ শুভাৰম্ভ হয়। ইয়াৰ পিছতে ছাত্ৰ-ছাত্ৰী, শিক্ষক-অভিভাৱক আৰু স্থানীয় ৰাইজৰ অংশগ্ৰহণেৰে এখন সজাগতামূলক সমদল উলিওৱা হয়। সমদলটো গৈ ঝাৰগাঁৱৰ কেন্দ্ৰীয় কৃষিবিজ্ঞান কেন্দ্ৰত উপস্থিত হয়। তাত নেপক’ৰ বিষয়া অভিষেক কুমাৰ আৰু কেন্দ্ৰীয় ক’ক’নাড ব’ৰ্ডৰ বিষয়া ৰাজীৱ ভূষণ প্ৰসাদে ছাত্ৰ-ছাত্ৰীসকলক পৰিৱেশ ৰক্ষাৰ বাবে উৎসাহিত কৰে। কৃষিবিজ্ঞান কেন্দ্ৰৰ জ্যেষ্ঠ বিজ্ঞানী ডঃ ঋজুস্মিতা শৰ্মাৰ সহযোগত তাত কেইবাটাও বনৌষধি আৰু ফলৰ পুলি ৰোৱা হয়। ইয়াৰ পিছত মহাবিদ্যালয়ত ছাত্ৰ-ছাত্ৰীসকলৰ মাজত চিত্ৰাংকন, ৰচনা, আকস্মিক বক্তৃতা আৰু কুইজ প্ৰতিযোগিতা অনুষ্ঠিত হয়। কুইজ মাষ্টাৰ নৱজ্যোতি ভৰালীয়ে পৰিচালনা কৰা কুইজত ৪৫ টা দলে অংশ লয়। মৰিগাঁও জিলাৰ আয়ুক্ত অনামিকা তেৱাৰীয়েও অনুষ্ঠানত উপস্থিত থাকি সকলো প্ৰতিযোগীক উৎসাহ যোগায়।
দিনৰ দুই বজাৰ পৰা ছাত্ৰ-ছাত্ৰীসকলৰ লগত এক অন্তৰংগ আলাপ অনুষ্ঠান অনুষ্ঠিত হয়। ইয়াত কেইবাগৰাকীও বিশিষ্ট বিজ্ঞানী আৰু পৰিৱেশবিদে অংশ লয়। শিশু কল্যাণত ব্ৰতী ডঃ সংগীতা চৌধুৰীয়ে আৱৰ্জনা ব্যৱস্থাপনা, গুৱাহাটী বিশ্ববিদ্যালয়ৰ সহঃ অধ্যাপিকা ডঃ নৱনীতা ভট্টাচাৰ্য্যই গছ-গছনি আৰু পৰিৱেশ, বিজ্ঞানী ডঃ ৰিজৱান উজ জামানে বতৰ আৰু জলবায়ু পৰিৱৰ্তন আৰু বনাঞ্চলিক বিষয়া উজ্জ্বল চৌধুৰীয়ে পৰিৱেশ সংৰক্ষণৰ বিষয়ে অতি সহজ ভাষাত বুজাই দিয়ে। তেওঁলোকে দৃশ্য-শ্ৰব্য মাধ্যমৰ জৰিয়তেও ছাত্ৰ-ছাত্ৰীসকলক পৰিৱেশৰ কথা সুন্দৰকৈ উপস্থাপন কৰে।
এই সুন্দৰ অনুষ্ঠানতে পৰিৱেশ আৰু প্ৰকৃতিৰ ওপৰত আধাৰিত দ্বিভাষিক সংকলন ‘পবিতৰা’ৰ দশম সংখ্যাটো উন্মোচন কৰা হয়। এই সংকলনখনৰ মুখ্য সম্পাদক হৈছে দীপাঙ্ক হাজৰিকা আৰু সহযোগী সম্পাদক হৈছে কুশল দত্ত। গ্ৰন্থ উন্মোচনী অনুষ্ঠানত ৰেচম বিজ্ঞানী ডঃ মহানন্দ চুতীয়া, ইতিহাসবিদ লোকেন্দ্ৰ হাজৰিকা, প্ৰাগ্জ্যোতিৰ প্ৰতিষ্ঠাপক গীতাঞ্জলি বৰুৱাকে ধৰি কেইবাগৰাকীও বিশিষ্ট ব্যক্তি আৰু পৰিৱেশকৰ্মী উপস্থিত থাকে। অনুষ্ঠানৰ একেবাৰে শেষত গঁড়ৰ জীৱনৰ ওপৰত নিৰ্মাণ কৰা বিশিষ্ট চিত্ৰশিল্পী আৰু পৰিচালক জ্যোতিপ্ৰসাদ দাসৰ তথ্যচিত্ৰ ‘এ ছিলভান ছাগা’ প্ৰদৰ্শন কৰা হয়।
