এনকাউণ্টাৰ নহয় এইবাৰ আৰক্ষীৰ লাঠিৰ কোবত যুৱকৰ মৃত্যু হোৱাৰ অভিযোগত এক উত্তপ্ত পৰিস্থিতিৰ সৃষ্টি হ’য় গোলাঘাটৰ শ্বহীদ কুশল কোঁৱৰ অসামৰিক চিকিৎসালয়ত।
খবৰ অনুসৰি গোলাঘাটৰ কমাৰগাওঁ অঞ্চলৰ অৰবিন্দ শইকীয়া নামৰ লোকজন কোনো ৰোগত আক্ৰান্ত হৈ ভৰি ফুলি যোৱাত মঙলবাৰে বিয়লি পৰিয়ালৰ লোকে চিকিৎসালয়ত ভৰ্ত্তি কৰাইছিল।
অৱশ্যে গোলাঘাটৰ চিকিৎসালয়ত কোনো চিকিৎসা নকৰি যোৰহাট মেডিকেল কলেজ হাস্পাতাললৈ ৰোগী জনক স্থানান্তৰিত কৰে। চিকিৎসকৰ কথা অনুসৰি ৰোগীজনক লৈ যাবৰ বাবে ততাতৈয়াকৈ পৰিয়ালৰ লোকে টকা যোগাৰ কৰিবলৈ ঘৰলৈ গৈছিল।
আৰু সেই সময়তে এই ঘটনাটো সংঘটিত হ’য়।চিকিৎসালয় কৰ্তৃপক্ষই জনোৱা মতে ৰোগী জনে চিকিৎসালয়ৰ ভিতৰত কোনো কথাত এক অপ্ৰীতিকৰ পৰিস্থিতিৰ সৃষ্টি কৰি খঙতে এডোখৰ ইটা দাঙি মাৰিবলৈ উদ্যত হ’য় ।
লগে লগেই ৰোগীজনক চম্ভালিবলৈ চিকিৎসালয় চাউনীত থকা আৰক্ষীক খবৰ দিয়াত আৰক্ষী উপস্থিত হৈ ৰোগীজনক নিয়ন্ত্ৰণলৈ আনে।যদিও পৰিয়ালৰ লোকে ঘৰৰ পৰা ঘূৰি আহি ৰোগীজনক মৃত অৱস্থাত উদ্ধাৰ কৰে।
এতিয়া পৰিয়ালৰ লোকৰ অভিযোগ যে আৰক্ষীয়ে ৰোগীজনক লাঠীৰে মৰিয়াই মাৰিছে। আৰক্ষীয়ে ৰোগীজনক মৰিয়াই দুডালকৈ লাঠী ভাঙি দিয়াৰো অভিযোগ আনিছে পৰিয়ালটোৱে ।ইফালে সাংবাদিকৰ আগত আৰক্ষীয়ে দিয়া ভাষ্য মতে ৰোগীজনে আৰক্ষীক দেখি দৌৰি ওলাই যাওঁতে এখন ৰখাই থোৱা গাড়ীত খুন্দা মৰাৰ ফলতহে ৰোগীজনৰ মৃত্যু হৈছে।
যদিও পৰিয়ালৰ লোকে এই সকলো কথা খণ্ডন কৰি আৰক্ষীৰ লাঠীৰ কোবতহে ৰোগী জনৰ এনেদৰে মৃত্যু হৈছে বুলি অভিযোগ আনিছে আৰু সেই লৈ নিশা চিকিৎসালয়ৰ চৌহদত এক উত্তপ্ত পৰিবেশৰ উদ্ভৱ হ’য়। উল্লেখযোগ্য যে এতিয়া এই সমগ্ৰ ঘটনা টোৰ
উচিত তদন্তৰ অবিহনে মৃতদেহ চমজি নলয় বুলিও সকিয়নী প্ৰদান কৰিছে পৰিয়ালৰ লোকে। তেনেক্ষেত্ৰত ৰাইজৰ দাবী যে জিলা প্ৰশাসনে এক উচ্চ পৰ্যায়ৰ তদন্ত কৰি সমগ্ৰ ঘটনাৰ সত্য উদঘাটন কৰক।
