কাইলৈ, অৰ্থাৎ ৪ জানুৱাৰিত খানাপাৰাৰ পশু চিকিৎসা-বিজ্ঞান মহাবিদ্যালয় খেলপথাৰত অনুষ্ঠিত কৰা বিজেপিৰ বুথ সভাপতিৰ সন্মিলনলৈ বাছেৰে মানুহ অনাত উজনি অসমত বাধা দিয়া হৈছে বুলি আজি অভিযোগ কৰে মন্ত্ৰী হিমন্ত বিশ্বই।
মন্ত্ৰীজনে আজি খানাপাৰাত এখন সংবাদমেল সম্বোধন কৰে আৰু এই অভিযোগটো কৰি কয়, “কিন্তু আমাক কোনেও ৰখাব নোৱাৰে। জনসাধাৰণেই আমাৰ শক্তি। কাইলৈ বিজেপিৰ কাৰ্য্যকৰ্তাৰ অজেয় অটল শক্তি দেখা পাব”।
কাইলৈৰ সভাত ৭০-৯০ হাজাৰ কাৰ্য্যকৰ্তা উপস্থিত থাকিব বুলি দাবী কৰে মন্ত্ৰীজনে।
বিজেপিৰ গাঁও পঞ্চায়তৰ নিৰ্বাচিত সদস্যসকল, বুথ পৰ্য্যায়ৰ সভাপতি, সভানেত্ৰীসকলে অংশগ্ৰহণ কৰিব লগীয়া সভাখনত বিজেপিৰ ৰাষ্ট্ৰীয় সাধাৰণ সম্পাদক জগত প্ৰসাদ নড্ডা উপস্থিত থাকিব।
এই সন্মিলনৰ পিছতে ৭ জানুৱাৰিত বিশ্বনাথ আৰু ৮ জানুৱাৰিত ধেমাজিত বিশাল কাৰ্য্যকৰ্তা সন্মিলন অনুষ্ঠিত কৰা হ’ব। ধেমাজিত ১ লাখ লোকেৰে হ’ব বিশাল ঐক্য সমদল। মন্ত্ৰীজনে কয়।
আনহাতে, ৰাজ্যত চলি থকা CAA-বিৰোধী আন্দোলনৰ প্ৰসংগত মন্ত্ৰীজনৰ মন্তব্য, “আন্দোলনে উচ্চতম ন্যায়ালয়ৰ দুৱাৰডলি পাইছে। উচ্চতম ন্যায়ালয়ে যি ৰায় দিয়ে সেয়া আমি মানি ল’ব লাগিব”।
“গণতান্ত্ৰিক আন্দোলন হ’লে ক’ব লগীয়া একো নাই” বুলি মন্তব্য কৰি তেওঁ কয় যে বিকল্প ৰাজনৈতিক দল গঠন হ’লে ৰাজনৈতিকভাৱে প্ৰত্যাহ্বান জনাব আৰু মোকাবিলা কৰিব।
ইপিনে জুবিন গাৰ্গ সন্দৰ্ভত আমোদজনক মন্তব্য দিয়ে শিল্পীজন সন্দৰ্ভত শেহতীয়াকৈ কেইবাটাও মন্তব্য কৰা মন্ত্ৰীজনে। তেওঁ কয়, “জুবিন গাৰ্গক অসমৰ লগতে, কংগ্ৰেছ, বিজেপি, অগপৰো সম্পদ”।
অসমৰ জনপ্ৰিয় শিল্পীজনলৈ তেওঁৰ আহ্বান, “সেয়ে নৱবৰ্ষৰ প্ৰাকক্ষণত তেওঁলৈ আহ্বান তেওঁ জাতি-ধৰ্ম-বৰ্ণ-দল-সংগঠন নিৰ্বিশেষে সকলোৰে অন্তৰত থকাৰ চেষ্টা কৰক”।
শিল্পী সমাজৰ আন্দোলনক লৈ হিমন্তৰ মন্তব্য, “শিল্পীৰ আৱেগক সন্মান জনাওঁ। তেওঁলোকৰ লগত আলোচনাত বহাত কোনো আপত্তি নাই। এদিন আহক আৰু তেওঁলোকক বুজাই দিম কোনটো দফাত বিদেশী নতুনকৈ আহিব বুলি উল্লেখ আছে। কোনো দফাত এই কথা নাই। এইখন তেওঁলোকে কোৱাৰ জাতিধ্বংসী নহয়”।
নলবাৰীৰ আছুকৰ্মীক আৰক্ষীয়ে প্ৰহাৰ কৰাক লৈ মন্তব্য, “আধ্যাত্মিক ভাবেৰে গুৰু ঘৰত ধৰ্মীয় কাৰ্য্যসূচীত যোৱাৰ সময়ত ক’লা পতাকা দেখুওৱা বা মই এসময়ৰ আছুকৰ্মী ৰাজেন বৰঠাকুৰৰ শোকসন্তপ্ত পৰিয়ালৰ খবৰ ল’বলৈ যাওঁতে ক’লা পতাকা দেখুওৱাটো কিমান যুক্তিসংগত? কিছুমান জেগাত অন্তৰখন বগা কৰি লৈ বগা পতকা দেখুৱাবলৈ আহ্বান জনাইছো। মন্দিৰ মছজিদত যোৱাৰ সময়ত অন্ততঃ বগা পতকা দেখুৱাওক”।
তৰুণ গগৈয়ে হিমন্ত কংগ্ৰেছলৈ আহিব বুলি কৰা মন্তব্যত প্ৰতিক্ৰিয়া দি কয়, “তৰুণ গগৈ বিজেপিত আহিব বুলি মই শুনি আছোঁ। গগৈৰ কিছুমান মত আৰু বিজেপিৰ মত একে দিশে গৈ আছে। কেতিয়াবা বিজেপিৰ মঞ্চত দেখিলে আচৰিত নহ’ব। তেওঁৰ মতে প্ৰফুল্ল মহন্তই বিদেশীক স্বদেশী কৰিছিল, আমিও সেইটো কৈ আহিছো। তেওঁৰ মতে ৮৭-ত বিদেশীক স্বদেশী কৰা হৈছিল, আমাৰ মতো একেই”।
