শুনা গৈছিল যে ভাৰতীয় ক্ৰিকেটাৰ মহম্মদ ছিৰাজ আৰু প্ৰখ্যাত গায়িকা আশা ভোছলেৰ নাতিনী জানাই ভোছলেৰ মাজত প্ৰেমৰ সম্পৰ্ক আছে। জানাইৰ জন্মদিনৰ পাৰ্টিত ছিৰাজৰ উপস্থিতিৰ পিছত আৰু ছবিবোৰ দেখাৰ পিছত বহুতে সিদ্ধান্তই লৈ পেলাইছিল যে জানাই আৰু মহম্মদ ছিৰাজ প্ৰেমত পৰিছে।
তদুপৰি, দুয়োজনে প্ৰায়ে ইজনে সিজনৰ বাবে পোষ্ট কৰা দেখা গৈছিল। অৱশ্যে এই ৰাখীৰ দিনটোত মহম্মদ ছিৰাজৰ সৈতে জানাইৰ সম্পৰ্কৰ প্ৰকৃত সত্য পোহৰলৈ আহিল।
ইয়াৰ পূৰ্বেও জানাই ভোছলেই বহুবাৰ কৈছে যে তেওঁ ক্ৰিকেটাৰ মহম্মদ ছিৰাজক নিজৰ ভাতৃৰ দৰেই গণ্য কৰে। তথাপিও ক্ৰিকেটাৰগৰাকীৰ সৈতে তেওঁৰ সম্পৰ্কৰ উৰাবাতৰি চলিয়েই আছিল। এনে পৰিস্থিতিত ৰাখী বন্ধনৰ দিনা জানাইয়ে তেওঁ আৰু ছিৰাজৰ সম্পৰ্কৰ প্ৰমাণ দিলে।
ক্ৰিকেটাৰগৰাকীক ৰাখী পিন্ধোৱাৰ ভিডিঅ’ এটা শ্বেয়াৰ কৰিছে জানাই। ইয়াৰ আগতেও বিভিন্ন স্থানত দুয়োৰে মাজত প্ৰেমৰ সম্পৰ্ক নাই বুলি কৈছিল যদিও সেই কথা কোনেও মানি লোৱা নাছিল। কিন্তু শনিবাৰে জানাই আৰু ছিৰাজৰ মাজত যে প্ৰেমৰ সম্পৰ্ক নাই সেয়া প্ৰমাণ কৰি দিলে।
জানাই ৰাখী বান্ধিলে, ছিৰাজে উপহাৰ দিলে
ৰাখী বন্ধনৰ জৰিয়তে নিজৰ ইনষ্টাগ্ৰামত এটা ভিডিঅ’ পোষ্ট কৰিছে জানাই ভোছলে। ইয়াত জানাইক সেউজীয়া পোছাক পিন্ধা দেখা গৈছে, আৰু তেওঁৰ লগত বগা কুৰ্তা-পাইজামা পিন্ধি বহি থকা মহম্মদ চিৰাজক সপ্ৰতিভ দেখা গৈছে। ভিডিঅ’টোত জানাইয়ে মহম্মদ চিৰাজৰ হাতত ৰাখী বান্ধি থকা দেখা গৈছে। তাৰ পিছত ক্ৰিকেটাৰগৰাকীয়ে জানাইক ৰাখী বন্ধনৰ বাবে উপহাৰ দিয়াও দেখা যায়।
এই ভিডিঅ’টোৰ সৈতে জানাইয়ে ‘জিগ্ৰা’ চিনেমাৰ ‘তেনু চাং ৰাখনা’ গীতটো সংযোজন কৰিছে। কেপচনত জানাই লিখিছে- ‘এক হাজাৰৰ ভিতৰত… ইয়াতকৈ ভাল হ’ব নোৱাৰিলেহেঁতেন।’
জানাই লগতে নিজৰ ইনষ্টাগ্ৰাম ষ্ট’ৰীত এই ভিডিঅ’টো শ্বেয়াৰ কৰি লিখিছে- ‘আটাইতকৈ ভাল ভাতৃ।’ ছিৰাজেও এই সুন্দৰ ভিডিঅ’টো তেওঁৰ ষ্টৰীত পুনৰ শ্বেয়াৰ কৰিছে। অৱশ্যে জানাই আৰু ছিৰাজে এই ভিডিঅ’টোৰ কমেণ্ট ছেকচন বন্ধ কৰি দিছে যাতে কোনেও মন্তব্য কৰিব নোৱাৰে।
