ইউক্ৰেইনৰ ৰাষ্ট্ৰপতি ভল’ডিমিৰ জেলেনস্কিয়ে ৰাছিয়াৰ ৰাষ্ট্ৰপতি ভ্লাদিমিৰ পুটিনলৈ মুকলি পত্ৰ লিখি চাৰি বছৰতকৈও অধিক পুৰণি ৰাছিয়া-ইউক্ৰেইন যুদ্ধ বন্ধ কৰি স্থায়ী শান্তি স্থাপনৰ আহ্বান জনাইছে।
পত্ৰখনত তেওঁ পুটিনক মুখামুখি বৈঠকত বহিবলৈ আহ্বান জনাই দাবী কৰে যে ৰাছিয়াৰ সাধাৰণ মানুহ আৰু ব্যৱসায়িক মহল যুদ্ধৰ বাবে ক্ৰমান্বয়ে ক্লান্ত হৈ পৰিছে।
ব্ৰিটিছ সংবাদ মাধ্যম দ্য গাৰ্ডিয়ানে শুকুৰবাৰে এক প্ৰতিবেদনত এই পত্ৰখন বিতংভাৱে প্ৰকাশ কৰিছে।
ইউক্ৰেইনৰ ৰাষ্ট্ৰপতি কাৰ্যালয়ৰ ৱেবছাইটত প্ৰকাশিত এই পত্ৰখন বিশ্বৰ বিভিন্ন দেশৰ শীৰ্ষ নেতালৈও প্ৰেৰণ কৰা হৈছে।
ইয়াত জেলেনস্কিয়ে পুটিনৰ ২৬ বছৰীয়া দীঘলীয়া শাসনৰ কথা উল্লেখ কৰি কয় যে এসময়ত বহু ইউক্ৰেইনীয় লোকে তেওঁক ইতিবাচকভাৱে চাইছিল যদিও সেই সময় এতিয়া অতীত।
চিঠিখনত তেওঁ উল্লেখ কৰিছে যে যেতিয়া ইউক্ৰেইনৰ দীৰ্ঘ দূৰত্বৰ ড্ৰ’ন আক্ৰমণ ৰাছিয়াৰ গুৰুত্বপূৰ্ণ চহৰ চেণ্ট পিটাৰ্ছবাৰ্গত উপস্থিত হৈছিল, তেতিয়া বহু ইউক্ৰেইনবাসীয়ে ইয়াক আদৰণি জনাইছিল।
তেওঁ দাবী কৰে যে ইউক্ৰেইনৰ বিৰুদ্ধে যুদ্ধ কোনো ভূ-ৰাজনৈতিক প্ৰয়োজনীয়তা নহয়, বৰঞ্চ পুটিনৰ ব্যক্তিগত সিদ্ধান্তৰ ফল। জেলেনস্কিয়ে যুদ্ধক্ষেত্ৰত ৰাছিয়াৰ বৃহৎ লোকচানৰ ওপৰতো আলোকপাত কৰে।
তেওঁ কয় যে যোৱা মে’ মাহত ইউক্ৰেইন ফ্ৰণ্টত ৩০ হাজাৰতকৈ অধিক ৰাছিয়ান সৈনিক নিহত বা গুৰুতৰভাৱে আহত হৈছিল। তেওঁ লগতে মন্তব্য কৰে যে এনে লোকচান যিকোনো আধুনিক সেনাই দীৰ্ঘম্যাদীভাৱে সহ্য কৰাটো কঠিন।
ৰাছিয়াৰ আভ্যন্তৰীণ পৰিস্থিতিৰ কথা উল্লেখ কৰি ইউক্ৰেইনৰ ৰাষ্ট্ৰপতিগৰাকীয়ে কয় যে যুদ্ধৰ ফলত ড্ৰ’ন আৰু মিছাইল আক্ৰমণৰ আশংকা, শক্তিৰ নাটনি, মুদ্ৰাস্ফীতি, নতুন সামৰিক গঠনৰ পৰিকল্পনা আদিৰ প্ৰতি সাধাৰণ ৰাছিয়াৰ নাগৰিকৰ মাজত অসন্তুষ্টি বাঢ়িছে।
জেলেনস্কিয়েও পত্ৰখনত কয় যে ইউক্ৰেইনে যুদ্ধখন দীঘলীয়া কৰিব নিবিচাৰে। দেশখনে নিজৰ স্বাধীনতা আৰু সাৰ্বভৌমত্ব ৰক্ষাৰ সংগ্ৰামত জীয়াই আছে আৰু আন্তঃৰাষ্ট্ৰীয় সমাজৰ সমৰ্থন অব্যাহত ৰাখিছে। আনহাতে, ৰাছিয়াই ক্ৰমাৎ আন্তঃৰাষ্ট্ৰীয় নিষেধাজ্ঞাৰ সন্মুখীন হৈছে।
তেওঁ দাবী কৰে যে এই যুদ্ধত ৰাছিয়াক সহায় কৰিবলৈ চেষ্টা কৰা দেশ বা নেতাসকলে আন্তঃৰাষ্ট্ৰীয় ক্ষেত্ৰখনত সমালোচনাৰ সন্মুখীন হৈছে। একে সময়তে তেওঁ কটাক্ষ কৰি কয় যে বৰ্তমান ৰাছিয়া উত্তৰ কোৰিয়া আৰু চীনৰ সমৰ্থনৰ ওপৰত ক্ৰমান্বয়ে নিৰ্ভৰশীল হৈ পৰিছে।
চিঠিখনৰ এটা গুৰুত্বপূৰ্ণ অংশত জেলেনস্কিয়ে প্ৰত্যক্ষ শান্তি আলোচনাৰ প্ৰস্তাৱ আগবঢ়াইছে। তেওঁৰ মতে, বৰ্তমান আমেৰিকাই মধ্যপ্ৰাচ্য আৰু ইৰাণ সংকটৰ প্ৰতি অধিক গুৰুত্ব দিছে। গতিকে বাহ্যিক শক্তিৰ বাবে অপেক্ষা কৰাৰ পৰিৱৰ্তে ৰাছিয়া আৰু ইউক্ৰেইনে নিজৰ মাজত প্ৰত্যক্ষ আলোচনাৰ জৰিয়তে সমাধান বিচাৰি উলিয়াব লাগে।
তেওঁ চুইজাৰলেণ্ড, তুৰস্ক বা আৰব বিশ্বৰ কোনো নিৰপেক্ষ দেশত মুখামুখি বৈঠকৰ প্ৰস্তাৱ আগবঢ়ায়। সেই আলোচনাত ইউৰোপীয় ইউনিয়ন আৰু আমেৰিকাক মধ্যস্থতাকাৰী হিচাপে অন্তৰ্ভুক্ত কৰাৰ কথাও তেওঁ উল্লেখ কৰে।
শান্তি আলোচনাক ফলপ্ৰসূ কৰিবলৈ জেলেনস্কিয়ে সম্পূৰ্ণ যুদ্ধবিৰতিৰ প্ৰস্তাৱ আগবঢ়ায়। তেওঁ কয় যে ইউক্ৰেইন সমগ্ৰ আলোচনাৰ সময়ছোৱাত যুদ্ধবিৰতি কাৰ্যকৰী কৰি ৰাখিবলৈ সাজু আৰু আমেৰিকাৰ উপগ্ৰহ প্ৰযুক্তিৰ জৰিয়তে ইয়াক নিৰীক্ষণ কৰিব পৰা যাব।
ইয়াৰ উপৰিও দুয়োখন দেশৰ মাজত সকলো যুদ্ধবন্দীৰ ‘সকলোৰে বাবে’ আদান-প্ৰদান আৰু যুদ্ধৰ সময়ত লোৱা সাধাৰণ নাগৰিক আৰু শিশুসকলক শীঘ্ৰে ঘূৰাই দিয়াৰ আহ্বান জনায়।
চিঠিখনৰ শেষৰ অংশত জেলেনস্কিয়ে সকীয়াই দিছে যে যদিহে ৰাছিয়াই নিজা উদ্যোগত যুদ্ধ বন্ধ নকৰে তেন্তে ইউক্ৰেইনে নিজৰ অস্তিত্ব ৰক্ষাৰ বাবে শেষলৈকে যুঁজ দি থাকিব। একে সময়তে তেওঁ ইংগিত দিছে যে দীৰ্ঘদিনীয়া যুদ্ধৰ বাবে ৰাছিয়াৰ ভিতৰতো ৰাজনৈতিক হেঁচা বৃদ্ধি পাব পাৰে। অৱশেষত ইউক্ৰেইনৰ ৰাষ্ট্ৰপতিয়ে যুদ্ধত মৃত্যু হোৱা সকলোকে শ্ৰদ্ধাঞ্জলি জনাই ” গ্লোৰি টু ইউক্ৰেইন” শ্লোগানেৰে বক্তব্যৰ সামৰণি মাৰে।
