গুৱাহাটী মহানগৰীৰ জু-ৰোডত সংঘটিত গ্ৰেনেড বিস্ফোৰণত গুৰুতৰভাবে আহত হৈ নেমকেয়াৰ হস্পিতালত চিকিৎসাধীন হৈ থকা অমিত কেনছেলৰ উন্নত চিকিৎসাৰ প্ৰয়োজন হোৱাত মুখ্যমন্ত্ৰী সৰ্বানন্দ সোণোৱালৰ নিৰ্দেশক্ৰমে আজি বিমান যোগে তেওঁক নতুন দিল্লীলৈ লৈ যোৱা হয়।
চৰকাৰৰ প্ৰচেষ্টাত দিল্লীলৈ লৈ যোৱা কেনছেলক তৎকালীন ভাৱে এইমচত ভৰ্তি কৰি চিকিৎসা প্ৰদান কৰি থকা হৈছে। মুখ্য মন্ত্ৰী সৰ্বানন্দ সোণোৱালে অমিত কেনছেলৰ চিকিৎসাৰ বাবে প্ৰয়োজনীয় সকলো ব্যৱস্থা গ্ৰহণ কৰিবলৈ সংশ্লিষ্ট বিভাগক নিৰ্দেশ দিছে।
উল্লেখযোগ্য যে, ১৫ মে’ত গুৱাহাটীৰ জু-ৰোডৰ চেণ্ট্ৰেলত সংঘটিত গ্ৰনেড বিস্ফোৰণত ১১ গৰাকী লোক আহত হৈছিল।
অসম আৰক্ষীয়ে ইতিমধ্যে তদন্ত চলাই সমগ্ৰ ঘটনাৰ মূল নায়ক আলফা কেডাৰ বিজয় অসমক গ্ৰেপ্তাৰ কৰিবলৈ সক্ষম হৈছে। তৰোপৰি ঘটনাৰ লগত জড়িত থকা আলোচনাপন্থী আলফা প্ৰাণময় ৰাজগুৰু, জাহ্ণৱী শইকীয়া নামৰ এগৰাকী মহিলাকে ধৰি বহুকেইগৰাকী লোকক গ্ৰেপ্তাৰ কৰিছে।
আৰক্ষীয়ে সমগ্ৰ ঘটনাৰ তদন্ত অব্যাহত ৰাখিছে। অসমৰ মুখ্য মন্ত্ৰী সৰ্বানন্দ সোণোৱালে ঘটনা সম্পৰ্কত ইতিমধ্যে কেন্দ্ৰীয় গৃহ মন্ত্ৰী ৰাজনাথ সিঙৰ সৈতে হোৱা বৈঠকতো আলোচনা কৰিছে।
