আজিৰ পৰা অহা ২১ জুলাইলৈ গুৱাহাটী ডনবস্ক’ এলুমনিয়ে আয়োজন কৰিছে দশম সংখ্যক সদৌ অসম মেজৰ ৰেংকিং টেবুল টেনিছ আৰু সপ্তম সংখ্যক সদৌ অসম অপেন ৰেংকিং বেডমিণ্টন চেম্পিয়নশ্বিপ।
সোমবাৰে আয়োজক কমিটীৰ উপ-সভাপতি কাৰ্তিক ফুকন আৰু সম্পাদক বিকাশ আগৰৱালে অসম অলিম্পিক সন্থাৰ সভাগৃহত আয়োজিত এক সংবাদমেলত এই বিষয়ে উল্লেখ কৰে।
আয়োজক কমিটীয়ে জনোৱা অনুসৰি আজি দুয়োখন প্ৰতিযোগিতাৰে উদ্বোধন কৰা হ’ব। টেবুল টেনিছ খেলসমূহ আজিৰে পৰা ২০ জুলাইলৈ আৰু বেডমিণ্টনৰ মেচসমূহ ১৮ৰ পৰা ২১ জুলাইলৈ হ’ব।
অসমৰ ১০ খন জিলাৰ ৩২৮ গৰাকী খেলুৱৈয়ে টেবুল টেনিছ প্ৰতিযোগিতাত আৰু বেডমিণ্টনত ১২ খন জিলাৰ মুঠ ৪৫০ গৰাকী খেলুৱৈ অংশগ্ৰহণ কৰিব বুলি আয়োজকে জানিবলৈ দিয়ে। মেচসমূহ নক আউট ভিত্তিত আৰু ছিংগলছ ইভেণ্টত অনুষ্ঠিত হ’ব বুলিও জানিবলৈ দিয়ে।
এই প্ৰতিযোগিতাখন স্পনছ’ৰ কৰিছে বেষ্ট চিমেণ্ট, এল আই চি আই, গুৱাহাটী তেল শোধনাগাৰ, বাৰ্মা স্প’ৰ্টছ, ডনিক, স্কুৱেৰ স্প’ৰ্টছ, আমূল, হোলছম ব্ৰেড ৰিপ’জে।
অসম অলিম্পিক সন্থাৰ সভাগৃহত আয়োজিত এই সংবাদমেলত আয়োজক কমিটীৰ ড০ বনজিৎ চাংকাকতি, সংকোচ ৰঞ্জন দাস, মুকেশ অছানতানিৰ লগতে দীপজ্যোতি কলিতাও উপস্থিত থাকে।
