উত্তৰ প্ৰদেশৰ যোগী আদিত্যনাথ চৰকাৰ শিক্ষাখণ্ডত ডাঙৰ পৰিবৰ্তন হ’বলৈ ওলাইছে। ৰাজ্যৰ কমেও ২৭ হাজাৰ চৰকাৰী প্ৰাথমিক বিদ্যালয় পৰ্যায়ক্ৰমে বন্ধ কৰাৰ সিদ্ধান্ত গ্ৰহণ কৰিছে ৰাজ্য চৰকাৰে।
প্ৰথম পৰ্যায়ত ‘মাৰ্জাৰ’ৰ নামত প্ৰায় ৫ হাজাৰ বিদ্যালয় বন্ধ কৰাৰ বাবে চৰকাৰী জাননী জাৰি কৰা হৈছে। বাওঁ ছাত্ৰ সংগঠন এছ এফ আইয়ে ইয়াৰ বিৰুদ্ধে তীব্ৰ প্ৰতিবাদ সাব্যস্ত কৰিছে।
সোমবাৰে এই চৰকাৰী সিদ্ধান্তৰ প্ৰতিবাদত এছ এফ আইয়ে উত্তৰ প্ৰদেশৰ ৯ খন জিলাৰ বিভিন্ন স্থানত প্ৰতিবাদী সমদল, সমাৱেশ আৰু প্ৰতিনিধি কাৰ্যসূচী অনুষ্ঠিত কৰে। চুলতানপুৰ, এলাহাবাদ, চাহাৰনপুৰ, বাৰাণসী, কানপুৰ, লক্ষ্ণৌকে ধৰি কেইবাখনো জিলাত শতাধিক ছাত্ৰ-ছাত্ৰীয়ে এই পদযাত্ৰাত অংশগ্ৰহণ কৰে। পদযাত্ৰাৰ অন্তত চৰকাৰী বিদ্যালয় বন্ধ কৰাৰ সিদ্ধান্ত প্ৰত্যাহাৰ কৰাৰ দাবীত জিলা দণ্ডাধীশৰ কাৰ্যালয়ত প্ৰতিনিধি দাখিল কৰা হয়।
চুলতানপুৰত অনুষ্ঠিত প্ৰতিবাদী সমদলৰ পৰা এছ এফ আই অল ইণ্ডিয়াৰ সভাপতি আদৰ্শ এম সাজীয়ে কয়, ‘এই সিদ্ধান্ত কেৱল প্ৰশাসনিক নহয়, ইয়াৰ ৰাজনৈতিক উদ্দেশ্য হৈছে দুখীয়া আৰু প্ৰান্তীয় লোকৰ শিক্ষাৰ অধিকাৰ কাঢ়ি লোৱা।
সাজীয়ে দাবী কৰে যে চৰকাৰী বিদ্যালয় বন্ধ কৰিলে ছাত্ৰ-ছাত্ৰীৰ বাবে বিদ্যালয়লৈ যোৱাৰ দূৰত্ব আৰু খৰচ বৃদ্ধি পাব, যাৰ ফলত বহু ছাত্ৰ-ছাত্ৰীয়ে বিদ্যালয় এৰিব। তেওঁ কয়, ‘যি ৰাজ্যত বিজেপিৰ ‘ডাবল ইঞ্জিন’ চৰকাৰ আছে, তেনে ৰাজ্যত চৰকাৰী শিক্ষানুষ্ঠানক সৰ্বাধিক ধ্বংস কৰাৰ প্ৰৱণতা দেখা যায়। এই সিদ্ধান্তই ভৱিষ্যত প্ৰজন্মৰ শিক্ষাৰ অধিকাৰ কাঢ়ি নিব।”
ইতিমধ্যে চৰকাৰী সিদ্ধান্তৰ বিৰুদ্ধে উচ্চতম ন্যায়ালয়ত গোচৰ ৰুজু কৰা হৈছে। বাদী ট্যাব খান ছলেমানীৰ হৈ অধিবক্তা প্ৰদীপ যাদৱে আদালতত কয় যে, “১৬ জুনত উত্তৰ প্ৰদেশ চৰকাৰে জাৰি কৰা জাননী কাৰ্যকৰী হ’লে শ শ চৰকাৰী বিদ্যালয় বন্ধ হ’ব। ফলত লাখ লাখ ছাত্ৰ-ছাত্ৰীয়ে শিক্ষাৰ অধিকাৰৰ পৰা বঞ্চিত হ’ব।”
তেওঁ আৰু কয় যে এই সিদ্ধান্ত ভাৰতৰ সংবিধানৰ ২১(ক) অনুচ্ছেদ অৰ্থাৎ ‘শিক্ষাৰ মৌলিক অধিকাৰ’ৰ স্পষ্ট উলংঘা। যদিও এলাহাবাদ উচ্চ ন্যায়ালয়ে এই গোচৰ খাৰিজ কৰিছিল, তথাপিও উচ্চতম ন্যায়ালয়ৰ ন্যায়াধীশ সূৰ্য কান্ত আৰু জয়মল্য বাগচিৰ বিচাৰপীঠে বিষয়টো গুৰুত্বসহকাৰে লৈ শুনানিৰ অনুমতি দিছে। এই সপ্তাহতে এই গোচৰৰ প্ৰথম শুনানি অনুষ্ঠিত হোৱাৰ সম্ভাৱনা আছে।
এই ঘটনাই ৰাজনৈতিক মহলৰ পৰাও তীব্ৰ প্ৰতিক্ৰিয়াৰ সৃষ্টি কৰিছে। সোমবাৰে কংগ্ৰেছ নেত্ৰী প্ৰিয়ংকা গান্ধীয়ে এক্সত পোষ্ট কৰি লিখিছে, “উত্তৰ প্ৰদেশ চৰকাৰে এই অমানৱীয় সিদ্ধান্তৰ জৰিয়তে দলিত, জনজাতি আৰু সংখ্যালঘু সম্প্ৰদায়ৰ ছাত্ৰ-ছাত্ৰীৰ শিক্ষাৰ অধিকাৰ কাঢ়ি লৈছে। একত্ৰীকৰণৰ নামত ৫ হাজাৰ বিদ্যালয় বন্ধ কৰা হৈছে। ২৭ হাজাৰ বিদ্যালয় বন্ধ কৰাৰ পৰিকল্পনা আছে।”
তেওঁ আৰু কয়, “ইউ পি এ চৰকাৰৰ দিনত সংবিধানত শিক্ষাক মৌলিক অধিকাৰ হিচাপে স্বীকৃতি দিয়া হৈছিল আৰু প্ৰতিখন গাঁৱতে এখনকৈ বিদ্যালয় স্থাপনৰ উদ্যোগ লোৱা হৈছিল। বিজেপি চৰকাৰে সেই গাঁথনি ধ্বংস কৰি আছে।”যোগী আদিত্যনাথ চৰকাৰৰ এই সিদ্ধান্ত এতিয়া ৰাজ্যৰ শিক্ষা ব্যৱস্থা আৰু সামাজিক ভাৰসাম্যৰ বাবে এক ডাঙৰ প্ৰত্যাহ্বান হৈ পৰিছে। ক্ৰমান্বয়ে এই আন্দোলন ৰাজ্যৰ বিভিন্ন প্ৰান্তলৈ বিয়পি পৰিছে। আদালতৰ ৰায় আৰু ৰাজনৈতিক হেঁচাত চৰকাৰে নিজৰ সিদ্ধান্ত সলনি কৰিবনে নাই সেয়া হ’ব লক্ষ্যণীয়।
