গড়কপ্তানি মন্ত্ৰী হিমন্ত বিশ্ব শৰ্মাই আজি ৭ জুলাইত শুভাৰম্ভণি কৰিলে গুৱাহাটীৰ পথৰ প্ৰথমটো পাইলট প্ৰজেক্টৰ কাম।
‘বহুদিনৰ পৰা গুৱাহাটীবাসীৰ অভিযোগ আছিল, গড়কপ্তানি বিভাগে ৰাস্তা নিৰ্মাণ কৰে কিন্তু ৰাস্তাটো ওখ হৈ গৈ থাকে আৰু ঘৰবোৰ তললৈ গৈ থাকে। এই বিষয়ে সংবাদ মাধ্যমতো বহু দিনৰ পৰা লেখা-মেলা চলি আছিল,‘ প্ৰকল্পটো উদ্বোধন কৰি মন্তব্য মন্ত্ৰীজনৰ।
সমগ্ৰ অসমতে পোন প্ৰথমবাৰৰ বাবে মিলিঙ আৰু ৰিচাইক্লিঙযোগে কৰিবলৈ লোৱা পথ নিৰ্মাণৰ ই হৈছে প্ৰথমটো প্ৰকল্প।
শুভাৰম্ভণি অনুষ্ঠানত গুৱাহাটী উন্নয়ন বিভাগৰ দায়িত্বত থকা মন্ত্ৰী সিদ্ধাৰ্থ ভট্টাচাৰ্য্যৰ লগতে শক্তি মন্ত্ৰী তপন কুমাৰ গগৈয়ো উপস্থিত থাকে।
এই প্ৰযুক্তি বিদ্যাৰ জৰিয়তে প্ৰথমতে ৰাস্তাটো কাটি লোৱা হ’ব বুলি সদৰী কৰি তেওঁ লগতে কয় যে কটাৰ পাছত যিখিনি পদাৰ্থ অথবা সামগ্ৰী ব্যৱহাৰযোগ্য হৈ থাকে, অনুমানিক ৩০ শতাংশ পদাৰ্থ পুনৰ ব্যৱহাৰ কৰি ৰাস্তাটো পুনৰ নতুনকৈ নিৰ্মাণ কৰা হ’ব।
যিহেতু পূৰ্বৰ ব্যৱহৃত পদাৰ্থসমূহ এই প্ৰজেক্টত ব্যৱহাৰ কৰা হ’ব, গতিকে আগৰ তুলনাত ৰাস্তা নিৰ্মাণৰ খৰচটো কমিব বুলিও মন্ত্ৰী হিমন্ত বিশ্ব শৰ্মাই সংবাদ মাধ্যমৰ আগত কয়।
উক্ত প্ৰযুক্তি বিদ্যাৰ জৰিয়তে দুটা লাভ হ’ব বুলি সদৰী কৰি তেওঁ কয় ‘যিহেতু ৰাস্তাটো খান্দি নিৰ্মাণ কৰা হ’ব, গতিকে ৰাস্তাটোৰ স্থায়ীত্ব থাকিব। দ্বিতীয়তে গুৱাহাটীৰ মানুহৰ যি ডাঙৰ অভিযোগ আছিল ৰাস্তাটো ওখ হৈ গৈ থাকে আৰু তেওঁলোকৰ ঘৰসমূহ চাপৰ হৈ গৈ থাকে, সেই সমস্যৰ পৰা এই প্ৰক্ৰিয়াৰ জৰিয়তে হাত সাৰিব পাৰিব।‘
চাৰিটা পথ এই পাইলট প্ৰজেক্টৰ অধীনত লোৱা হৈছে বুলি মন্তৱ্য কৰি তেওঁ লগতে কয় ‘গুৱাহাটীবাসীৰ বাবে আজিৰ দিনটো এটা সুখৰ দিন। এই প্ৰজেক্টৰ দ্বাৰা পথ নিৰ্মাণত যদি সফল হওঁ ভৱিষ্যতে এনেদৰেই ৰাস্তা নিৰ্মাণ কৰা হ’ব।‘
উল্লেখ্য যে, ৰাস্তাৰ ঠিকাদাৰ সকলৰ সৈতে কিছুদিন পূৰ্বে এক আলোচনাত মিলিত হৈ তেওঁলোকক বেংকৰ পৰা লোণ লৈ হ’লেও এই মিলিঙ আৰু ৰিচাইক্লিঙ যন্ত্ৰটো কিনিবৰ বাবে অনুৰোধ কৰিছিল গড়কপ্তানি মন্ত্ৰী ড০ হিমন্ত বিশ্ব শৰ্মাই।
আজি তেওঁ সংবাদ মাধ্যমৰ আগত সমগ্ৰ পথ নিৰ্মাণৰ সৈতে জৰিত ঠিকাদাৰখিনিক উক্ত মেছিনটো ক্ৰয় কৰিবৰ বাবে আহ্বান জনায়।
প্ৰথমতে এই প্ৰজেক্টটো এফ.চি ৰোড, এম.চি.বি ৰোড আৰু কাহিলীপাৰা লালগণেশ সংযোগী পথ নিৰ্মাণত প্ৰয়োগ কৰা হ’ব আৰু উক্ত পথকেইটা নিৰ্মাণত সফল হ’লে অন্য সকলো পথেই এই প্ৰজেক্টৰ অধীনত নিৰ্মাণ কৰা হ’ব বুলি মন্ত্ৰী ড০ শৰ্মাই কয়।
তাৎপৰ্য্যপূৰ্ণভাৱে যদি বৰষুণে বাধা নিদিয়ে অহা এমাহৰ ভিতৰত উক্ত চাৰিটা পথ নিৰ্মাণৰ কাম সম্পূৰ্ণ হ’ব বুলি তেওঁ ঘোষণা কৰে।
