ৰহাস্থিত ৰণথলীৰ টোলগে’ট পুনৰ আৰম্ভ কৰিবলৈ চৰকাৰে ‘ইন্দাৰদ্বীপ’ নামৰ কোম্পানীটোক দায়িত্ব দিয়া বুলি প্ৰকাশিত বাতৰিৰ বিৰুদ্ধে সৰৱ হৈ পৰিছে ৰহাৰ কেইবাটাও সংগঠন। অসমৰ চাৰিলেনযুক্ত ঘাইপথসমূহৰ নিৰ্মাণৰ কাম সম্পূৰ্ণ নোহোৱা পৰ্যন্ত ৰহাৰ এই টোলগে’ট বন্ধ ৰাখিব লাগিব বুলি এই সংগঠনকেইটাই হুংকাৰ দিছে।
২০০৬ চনৰ পৰাই ৰাষ্ট্ৰীয় ঘাইপথ প্ৰাধিকৰণৰ অধীনত উত্তৰ-পূৰ্বাঞ্চলক সামৰি চাৰিলেনযুক্ত পথসমূহ নিৰ্মাণৰ ব্যৱস্থা গ্ৰহণ কৰিছিল যদিও বৰ্তমানলৈ ৰাষ্ট্ৰীয় চাৰিলেনযুক্ত ঘাইপথসমূহৰ নিৰ্মাণকাৰ্য সম্পূৰ্ণ নহ’ল। এই অভিযোগ ৰহা আঞ্চলিক ছাত্ৰ সন্থা, জাতীয়তাবাদী যুৱ-ছাত্ৰ পৰিষদ, মানৱ অধিকাৰ সংগ্ৰাম সমিতিৰ লগতে তিৱা ছাত্ৰ সন্থাৰ।
শুকুৰবাৰে ৰহাত সংগঠনকেইটাই আয়োজন কৰা এখন সংবাদমেলত কয় যে গুৱাহাটীৰ পৰা মৰিগাঁও, নগাঁও আৰু হোজাই জিলাৰ মাত্ৰ ৩০০ কিল’মিটাৰমানহে পথ নিৰ্মাণৰ কাৰ্ম সম্পূৰ্ণ কৰিছে যদিও বৰ্তমানেও পানীনলা, উপপথসমূহৰ নিৰ্মাণ সম্পূৰ্ণ নহ’ল। ফলস্বৰূপে সঘনে পথচাৰী, যান-বাহনসমূহ দুৰ্ঘটনাত পতিত হৈ আহিছে।
ইয়াৰ পূৰ্বে ২০১৬ চনত চৰকাৰে এই টোলগে’টটো মুকলি কৰাৰ ব্যৱস্থা কৰিছিল যদিও বহুকেইটা সামাজিক আৰু জাতীয় সংগঠনৰ তীব্ৰ প্ৰতিবাদত টোলগে’টটো অনিৰ্দিষ্ট কালৰ বাবে বন্ধ ৰখাৰ সিদ্ধান্ত লৈছিল চৰকাৰে।
ইতিমধ্যে এই সংগঠনসমূহে চাৰিলেনযুক্ত ৰাষ্ট্ৰীয় ঘাইপথ আৰু ঘাইপথৰ সংলগ্ন দাঁতিৰ প্ৰতিটো বিষয় জড়িত ব্যৱস্থা সুদৃঢ়কৰণ, ভগাপথ পৰিপক্ক ৰূপত নিৰ্মাণ, উপপথসমূহৰ সুদৃঢ়কৰণ, নলা-নৰ্দমাসমূহত ঢাকনি দিয়াৰ ব্যৱস্থা, পানী নিগৰা গতিপথৰ ব্যৱস্থা, ৰহা চাৰিআলিৰ চাৰিলেন পথ পৰিপূৰ্ণ, ৰাষ্ট্ৰীয় পথৰ দুয়োমূৰে নিয়ন্ত্ৰণ কক্ষ, জেব্ৰা ক্ৰছিং, পথ ছিগনেলসমূহ অনতি পলমে সুচল কৰিবলৈ চৰকাৰক এমাহ সময় নিৰূপণ কৰি দিছে।
ইয়াৰ অন্যথা আছুকে ধৰি সংগঠনসমূহে ৰাইজৰ সহযোগত গণ আন্দোলন গঢ়ি তুলিবলৈ বাধ্য হ’ব বুলিও সকীয়াই দিয়ে।
শুকুৰবাৰে অনুষ্ঠিত সংবাদমেলত ৰহা আঞ্চলিক ছাত্ৰ সন্থাৰ সভাপতি সঞ্জয় কুমাৰ কাকতী, সাধাৰণ সম্পাদক পংকজ হাজৰিকা, ৰহা আঞ্চলিক তিৱা ছাত্ৰ সন্থাৰ সভাপতি চন্দ্ৰকান্ত হোকাই, সাধাৰণ সম্পাদক চন্দন দেউৰী, অসম জাতীয়তাবাদী যুৱ-ছাত্ৰ পৰিষদৰ ৰহা আঞ্চলিক সমিতিৰ সভাপতি হৰিপ্ৰসাদ ৰাজখোৱা, সাধাৰণ সম্পাদক নীলোৎপল হাজৰিকা, ৰহা আঞ্চলিক মানৱ অধিকাৰ সংগ্ৰাম সমিতিৰ সভাপতি সঞ্জয় আমছি, সম্পাদক ধনটি ডেকা উপস্থিত থাকে।
