মুম্বাইৰ বান্দ্ৰা-কুৰ্লা কমপ্লেক্সৰ নীতা মুকেশ আম্বানী সাংস্কৃতিক কেন্দ্ৰত প্ৰধানমন্ত্ৰী নৰেন্দ্ৰ মোদীৰ আগন্তুক অনুষ্ঠানক লৈ নিৰাপত্তা ব্যৱস্থা কটকটীয়া হৈ থকাৰ মাজতে দুজন লোকক আটক কৰিছে মুম্বাই আৰক্ষীয়ে। আটক কৰা লোক দুজনৰ ভিতৰত ২৪ বছৰীয়া এজন যুৱকে নিজকে প্ৰধানমন্ত্ৰীৰ কাৰ্যালয়ৰ বিষয়া বুলি পৰিচয় দিয়া বুলি আৰক্ষীয়ে জানিবলৈ দিছে।
আৰক্ষীৰ তথ্য অনুসৰি, যুৱকজনৰ সৈতে এজন দেহৰক্ষীও আছিল আৰু তেওঁৰ হাতত এটা বন্দুক উদ্ধাৰ কৰা হৈছে। ঘটনাৰ পাছতে মুম্বাই আৰক্ষীয়ে দুয়োকে আটক কৰি সোধা-পোছা আৰম্ভ কৰে। পাছত ঘটনাটোৰ অধিক তদন্তৰ দায়িত্ব মুম্বাই ক্ৰাইম ব্ৰাঞ্চক দিয়া হয়।
মুম্বাই আৰক্ষীয়ে জনোৱা মতে, অনুষ্ঠানস্থলীত উপস্থিত হোৱা যুৱকজনে নিজকে প্ৰধানমন্ত্ৰীৰ কাৰ্যালয়ৰ বিষয়া বুলি দাবী কৰিছিল। কিন্তু তেওঁৰ পৰিচয় আৰু অনুষ্ঠানস্থলীত উপস্থিত হোৱাৰ উদ্দেশ্য সন্দৰ্ভত এতিয়াও স্পষ্ট তথ্য পোৱা হোৱা নাই। তেওঁৰ সৈতে থকা লোকজনক দেহৰক্ষী বুলি কোৱা হৈছে আৰু তেওঁৰ পৰা বন্দুক উদ্ধাৰ হৈছে।
প্ৰধানমন্ত্ৰী নৰেন্দ্ৰ মোদীয়ে আজি সন্ধিয়া প্ৰায় ৫.৪৫ বজাত মুম্বাইত গ্ল’বেল ফিনটেক ফেষ্টৰ সপ্তম সংস্কৰণ উদ্বোধন কৰাৰ কথা আছে। এই অনুষ্ঠান মুম্বাইৰ উক্ত স্থানত অনুষ্ঠিত হোৱাৰ পূৰ্বে বন্দুক উদ্ধাৰৰ ঘটনাই নিৰাপত্তাক লৈ নতুনকৈ উদ্বেগ সৃষ্টি কৰিছে।
ইফালে, অনুষ্ঠানস্থলীত বন্দুক উদ্ধাৰ আৰু নিজকে প্ৰধানমন্ত্ৰী কাৰ্যালয়ৰ বিষয়া বুলি পৰিচয় দিয়াৰ ঘটনাৰ তদন্ত অব্যাহত আছে। আটক কৰা দুজন লোকৰ প্ৰকৃত পৰিচয় আৰু অস্ত্ৰ কিয় লগত লৈ অহা হৈছিল আৰু অনুষ্ঠানস্থলীত তেওঁলোক কেনেদৰে প্ৰৱেশ কৰিলে, সেই বিষয়ে ক্ৰাইম ব্ৰাঞ্চে তদন্ত চলাই আছে। ঘটনাটোৰ অধিক তথ্য তদন্ত আগবঢ়াৰ পাছতহে স্পষ্ট হ’ব।
