দীৰ্ঘদিন ধৰি গুৱাহাটী মহানগৰীৰ ধীৰেনপাৰা অঞ্চলত ব্লেডেৰে আক্ৰমণ কৰি সন্ত্ৰাসৰ সৃষ্টি কৰা অহা আনিছৰাজ আনছাৰী(৩২) নামৰ লোকজনক ৪ জুলাইত ফটাশিল আমবাৰী আৰক্ষীয়ে এক অভিযান চলাই আটক কৰিবলৈ সক্ষম হয়।
উল্লেখ্য যে এক হত্যাকাণ্ডৰ লগত জড়িত আনছাৰীয়ে যোৱা ২৬ জুনৰ সন্ধিয়া তহিমা খাতুন নামৰ ছাত্ৰী এগৰাকীৰ সৈতে প্ৰথমে তৰ্কা-তৰ্কিত লিপ্ত হৈ পাছত ছাত্ৰীগৰাকীক ডিঙিত ব্লেডেৰে আক্ৰমণ কৰিছিল। সেই ঘটনা দেখাৰ লগে লগে আৰিফ নামৰ এজন যুৱকে ছোৱালীজনীক বচাবলৈ যোৱাত যুৱকজনকো গাল আৰু ডিঙিত ধৃত আনচাৰীয়ে ব্লেডেৰে আক্ৰমণ কৰিছিল।
ঘটনা সংঘটিত কৰি ধৃত আনচাৰী ঘটনাস্থলীৰ পৰা পলায়ন কৰে বুলি আৰক্ষী সুত্ৰই জানিবলৈ দিয়ে।
এই ঘটনা সংঘটিত হোৱাৰ পাছতে উক্ত যুৱক-যুৱতীয়ে ততা-তয়াকৈ ফটাশিল-আমবাৰী থানাত এক গোচৰ ৰুজু কৰে। ফটাশিল-আমবাৰী আৰক্ষীয়ে ২৬০/১৮ ভাৰতীয় দণ্ডবিধিৰ ৩২৬/৩০৭ ধাৰাত এটা গোচৰ ৰুজু কৰি তদন্ত আৰম্ভ কৰে। আৰু অৱশেষত আতংক সৃষ্টিকাৰী আনছাৰীক কালি ধীৰেনপাৰাৰ ডি.কে পথৰ পৰা গ্ৰেপ্তাৰ কৰে।
উল্লেখ্য যে ২০১৬ চনতে ধৃত আনছাৰীয়ে এজন লোকক নিৰ্মমভাৱে হত্যা কৰি কাৰাগাৰলৈ গৈছিল। কিন্তু কাৰাগাৰৰ পৰা ওলাই পুনৰ এনেধৰণৰ দুস্কাৰ্য্যৰ সৈতে জড়িত হৈ পৰে বুলি আৰক্ষীয়ে জানিবলৈ দিয়ে।
ইতিমধ্যে ফটাশিল আমবাৰী আৰক্ষীয়ে ধৃত আনছাৰীক কাৰাগাৰলৈ প্ৰেৰণ কৰিছে বুলিও আজি আৰক্ষী সূত্ৰই জনায়।
