ৰাজকোটত শোচনীয়ভাৱে আত্মসমৰ্পণ কৰিছে বাজবল শৈলীয়ে। ভাৰতীয় বলিং আক্ৰমণৰ চমকৰ সমুখত, বিশেষকৈ ‘ৰাজকোটৰ ৰজা’ ৰবীন্দ্ৰ জাদেজাৰ তাণ্ডৱত বিধ্বস্ত ইংৰাজ বাহিনীয়ে ৪৩৪ ৰাণৰ বৃ্হৎ ব্যৱধানত পৰাজয় স্বীকাৰ কৰিছে।
যুৱ তাৰকা যশস্বী জয়ছোৱালৰ দুৰ্দান্ত দ্বিশতক আৰু শুভমন গিল, ছৰফৰাজ খানৰ অৰ্ধশতকীয় ইনিংছেৰে ভাৰতে ইংলেণ্ডৰ সমুখত বান্ধি দিছিল ৫৫৭ৰাণৰ বৃ্হৎ লক্ষ্য। পিছে এই লক্ষ্য অনুসৰণ কৰি ইংলেণ্ডে মাত্ৰ ১২২ ৰাণতে ইনিংছ সামৰিবলৈ বাধ্য হয়।
উল্লেখ্য যে, টছত জয়ী হৈ ভাৰতে প্ৰথমে বেটিং কৰি অধিনায়ক ৰোহিত শৰ্মা আৰু ৰবীন্দ্ৰ জাদেজাৰ শতক, ছৰফৰাজৰ অৰ্ধশতক আৰু ধ্ৰুৱ জুৰেল, অশ্বিন, বুমৰাহৰ গুৰুত্বপূৰ্ণ অৱদানৰ সহায়ত সংৰহ কৰিছিল ৪৪৫ ৰাণ।
আনহাতে ইংলেণ্ডে বেন ডাকেটৰ প্ৰায় অকলশৰীয়া প্ৰচেষ্টাৰেই ৩১৯ ৰাণ সংৰহ কৰিছিল প্ৰথম ইনিংছত। ভাৰতে প্ৰথম ইনিংছত ১২৬ ৰাণৰ অগ্ৰগতি লাভ কৰাৰ পিছত দ্বিতীয় ইনিংছত প্ৰদৰ্শন কৰে বেটিং বিক্ৰম। দিশহাৰা হৈ পৰে ইংৰাজ বলিং আক্ৰমণ।
বিশেষকৈ শৃংখলাটোত দ্বিতীয়টো দ্বিশতক সংৰহ কৰা জয়ছোৱাল ইংলেণ্ডৰ বাবে হৈ পৰে মূৰৰ কামোৰণি স্বৰূপ। কালি ১০৪ ৰাণৰ ব্যক্তিগত স্ক’ৰত ৰিটায়াৰ্ড হাৰ্ট হোৱা জয়ছোৱালে আজি গিলৰ বিদায়ৰ পিছত বেটিং কৰিবলৈ আহি বিস্ফোৰক ৰূপ ধাৰণ কৰে।
মাত্ৰ ২৩৬ টা বলত ১৪ টা চাৰি আৰু ১২ টা ছয়েৰে ২১৪ ৰাণৰ বিধ্বংসী ইনিংছেৰে অপৰাজিত হৈ ৰয়। তেওঁৰ লগতে ছৰফৰাজেও ৭২ টা বলত ৬ টা চাৰি আৰু ৩ টা ছয়েৰে ৬৮ ৰাণ কৰি অপৰাজিত থাকে। আনহাতে কালিৰ অপৰাজিত বেটাৰ গিলে ৯১ ৰাণ কৰি দুৰ্ভাগ্যৱশতঃ ৰাণ আউট হয়।
এনে বেটিং বিক্ৰমৰ সুবাদত ভাৰতে ৪ উইকেটত ৪৩০ ৰাণত ইনিংছ ঘোষণা কৰে আৰু ইংলেণ্ডৰ সমুখত ৫৫৭ ৰাণৰ লক্ষ্য বান্ধি দিয়ে। এই বৃ্হৎ লক্ষ্য আগত লৈ দ্বিতীয় ইনিংছ আৰম্ভ কৰা ইংলেণ্ডে সপ্তম অভাৰত প্ৰথমটো উজুটি খায়।
দলীয় স্ক’ৰ ১৫ত দলটোৰ হৈ প্ৰথম ইনিংছত বিস্ফোৰক ১৫৩ ৰাণৰ ইনিংছ খেলা ডাকেট ৰাণ আউট হয়। ইয়াৰ পিছতে খহনীয়াৰ সৃষ্টি হয় ইংলেণ্ডৰ বেটিং লাইন আপত। ভাৰতীয় বলাৰৰ সমুখত থৰকাছুটি হেৰুওৱা ইংলেণ্ডৰ মাত্ৰ ৫০ ৰাণতে ৭ টাকৈ উইকেটৰ পতন ঘটে।
অষ্টম উইকেটৰ যুটীত ফ’কছ্ আৰু হাৰ্টলীয়ে ৩২ ৰাণৰ যুটী বান্ধে যদিও জাদেজাই ফ’কছক বিদায় দি এই যুটী ভংগ কৰে। ইয়াৰ পাছতে অভিজ্ঞ স্পিনাৰ অশ্বিনে হাৰ্টলীক বিদায় দি জয় চমু চপায় আনে। উল্লেখ্য যে মেচৰ দ্বিতীয় দিনাই অশ্বিনে পাৰিবাৰিক স্বাস্থ্যজনিত সমস্যাৰ বাবে আধাতে দল এৰি দিছিল যদি আজি পুনৰ দলৰ হৈ খেলপথাৰত নামে।
শেষৰ ফালে টেইল এণ্ডাৰ বেটাৰ মাৰ্ক উডে মাত্ৰ ১৫ টা ৬ টা চাৰি আৰু ১টা ছয়েৰে ৩৩ ৰাণৰ মাৰমুখী ইনিংছ খেলিছিল যদিও জাদেজাই তেওঁক বিদায় দি ইনিংছটোত নিজৰ পাঁচ উইকেট সম্পূৰ্ণ কৰাৰ লগতে ভাৰতীয় দলৰ বাবে আকাংক্ষিত জয় কঢ়িয়াই আনে।
স্মৰ্তব্য যে, ৰাণৰ হিচাপত টেষ্ট ইতিহাসত ভাৰতৰ এয়া সৰ্ববৃ্হৎ জয়। ইয়াৰ পূৰ্বে ভাৰতৰ সৰ্ববৃ্হত জয়ৰ অভিলেখ আছিল নিউজিলেণ্ডৰ বিপক্ষে। ২০২১ চনত মুম্বাইত ভাৰতে সেইবাৰ ৩৭২ ৰাণৰ ব্যৱধানত জয়লাভ কৰিছিল। আনহাতে আজি ইংলেণ্ডে দলটোৰ দ্বিতীয় সৰ্বাধিক ব্যৱধানৰ পৰাজয়ৰ সন্মুখীন হয়।
প্ৰথম ইনিংছত অৰ্ধশতকীয় ইনিংছ আৰু মুঠ্ ৭ টা উইকেট দখল কৰি দলৰ জয়ত মুখ্য ভূমিকা লোৱা জাদেজা মেচৰ শ্ৰেষ্ঠ বিবেচিত হয়। এই জয়েৰে ভাৰতে পাঁচখনীয়া মেচৰ শৃংখলাটোত ২-১ৰ অগ্ৰগতি লাভ কৰিছে। শৃংখলাৰ চতুৰ্থখন ২৩ ফেব্ৰুৱাৰীৰ পৰা ৰাঁচীত অনুষ্ঠিত হ’ব।
