যোৱা ১৫ জুনৰ পৰা গুৱাহাটীত ৰেণ্ডম টেষ্টিং আৰম্ভ হোৱাৰ পাছতে ভয়ংকৰ ৰূপত গণ সংক্ৰমণ হোৱাৰ কথা পোহৰলৈ আহিছে।
কিয়নো যোৱা ১৫ জুনৰ পৰা আজি পৰ্য্যন্ত প্ৰায় ১৪০০ লোক ক’ৰ’না পজিটিভ হিচাপে চিনাক্ত হৈছে।
ইপিনে, যোৱা নিশা গুৱাহাটীত প্ৰায় ১৭০ টা পজিটিভ কেচ পোৱা বুলি সংবাদ মাধ্যমৰ আগত জানিবলৈ দিয়ে স্বাস্থ্য মন্ত্ৰী ড০ হিমন্ত বিশ্ব শৰ্মাই।
ইয়াৰোপৰি, কোভিডত আক্ৰান্ত হৈ এসপ্তাহৰ ভিতৰত ৫০ বছৰৰ তলৰ দুগৰাকীকৈ লোক মৃত্যু মুখত পৰা বুলি তেওঁ উল্লেখ কৰে।
উল্লেখ কৰিব পাৰি যে, ৪৮ ঘন্টাৰ ভিতৰতে খানাপাৰাৰ হেমাংগ তালুকদাৰ(৪৫) আৰু ফটাশিল আমবাৰীৰ দিলীপ তালুকদাৰ কোভিড১৯ত আক্ৰান্ত হৈ মৃত্যু মুখত পৰা বুলি খবৰ আহিছিল।
ইপিনে, গুৱাহাটীৰ সমগ্ৰ পৰিৱেশ অলপমান চিন্তনীয় হৈ আছে বুলি মন্তব্য কৰি মন্ত্ৰী হিমন্তই লগতে কয়, ‘যদি ল’কডাউন ভালদৰে পালন কৰো, বিভিন্ন মনে সজা বাতৰি, প্ৰচাৰ অপ-প্ৰচাৰৰ পৰা দূৰত থাকি ১৪ দিন ল’কডাউন সুন্দৰকৈ পালন কৰিলে মহানগৰীখনক বচাব পাৰিম।‘
তদুপৰি, গুৱাহাটীবাসী ৰাইজৰ মনত সন্দেহ হ’লে ৱাৰ্ডত থকা কোভিড পৰীক্ষণ কেন্দ্ৰ অথবা ১২ খনকৈ কোভিড পৰীক্ষা কেন্দ্ৰ থকা চিকিৎসালয়ত স্বাৱ জমা দিবলৈ আহ্বান জনায় হিমন্তই।
ইপিনে, অহা ৩-৪ দিনৰ ভিতৰত গুৱাহাটীৰ ব্যক্তিগত খণ্ডৰ চিকিৎসালয়সমূহত কোভিড ৰোগীক চিকিৎসা কৰোৱাৰ ব্যৱস্থা কৰোৱা হ’ব বুলি তেওঁ সদৰী কৰে।
কাইলৈৰ পৰা খানাপাৰাৰ অস্থায়ী কোভিড হাস্পতালতো কৰ’না ৰোগীক চিকিৎসা সেৱা প্ৰদান কৰা হ’ব বুলি তেওঁ জানিবলৈ দি লগতে কয়, ‘গুৱাহাটীত এসপ্তাহৰ ভিতৰত ২০০০ বিচনাৰ সংখ্যা কৰাৰ লক্ষ্য লোৱা হৈছে।‘
এক সুত্ৰৰ পৰা জানিব পৰা মতে গুৱাহাটী মহানগৰীত মুঠ ৩৩৪ গৰাকী লোক যোৱা ৪৮ ঘন্টাৰ ভিতৰত আক্ৰান্ত হৈছে।
