ৰাজ্যিক নিৰ্বাচন আয়োগে বিহুৰ পাছতে অসমত পঞ্চায়ত নিৰ্বাচন অনুষ্ঠিত কৰা হ’ব বুলি কৰা ঘোষণাৰ পাছতেই ৰাজ্যৰ ৰাজনৈতিক দলসমূহে নিৰ্বাচনক লৈ ব্যস্ততা হৈ পৰিছে। পিছ পৰি ৰোৱা নাই বিজেপি মিত্ৰজোঁট চৰকাৰৰ অংশীদাৰী দল অসম গণ পৰিষদো। আগন্তুক পঞ্চায়ত নিৰ্বাচনত অকলেই প্ৰতিদ্বণ্ডিতা আগবঢ়াব বুলি অগপৰ নেতৃত্বই পুনৰ এবাৰ স্পষ্ট ৰূপত প্ৰকাশ কৰে।
সোমবাৰে দলটোৰ আমবাৰীস্থিত কেন্দ্ৰীয় কাৰ্যালয়ত এখন নিৰ্বাচন প্ৰস্তুতি সম্পৰ্কে সভা অনুষ্ঠিত হয়। জিলা সমিতিসমূহৰ সভাপতি-সম্পাদক আৰু ভাতৃ-ভগ্নী সংগঠনৰ সভাপতি-সাধাৰণ সম্পাদকসকলৰ উপস্থিতিত এই গুৰুত্বপূৰ্ণ আলোচনাখন অনুষ্ঠিত হয়। এই আলোচনাত অধিকাংশ জিলা সমিতিয়ে পঞ্চায়ত নিৰ্বাচন অকলেই প্ৰতিদ্বণ্ডিতা কৰিব লাগে বুলি দৃঢ়তাৰে মত প্ৰকাশ কৰে।
ইফালে দলৰ সভাপতি তথা কৃষি, পশুপালন আদি দপ্তৰৰ মন্ত্ৰী অতুল বৰাই মিত্ৰতা সন্দৰ্ভত নিজৰ মত প্ৰকাশ কৰি কয় যে তৃণমূল নেতা কৰ্মীসকলৰ মতৰ ওপৰতহে দলে সিদ্ধান্ত গ্ৰহণ কৰে।
উল্লেখ্য যে অগপই পঞ্চায়ত নিৰ্বাচনৰ বাবে প্রথমবাৰৰ বাবে ৰণশিঙা বজাব ৫ এপ্ৰিলৰ দিনা গুৱাহাটীৰ খানাপাৰাৰ পশু চিকিৎসা বিজ্ঞান মহাবিদ্যালয়ৰ খেলপথাৰত। উক্ত দিনা দলটোৰ বুথ পৰ্যায়ৰ কৰ্মী সন্মিলন অনুষ্ঠিত হ’ব। বুথ কৰ্মী সন্মিলনৰ প্ৰস্তুতি সম্পৰ্কেও কালি আলোচনা কৰা হয়।
আনহাতে কালিৰ সভাত জিলা সমিতিসমূহে পঞ্চায়ত নিৰ্বাচনৰ প্ৰাৰ্থী নিৰ্বাচনৰ ক্ষেত্ৰত কিমানদূৰ অগ্ৰগতি লাভ কৰিছে সেই সন্দৰ্ভতো আলোচনা কৰা হয়।
তাৰোপৰি বুথ পৰ্যায়ৰ কৰ্মী সন্মিলনখন যাতে সৰ্বোতপ্ৰকাৰে সফল কৰি তুলিব পাৰি তাৰ বাবে সকলো নেতা কৰ্মীকে সভাপতি অতুল বৰাই আহ্বান জনায়। তেওঁ লগতে কয় যে এই সন্মিলনখনত ৰাজ্যৰ কমেও পঞ্চাশ হেজাৰৰো অধিক লোক সমবেত কৰি অসম গণ পৰিষদ দলৰ শক্তি প্ৰদৰ্শন কৰিব লাগিব।
সভাপতি অতুল বৰাই লগতে প্ৰাৰ্থী নিৰ্বাচনৰ সময়ত যাতে কোনো ধৰণৰ বেমেজালি সৃষ্টি নহয় তাৰ প্ৰতিও নজৰ ৰাখিবলৈ অনুৰোধ জনায়। আৰু ৰাজ্যৰ সকলো তৃণমূল কৰ্মীকে নিৰ্বাচনৰ বাবে অধিক উদ্যমেৰে কাম কৰিবলৈ আহ্বান জনায়।
আমবাৰীত অনুষ্ঠিত হোৱা এই আলোচনাত দলৰ প্ৰতিষ্ঠাপক সভাপতি প্ৰফুল্ল কুমাৰ মহন্ত, জ্যেষ্ঠ নেতা তথা বিধায়ক ফণীভূষণ চৌধুৰী, প্ৰাক্তন সভাপতি তথা বিধায়ক বৃন্দাবন গোস্বামী, বিধায়ত সত্যব্ৰত কলিতা, ভৱেন্দ্ৰ নাথ ভৰালী আদিয়ে অংশ লয়।
আনহাতে যোৱা শণিবাৰে বিজেপিৰ ৰাষ্ট্ৰীয় অধ্যক্ষ অমিত শ্বাহে খানাপাৰাৰ জনসভাত অংশ লৈ ‘মিত্ৰতা চলি আছে, চলি থাকিব’, বুলি কৰা তাৎপৰ্যপূৰ্ণ মন্তব্য সন্দৰ্ভত প্ৰফল্ল কুমাৰ মহন্তৰ পৰা প্ৰতিক্ৰিয়া জানিব বিচৰাত তেওঁ কয়- অমিত শ্বাহ মোৰ বচ নহয়, দলহে মোৰ বচ।
