জুবিনৰ মৃত্যু সম্পৰ্কে দাম্পত্যসংগী গৰিমা শইকীয়া গাৰ্গক SITএ জেৰা কৰাৰ পাছতে সৰব হৈ পৰিছে ৰাজ্যসভাৰ সাংসদ অজিত কুমাৰ ভূঞা৷ লগতে সাংসদ ভূঞাই বহুকেইটা প্ৰাসংগিক প্ৰশ্ন উত্থাপন কৰে৷ সাংসদ ভূঞাই কয় যে জুবিন গাৰ্গৰ মৃত্যুৰ তদন্তৰ অংশ হিচাপে গৰিমা শইকীয়া গাৰ্গক ৰাজ্যৰ বিশেষ তদন্তকাৰী দলে (SIT) প্ৰায় ৬ ঘণ্টা ধৰি সাক্ষ্যগ্ৰহণ কৰিছে। এই সাক্ষ্যগ্ৰহণৰ বিষয়ে এছআইটি আৰু আৰক্ষী সূত্রই অধিক প্ৰকাশ নাই। যদিও সাক্ষ্যগ্ৰহণ সম্পন্ন হৈছে, তথাপিও জনসাধাৰণৰ মাজত এক গুৰুত্বপূৰ্ণ প্ৰশ্ন উত্থাপন হৈছে জুবিন গাৰ্গক হত্যা কৰা হৈছে বুলি মুখ্যমন্ত্ৰী হিমন্ত বিশ্ব শৰ্মাই আগতে কৰা বিবৃতিৰ বাবে তেওঁক কিয় জেৰা কৰা হোৱা নাই?
অভিজ্ঞ বিশ্লেষক আৰু সাংবাদিক অজিত কুমাৰ ভূঞাৰ মতে, “যদি সত্যৰ সন্ধান ল’ব বিচৰা হৈছে, তেন্তে এছআইটিৰ সীমাবদ্ধতা আৰু মুখ্যমন্ত্ৰীক জেৰা নকৰাৰ সিদ্ধান্ত সন্দেহজনক। যি এছআইটিৰ সীমাবদ্ধতা এতিয়া দিনৰ পোহৰৰ দৰেই পৰিস্কাৰ হৈ পৰিছে।
তেওঁ আৰু উল্লেখ কৰে যে এছআইটিৰ তদন্তৰ সীমাবদ্ধতাক লৈ আৰম্ভণিৰ পৰাই সচেতন মহলে সমালোচনা কৰি আহিছে। এতিয়াও তদন্ত প্ৰক্ৰিয়াৰ জনসাধাৰণৰ মাজত বিতৰ্ক অব্যহাত আছে, আৰু জুবিন গাৰ্গৰ মৃত্যুৰ ৰহস্য পূৰ্ণৰূপে উদঘাটন হোৱা নাই বুলি অভিযোগ উঠিছে।
