মহানগৰীত অচিৰেই ব্ৰহ্মপুত্ৰৰ বুকুত আৰম্ভ হ’ব ৱাটাৰ টেক্সি সেৱা। মহানগৰীৰ মাছখোৱাত আভ্যন্তৰীণ জল পৰিবহণ নিগমৰ নতুন পাৰঘাট (লাচিত ঘাট) দেওবাৰে মুকলি কৰে পৰিবহণমন্ত্ৰী চন্দ্ৰমোহন পাটোৱাৰীয়ে। ঘাটটো মুকলি কৰাৰ পাছত ব্ৰহ্মপুত্ৰৰ মাজত এখন জাহাজত সংবাদমেল আয়োজন কৰি তেওঁ ব্ৰহ্মপুত্ৰত টেক্সি সেৱা আৰম্ভ কৰাৰ বাবে অ’লাৰ লগত প্ৰাৰম্ভিক কথা-বতৰা হোৱা বুলি জানিবলৈ দিয়ে।
আভ্যন্তৰীণ জল পৰিবহণ বিভাগে এই ৱাটাৰ টেক্সি সেৱা ফেন্সি বজাৰৰ পৰা লোকপ্ৰিয় গোপীনাথ বৰদলৈ বিমান বন্দৰ, উত্তৰ গুৱাহাটী, পলাশবাৰী আৰু বিভিন্ন ঠাইত আৰম্ভ কৰিব। এই ৱাটাৰ টেক্সিৰ জৰিয়তে মহানগৰীৰ পৰা মাত্ৰ ১৫ মিনিটত বৰঝাৰ বিমান বন্দৰত উপস্থিত হ’ব পাৰিব য’ত স্থল পথেৰে ১ ঘণ্টাতকৈ অধিক সময়ৰ প্ৰয়োজন হয়। আনহাতে উত্তৰ গুৱাহাটীলৈ ২-৩ মিনিট, পলাশবাৰীত ১২ মিনিটত উপস্থিত হ’ব পাৰিব। নিশাৰ ভাগতো ব্ৰহ্মপুত্ৰৰ বুকুত এই টেক্সি সেৱা চলি থাকিব।
মন্ত্ৰী চন্দ্ৰমোহন পাটোৱাৰীয়ে কয় যে অসমৰ বাবে কেন্দ্ৰীয় চৰকাৰে ৬খন ৰ’ ৰ’ (roll on-roll off) আবণ্টন দিছে। এই ৰ’ ৰ'(roll on-roll off) কেইখন সাগৰ পথেৰে অসমলৈ আহি আছে। ইতিমধ্যে এখন ৰ’ ৰ'(roll on-roll off) অসমত আহি উপস্থিত হৈছে। বাকীকেইখনো এই বছৰৰ ভিতৰতে অসম পাবহি। প্ৰত্যেকখন ৰ’ ৰ’য়ে সমগ্ৰীসহ ১০ খন ট্ৰাক আৰু ২০০ যাত্ৰী কঢ়িয়াব পাৰিব। অত্যাধুনিক ৰ’ ৰ’কেইখন গুৱাহাটী, মাজুলী, ধুবুৰী, ডিব্ৰুগড়, আৰু ত্ৰিপুৰাত ৰখা হ’ব।
তাৰোপৰি পাটোৱাৰীয়ে কয় যে, ‘একে সময়তে কেন্দ্ৰৰ পৰা অতিৰিক্তভাৱে ৫৬খন ফ্ল’টিং টাৰ্মিনেল অতিৰিক্তভাৱে বিচৰা হৈছে। কেন্দ্ৰীয় চৰকাৰে টাৰ্মিনেলৰ বাবে অতিৰিক্ত ৩১ কোটি টকাৰ অনুমোদন দিছে। তদুপৰি আভ্যন্তৰীণ জল পৰিবহণ বিভাগৰ অধীনত আৰু ১১খন জাহাজ অহা জুলাই মাহত যাত্ৰীৰ বাবে মুকলি কৰি দিয়া হ’ব। একে সময়তে পুৰণি ইঞ্জিনবোৰৰ শক্তি বৰ্ধনৰ বাবেও ব্যৱস্থা গ্ৰহণ কৰা হ’ব।’
সংবাদমেলত মন্ত্ৰীগৰাকীয়ে পৰিবহণ বিভাগৰ অধীনত ‘জীৱন ডিঙা’ নামৰ এখন আঁচনি মুকলিৰ বিষয়েও ঘোষণা কৰে। এই আঁচনিৰ জৰিয়তে কোনো নিবনুৱা যুৱক-যুৱতীয়ে জাহাজ বনাব বিচাৰিলে ৩০ শতাংশ ৰাজসাহায্য লাভ কৰিব। ৰাজসাহায্যৰ পৰিমাণ সৰ্বনিম্ন ১ লাখ আৰু সৰ্বোচ্চ ৩ লাখ টকা হ’ব। মহিলা উদ্যোগীৰ বাবে ৰাজসাহায্যৰ পৰিমাণ ৩৫ শতাংশ হ’ব।
সংবাদমেলত তেওঁ লগতে কয় যে, ‘জাহাজ চলাবৰ বাবে চালকসকলক বিশেষ প্ৰশিক্ষণৰ প্ৰয়োজন। এইক্ষেত্ৰত ইচ্ছুক যুৱক-যুৱতীক দক্ষতা বিকাশৰ প্ৰশিক্ষণো দিয়া হ’ব। তদুপৰি অসম চৰকাৰৰ ২২ খনকৈ মালবাহী জাহাজ বৰ্তমান পশ্চিমবংগ আৰু হালদিয়াত ভাৰাত দি থোৱা গৈছে। এই জাহাজকেইখনৰ পৰা চৰকাৰে সামান্য পৰিমাণৰ ভাৰাহে লাভ কৰি আছে। গতিকে জাহাজকেইখন অসম চৰকাৰে ওভতাই আনিব আৰু নিজাববীয়াকৈ চলাচল কৰিব। ধুবুৰী আৰু গুৱাহাটীৰ মাজত ২খন ডাঙৰ মালবাহী জাহাজ চলাচলৰ ব্যৱস্থা কৰা হ’ব।’
