এইবাৰ কেন্দ্ৰীয় মন্ত্ৰীৰ গাড়ীয়ে সংঘটিত কৰিলে আন এক মৰ্মান্তিক ঘটনা। শনিবাৰে পুৱা ডিব্ৰুগড়ত কেন্দ্ৰীয় মন্ত্ৰী ৰামেশ্বৰ তেলীৰ কনভয়ৰ এখন বাহনৰ খুন্দাত আহত হয় এজন যুৱক।
অসম চিকিৎসা মহাবিদ্যালয়ৰ সমীপত সংঘটিত এই ঘটনাত বৰ্মন নগৰৰ দীপজ্যোতি ভট্টাচাৰ্য নামৰ যুৱকজন গুৰুতৰভাৱে আহত হয় ।
সূত্ৰ অনুসৰি মন্ত্ৰীগৰাকীৰ কনভয়ৰ অংশ হিচাপে থকা এখন গাড়ীৰ চালকে সহায় বিচাৰি যোৱা এই যুৱকজনক খুন্দিয়াই দুৰ্ঘটনাটো সংঘটিত কৰে।
এই ঘটনাই এতিয়া স্থানীয় ৰাইজৰ মাজত ক্ষোভৰ সৃষ্টি কৰিছে। অভিযুক্তৰ বিৰুদ্ধে কঠোৰ ব্যৱস্থা গ্ৰহণৰ দাবী জনাইছে স্থানীয় ৰাইজে। ইতিমধ্যেই ভুক্তভোগীত পৰিয়ালে চালকজনৰ বিৰুদ্ধে এখন এজাহাৰ দাখিল কৰিছে।
আনহাতে, আৰক্ষীয়ে বিষয়টোৰ তদন্ত আৰম্ভ কৰি দোষীক শাস্তি দিয়াৰ আশ্বাস দিছে।
স্মৰ্তব্য যে একেধৰণৰ ঘটনাত যোৱা ২৪ মাৰ্চত কাছাৰ জিলাত মন্ত্ৰী পৰিমল শুক্লবৈদ্যৰ কনভয়ত এখন বাহনে খুন্দা মৰাৰ ফলত এগৰাকী বাইকাৰৰ মৃত্যু হৈছিল। বৰাক উপত্যকাৰ গেটৱে বুলিও জনাজাত কালাইনৰ ধুমকু অঞ্চলত এই ঘটনা সংঘটিত হয়।
শুক্লবৈদৰ কনভয়ৰ খুন্দাত নিহত ব্যক্তিগৰাকীৰ নাম ছাফিউল ইছলাম।
