পৰিৱৰ্তনৰ প্ৰতিশ্ৰুতিৰে শাসনলৈ অহা বিজেপি চৰকাৰৰ বিৰুদ্ধে ৰাজ্যত চৌদিশে প্ৰতিবাদৰ জোৱাৰ উঠাৰ মাজতে বুধবাৰে আবেলি ৩ মান বজাত শিৱসাগৰ জিলাৰ ফুলপানীছিগাত ৩৭ নং ৰাষ্ট্ৰীয় ঘাইপথৰ পুখুৰীসদৃশ গাঁতত পৰি দুৰ্ঘটনাত পতিত হৈছে পৰিবহণ নিগমৰ এখন বাছ।
ৰাজ্যত ১০৮ আৰু ১০২ জৰুৰী সেৱাৰ কৰ্মচাৰীসকল কৰ্মবিৰত হৈ থকাৰ অৱস্থাত সৌভাগ্যক্ৰমে দুৰ্ঘটনাটোত কোনো লোক হতাহত হোৱা নাই। কিছু পৰিমাণে আঘাত পোৱাসকলক গৌৰীসাগৰ আৰক্ষী আহি প্ৰাথমিক চিকিৎসাৰ ব্যৱস্থা কৰে।
ঘটনাৰ বিৱৰণীমতে ফুলপানীছিগাত ৰাষ্ট্ৰীয় ঘাইপথটোৰ ওপৰত থকা এটা বিধ্বস্ত পুলৰ গাঁতত সোমাই বাগৰি পৰা বাছখন পথৰ কাষৰ টেলিফোনৰ খুঁটা এটাত খুন্দা মাৰি ৰৈ যায়।
এএচ-২০-১৪০৫ নম্বৰৰ যাত্ৰীবাহী বাছখন অৰুণাচল প্ৰদেশৰ জয়ৰামপুৰৰ পৰা যোৰহাট দিশে আহি আছিল৷
ঘটনাথলী গৌৰীসাগৰ থানাৰ পৰা প্ৰায় ৮ কি.মি. দূৰত।