ত্ৰিপুৰাৰ জনজাতীয় জীৱনৰ অৱিচ্ছেদ্য অংগ তথা জনজাতীয় আৱাসিক অঞ্চলৰ ধ্ৰুপদী সৌন্দৰ্য বহন কৰা ‘টংঘৰ’ বোৰ অন্তৰ্ধান হৈ অতীতৰ স্মৃতিত বিলীন হৈ যাব।
খেৰৰ চালি আৰু বাহেৰ সজা সম্পূৰ্ণ থলুৱা আৰ্হিৰ এই ‘টংঘৰ’বোৰ। বহু কাল ধৰি ত্ৰিপুৰাৰ জনজাতিসকলৰ ই এক সুকীয় পৰিচয়ৰ বাহক হৈ আহিছে।
কিন্তু উন্নয়নৰ ইতিবাচক আৰু নেতিবাচক দুয়োটা দিশেই আছে।
এপিনে বাসিন্দাসকলে লাভ কৰিব সঠিক অনাময় ব্যৱস্থাৰে স্বাস্থ্যসন্মত একোটা উন্নত ঘৰ। আনপিনে এই ঘৰসমূহৰ সৌন্দৰ্য তথা নান্দনিকতা ত্ৰিপুৰাৰ পৰিৱেশৰ পৰা চিৰদিনৰ বাবে হেৰাই যাব।
প্ৰধানমন্ত্ৰী আৱাস যোজনাৰ অধীনত ৰাজ্যখনলৈ হেজাৰোধিক পকী ঘৰ নিৰ্মাণ হ’বলৈ গৈ আছে। কেন্দ্ৰীয় আঁচনিখনে জনজাতি অধ্যুষিত অঞ্চলসমূহকো সাঙুৰি ল’ব এই আঁচনিখনে ৰাজ্যখনৰ মুঠ ভৌগলিক অঞ্চলৰ ৬৮.১০ শতাংশ সামৰি ল’ব।
সংবাদ মাধ্যমৰ সৈতে হোৱা এক মত বিনিময় অনুষ্ঠানত এই আঁচনিৰ কথা ঘোষণা কৰি ৰাজ্যৰ বনমন্ত্ৰী নৰেশ জামাত্যই কয় যে ত্ৰিপুৰাৰ পাহাৰ অঞ্চলত এতিয়াও সাতৰ পৰা আঠ হাজাৰ ‘টংঘৰ’ আছে আৰু সেই সকলোবোৰেই ২০১৮ বৰ্ষৰ ভিতৰত সম্পূৰ্ণ পকী নাইবা অৰ্দ্ধ পকী ঘৰলৈ সলনি হৈ পৰিব।
জামাত্যই কয় যে বৰ্তমান প্ৰধানমন্ত্ৰী আৱাস যোজনা আৰু ইন্দিৰা আৱাস যোজনাৰ অধীনত প্ৰায় ২৪,০০০ গৃহ নিৰ্মীয়মান অৱস্থাত আছে আৰু এইবোৰ সম্পূৰ্ণ হ’লেই ‘টংঘৰ’বোৰ সলনি কৰা হ’ব।
মন্ত্ৰীগৰাকীয়ে প্ৰকাশ কৰে যো ঝুম খেতিৰ ওপৰত নিৰ্ভৰশীল শান্তিপ্ৰিয় জনজাতীয় সমাজৰ বাবে খেৰ আৰু বাহেৰে সজা এই ঘৰবোৰ জীৱনৰ এক অৱিচ্ছেদ্য অংগ।
‘’ সময়ৰ পৰিৱৰ্তনৰ লগে লগে ‘ঝুম’ খেতিয়ে আধুনিক কৃষিক বাট এৰি দিছে আৰু জনজাতি সমাজেও ইয়াৰ পৰা ব্যাপক হাৰত ওলাই আহিছে। গতিকে ‘টংঘৰ’ৰ উপযোগিতাও শেষ হৈ আহিছে.’’- জামাত্যই কয়।
তেওঁ লগতে জনায় যে প্ৰধানমন্ত্ৰী আৱাস যোজনা আৰু ইন্দিৰা আৱাস যোজনাৰ অধীনত সজা প্ৰতিটো ঘৰতে স্বাস্থ্য উপযোগী তথা পৰিচ্ছন্ন অনাময় ব্যৱস্থা থাকিব।
