শিক্ষা নগৰী পাঠশালাৰ অন্যতম আগশাৰীৰ শিক্ষা প্ৰতিষ্ঠান শংকৰদেৱ শিশু নিকেতেনৰ ২৫ সংখ্যক প্ৰতিষ্ঠা দিৱস উপলক্ষে আজি দিনজোৰা কাৰ্যসূচীৰে বিদ্যালয় কৰ্তৃপক্ষই ৰূপালী জয়ন্তী উৎসৱ শুভাৰম্ভ কৰে।
উল্লেখ্য যে আজিৰ দিনটোতে শংকৰদেৱ শিশু নিকেতনে প্ৰতিষ্ঠা লাভ কৰিছিল। সেয়ে প্ৰতিষ্ঠা দিৱসৰ লগত সংগতি ৰাখি বিদ্যালয়ৰ সমূহ কৰ্তৃপক্ষৰ লগতে ছাত্ৰ-ছাত্ৰীৰ অংশগ্ৰহণেৰে এটা বিশাল সাংস্কৃতিক শোভাযাত্ৰা বাহিৰ কৰা হয়।
১৯৯৫ চনৰ ১ জানুৱাৰিত স্থাপিত হোৱা শিক্ষানুষ্ঠানখনৰ আজি ২৫ বছৰ সম্পূৰ্ণ হোৱাত ৰাতিপুৱাৰে পৰা প্ৰাক্তন ছাত্ৰ-ছাত্ৰীৰ লগতে বৰ্তমান অধ্যয়নৰত ছাত্ৰ-ছাত্ৰী তথা অভিভাৱকসকলে বিদ্যালয়খনত ভিৰ কৰা পৰিলক্ষিত হয়।
ৰূপালী জয়ন্তী বৰ্ষৰ অনুষ্ঠানৰ লগত সংগতি ৰাখি ৰাতিপুৱা পাঠশালাৰ ৰাজপথত এক বাৰেৰহণীয়া সাংস্কৃতিক শোভাযাত্ৰা উলিওৱাৰ লগতে বিভিন্ন কাৰ্যসূচীৰ জৰিয়তে আজিৰ দিনটো উদযাপন কৰে।
