বঙাইগাঁও জিলাত লোকনিৰ্মাণ বিভাগৰ সহকাৰী অভিযন্তা যোশিতা দাসৰ আত্মহত্যাৰ সৈতে জড়িত থকাৰ অভিযোগত কেন্দ্ৰীয় তদন্তকাৰী সংস্থাই (চি বি আই) বিভাগটোৰ কাৰ্যবাহী অভিযন্তা দীনেশ শৰ্মা মেধি, এছ ডি অ‘ আমিনুল ইছলাম আৰু দেৱজিৎ শৰ্মা নামৰ তিনিজনক গ্ৰেপ্তাৰ কৰিছে।
উল্লেখ্য যে, চলিত বৰ্ষৰ ২২ জুলাইত বঙাইগাঁৱৰ ভাৰাঘৰত যোশিতা দাসক মৃত অৱস্থাত উদ্ধাৰ কৰা হৈছিল। তেওঁৰ আত্মহত্যাৰ টোকাত তেওঁ শীৰ্ষ অভিযন্তাসকলৰ বিৰুদ্ধে গুৰুতৰ অভিযোগ উত্থাপন কৰি থৈ গৈছিল, যাৰ ফলত ৰাজ্যখনত বৃহৎ আলোড়ন সৃষ্টি হৈছিল। অসম চৰকাৰে এই ঘটনাৰ তদন্ত চি বি আইলৈ হস্তান্তৰ কৰাৰ পিছত এই গোচৰ ৰুজু হৈছে।
চি বি আইৰ এক বিবৃতিত কোৱা হৈছে, “কেন্দ্ৰীয় তদন্তকাৰী সংস্থাই ১৩ অক্টোবৰত লোকনিৰ্মাণ বিভাগৰ বঙাইগাঁৱৰ এছ ডি অ‘, এজন আৰ্কিটেক্ট আৰু কাৰ্যবাহী অভিযন্তাৰ বিৰুদ্ধে গোচৰ ৰুজু কৰিছে।
অসম চৰকাৰে আগষ্ট মাহত তদন্ত হস্তান্তৰ কৰিছিল। চৰকাৰৰ ১১ আগষ্টৰ আদেশ আৰু ভাৰত চৰকাৰৰ কৰ্মচাৰী, ৰাজহুৱা অভিযোগ আৰু পেঞ্চন মন্ত্ৰালয়ৰ ৭ অক্টোবৰৰ অধিসূচনাৰ ভিত্তিত গোচৰ নং ১৮৮/২০২৫ পঞ্জীয়ন কৰিছে।
যোশিতা দাসে তেওঁৰ টোকাত উল্লেখ কৰিছিল যে বিভাগৰ শীৰ্ষ বিষয়াসকলে তেওঁৰ ওপৰত মানসিক হেঁচা আৰু নিৰ্যাতন চলাই আহিছিল। তেওঁ অভিযোগ কৰিছিল যে তেওঁক কামৰ অধিক চাপ দিয়া হৈছিল আৰু বৰ্ষণগাঁৱৰ ১২ কোটি টকাৰ এটা প্ৰকল্পৰ দায়িত্ব মূৰত জাপি দিয়া হৈছিল। লগতে অবৈধ বিল পাচ কৰিবলৈ হেঁচা দিয়াৰ কথাও উল্লেখ যোশিতাৰ অভিযোগ অনুসৰি, অবৈধ কামৰ বিৰুদ্ধে প্ৰতিবাদ জনোৱাৰ বাবে বিভাগৰ বিষয়াসকলে তেওঁৰ ওপৰত মানসিক নিৰ্যাতন চলাই আহিছিল। সেই নিৰ্যাতন আৰু হেঁচাৰ ফলতেই তেওঁ মানসিকভাৱে ভাঙি পৰি চৰম সিদ্ধান্ত গ্ৰহণ কৰিছিল বুলি সন্দেহ কৰা হৈছে।
