জুবিন গাৰ্গক মৰণোত্তৰভাৱে ‘সংগীত সুধাকৰ’ উপাধি প্ৰদানৰ সিদ্ধান্ত অসম সাহিত্য সভাৰ
অসমৰ সংগীত আৰু সাংস্কৃতিক জগতলৈ আগবঢ়োৱা অৱদানৰ স্বীকৃতি স্বৰূপে অসম সাহিত্য সভাই প্ৰয়াত শিল্পী তথা সাংস্কৃতিক আইকন জুবিন গাৰ্গক মৰণোত্তৰভাৱে সন্মানীয় ‘সংগীত সুধাকৰ’ উপাধি প্ৰদান কৰাৰ সিদ্ধান্ত গ্ৰহণ কৰিছে। দেওবাৰে যোৰহাটৰ ভগৱতী প্ৰসাদ বৰুৱা ভৱনৰ ড° মহেন্দ্ৰনাথ বৰা সোঁৱৰণী সভাকক্ষত অনুষ্ঠিত এখন সংবাদমেলত অসম সাহিত্য সভাৰ প্ৰধান সম্পাদক দেৱজিৎ বৰাই আনুষ্ঠানিকভাৱে এই কথা ঘোষণা কৰে। অহা ৩০ জুলাইৰ বিয়লি ৪ বজাত গুৱাহাটীৰ সংগীতাচাৰ্য লক্ষ্মীৰাম বৰুৱা সদনত আয়োজিত এক বিশেষ অনুষ্ঠানত এই সন্মান প্ৰদান কৰা হ’ব বুলি তেওঁ জানিবলৈ দিয়ে।
সাহিত্য সভাৰ পঞ্চৰত্ন-গুৱাহাটী অধিৱেশনত গ্ৰহণ কৰা এক প্ৰস্তাৱ অনুসৰি সংগঠনটোৰ কাৰ্যনিৰ্বাহক আৰু পৰিচালনা সমিতিয়ে এই সন্মান প্ৰদানত অনুমোদন জনাইছে। ৩০ জুলাইৰ অনুষ্ঠানটোত অসম সাহিত্য সভাৰ সভাপতি ড° বসন্ত কুমাৰ গোস্বামীয়ে এই উপাধি আনুষ্ঠানিকভাৱে প্ৰদান কৰিব। অনুষ্ঠানত সভাৰ উপ-সভাপতি পদুম ৰাজখোৱাৰ লগতে প্ৰয়াত শিল্পীগৰাকীৰ পিতৃ কপিল ঠাকুৰ, পত্নী গৰিমা শইকীয়া গাৰ্গ, ভগ্নী ড° পামী বৰঠাকুৰকে ধৰি পৰিয়ালৰ অন্যান্য সদস্যসকল উপস্থিত থাকিব।
শ্ৰদ্ধাঞ্জলি অনুষ্ঠানৰ অংশ হিচাপে জুবিন গাৰ্গৰ অনুৰাগীসকলে শিল্পীগৰাকীৰ সৃষ্টিৰাজিক সামৰি সংগীত, নৃত্য আৰু নাট্য প্ৰদৰ্শন সম্বলিত এক সাংস্কৃতিক কাৰ্যসূচী ৰূপায়ণ কৰিব। ইয়াৰ উপৰিও সাহিত্য সভাই প্ৰয়াত শিল্পীগৰাকীৰ জীৱন আৰু কৰ্মৰাজি, তেওঁৰ সৃষ্টিশীল অৱদান, মানৱীয় প্ৰমূল্যবোধ আৰু অসমীয়া সমাজ তথা সংস্কৃতিত তেওঁৰ প্ৰভাৱক লৈ এখন ৰাষ্ট্ৰীয় পৰ্যায়ৰ আলোচনা চক্ৰ অনুষ্ঠিত কৰিব। এই আলোচনা চক্ৰত উত্তৰ-পূৰ্বাঞ্চলৰ বিভিন্ন বিশ্ববিদ্যালয়ৰ গৱেষকসকলে পাঠ কৰা গৱেষণা পত্ৰসমূহ একত্ৰিত কৰি গ্ৰন্থ ৰূপত প্ৰকাশ কৰা হ’ব বুলিও সাহিত্য সভাই জানিবলৈ দিছে। শিল্পীগৰাকীৰ কালজয়ী সৃষ্টিসমূহক বহল শ্ৰোতাৰ মাজলৈ লৈ যোৱাৰ উদ্দেশ্যে তেওঁৰ নিৰ্বাচিত গীতসমূহ ইংৰাজী, হিন্দী আৰু বঙালী ভাষালৈ অনুবাদ কৰাৰ পৰিকল্পনা কৰা হৈছে।
উল্লেখযোগ্য যে, যোৱা ৭ জুলাইত অসম সাহিত্য সভাৰ উপ-সভাপতি আৰু প্ৰধান সম্পাদকৰ নেতৃত্বত এটি প্ৰতিনিধি দলে জোনালীস্থিত জুবিন গাৰ্গৰ ষ্টুডিঅ’ত পত্নী গৰিমা শইকীয়া গাৰ্গক সাক্ষাৎ কৰি মৰণোত্তৰভাৱে এই সন্মান প্ৰদান কৰাৰ সিদ্ধান্তৰ বিষয়ে অৱগত কৰিছিল। সাহিত্য সভাৰ সূত্ৰই প্ৰকাশ কৰা অনুসৰি, পৰিয়ালৰ লোকসকলে সাহিত্য সভাৰ এই পদক্ষেপক আদৰণি জনোৱাৰ লগতে গভীৰ কৃতজ্ঞতা প্ৰকাশ কৰিছে।