১৯৪৭ চনৰ পৰা চিকিৎসক হিচাপে কাম কৰি অহা ডাঃ হাৱাৰ্ড টাকাৰে আজিও পেছাদাৰী জীৱনত সক্ৰিয় হৈ থকা পৃথিৱীৰ ‘আটাইতকৈ বয়সীয়াল’ চিকিৎসক। এই মাহটো তেওঁৰ জন্মদিন। জন্মদিনৰ পূৰ্বে তেওঁ নেচনেল জিঅ’গ্ৰাফিকক জনাইছিল দীৰ্ঘজীৱন আৰু এই জীৱন উপভোগ কৰাৰ ৰহস্য।
ডাঃ হাৱাৰ্ড টাকাৰে আগ্ৰহেৰে নতুন চাকৰি বিচাৰিছে। ১০২ বছৰ বয়সতো তেওঁৰ কৰ্মৰ প্ৰতি আগ্ৰহ দেখি আচৰিত লাগে। আগতে য’ত তেওঁ পঢ়ুৱাইছিল সেইখন প্ৰতিষ্ঠান ২০২২ চনত বন্ধ হৈ গ’ল। এতিয়া অৱশ্যে তেওঁ ৰোগীও নাচায়।
অৱশ্যে তেওঁৰ দীৰ্ঘদিনীয়া কেৰিয়াৰৰ কাহিনী অতি চমকপ্ৰদ। মেডিকেল স্কুলৰ পৰা স্নাতক হোৱাৰ পিছত ১৯৫৩ চনত তেওঁ নিউৰ’মেডিচিন বিশেষজ্ঞ হয়। দ্বিতীয় বিশ্বযুদ্ধৰ সময়ত তেওঁ আমেৰিকাৰ নৌসেনাত সেৱা আগবঢ়াইছিল। কোৰিয়া যুদ্ধত তেওঁ আটলাণ্টিক নৌবহৰৰ মুখ্য স্নায়ু বিশেষজ্ঞ আছিল।
চিকিৎসক আৰু তেওঁৰ অন্যান্য পৰিচয়
আমোদজনক কথাটো হ’ল তেওঁৰ কেৰিয়াৰ চিকিৎসা বিজ্ঞানৰ সৈতে শেষ হোৱা নাই। ১৯৮৯ চনত ৬৭ বছৰ বয়সত তেওঁ আইনৰ ডিগ্ৰীও লাভ কৰে। আমেৰিকাৰ অহাইঅ’ ৰাজ্যৰ বাৰ পৰীক্ষাতো তেওঁ উত্তীৰ্ণ হয়। কিন্তু আইনী পৰীক্ষাৰ বাবে তেওঁ চিকিৎসা সেৱা আগবঢ়োৱা বন্ধ নকৰিলে।
এই বিশেষজ্ঞ চিকিৎসকগৰাকীয়ে কৰ’না মহামাৰীৰ প্ৰাৰম্ভিক দিনতো ৰোগীক সেৱা আগবঢ়াইছিল। আনকি তেওঁ এতিয়াও শিক্ষকতা কৰিয়েই আছে। তেওঁ মাজে মাজে ক্লিভলেণ্ডৰ এখন বিশ্ববিদ্যালয়ত অধ্যাপনা কৰে। তাত চিকিৎসা আৰু আইনী দুয়োটা বিষয়ৰ ক্লাছ লয়। তেওঁ এতিয়াও চিকিৎসা বিজ্ঞানৰ আইনী দিশত পৰামৰ্শ দিয়ে।
তাৰকা হৈ উঠাৰ কাহিনী
হাৱাৰ্ড টাকাৰ টিকটক তাৰকাও। তেওঁৰ লাখ লাখ অনুগামী আছে। টিকটক একাউণ্ট খুলিছিল তেওঁৰ নাতি অষ্টিন আৰু তেওঁৰ বন্ধু টেইলৰ টাগ্লিয়ানেট্টীয়ে। ড° হাৱাৰ্ডৰ গৌৰৱময় জীৱন আৰু জীৱনৰ প্ৰতি থকা প্ৰবল উৎসাহক এই দুজন বন্ধুৱে আলোকপাত কৰি ‘ৱাটছ নেক্সট?’ নামৰ এখন তথ্যচিত্ৰও নিৰ্মাণ কৰিছে।
দীৰ্ঘজীৱনৰ ৰহস্য
দীৰ্ঘজীৱনৰ ৰহস্যৰ বিষয়ে সোধাত ডাঃ হাৱাৰ্ডে অহৰহ জ্ঞানৰ সন্ধান আৰু আনৰ সৈতে যোগাযোগত থকাৰ অভ্যাসকে কৃতিত্ব দিয়ে। তেওঁ কৰ্মৰ পৰা অৱসৰক দীৰ্ঘজীৱনৰ ‘শত্ৰু’ বুলি অভিহিত কৰে। এই বিষয়ত গৱেষণাৰ তথ্যৰ কথাও তেওঁ মানুহক সোঁৱৰাই দিয়ে। অতিৰিক্ত এবছৰ কাম কৰাৰ অৰ্থ হ’ল ডিমেনচিয়াৰ সম্ভাৱনা হ্ৰাস কৰা।
তেওঁ কয় যে কৰ্মক্ষেত্ৰত সিদ্ধান্ত লওঁতে আৰু সামাজিক পৰিৱেশত মানুহৰ সৈতে মত বিনিময় কৰাৰ সময়ত মগজু সক্ৰিয় আৰু কাৰ্যক্ষম হৈ থাকে। তেওঁ কয় যে মগজু যিমানেই ব্যৱহাৰ হ’ব সিমানেই সতেজ হ’ব।
আৰু ভাল অভ্যাসে যি কৰে
সুস্থ হৈ থাকিবলৈ, শৰীৰ আৰু মনক সক্ৰিয় কৰি ৰাখিবলৈ, ধূমপান নকৰিবলৈ, আৰু ঘৃণাত লিপ্ত নহ’বলৈ ডাঃ হাৱাৰ্ডে পৰামৰ্শ দিয়ে। খাদ্য বাছি লওঁতে স্বাস্থ্য সচেতন হ’ব লাগে। প্ৰচেছড খাদ্য, ভজা খাদ্য, মিঠাই আদি পৰিহাৰ কৰিব লাগে। গোটা শস্যৰ খাদ্য স্বাস্থ্যকৰ।
এই বিশেষজ্ঞ চিকিৎসকজনে ৰাতিপুৱা ৮৯ বছৰীয়া পত্নীৰ সৈতে বহি সতেজ ফল-মূল আৰু টোষ্ট খাই দিনটোৰ আৰম্ভণি কৰে। দুপৰীয়াও বেছিকৈ নাখায়। ৰাতি মাছ বা কুকুৰা মাংসৰ লগত শাক-পাচলি বা চালাড খায়। কেতিয়াবা কেতিয়াবা ৰাতি ষ্টেকও খায়। তেওঁ স্বীকাৰ কৰে যে এশ পাৰ হোৱাৰ পিছত তেওঁৰ আইচক্ৰীম আৰু ডোনাটৰ প্ৰতি অলপ আগ্ৰহ প্ৰৱল হৈ পৰিছে। অৱশ্যে সৰুতে এনে খাদ্য খুব কমেইহে খাইছিল।
কিন্তু ডাঃ হাৱাৰ্ডে কঠোৰ নিয়মৰ সৈতে কঠোৰ খাদ্যাভ্যাসত বিশ্বাস নকৰে। অৱশ্যে তেওঁ বিশ্বাস কৰে যে জীৱনত সংযমটো গুৰুত্বপূৰ্ণ। তেওঁ হয়তো আগৰ দৰে ক্লান্তিকৰ ব্যায়াম কৰিব নোৱাৰিব, কিন্তু মাজে মাজে যিকোনো ব্যায়াম কৰাটো গুৰুত্বপূৰ্ণ বুলি তেওঁ কয়।
এতিয়াও তেওঁ যিমান পাৰে নিয়ৰৰ মাজত সন্তানৰ সৈতে উপভোগ কৰে। পত্নীৰ সংগ তেওঁ বৰ ভাল পায়। তেওঁ কয় যে সুস্থ হৈ থাকিবলৈ বন্ধুত্বও গুৰুত্বপূৰ্ণ। আনকি সৰু বন্ধুসকলেও তেওঁক অনুপ্ৰাণিত কৰি ৰাখে।
এজন ব্যক্তিয়ে যি ধৰণৰ কাম কৰে সেয়াও সুস্থ হৈ থকাৰ বাবে গুৰুত্বপূৰ্ণ। তেওঁৰ পৰামৰ্শ হ’ল নিজৰ স্বাস্থ্যৰ বাবে ক্ষতিকাৰক চাকৰি এৰি নিজৰ লগত খাপ খোৱা নতুন চাকৰি এটা বিচাৰি উলিওৱাটো ভাল।
