অসম চুক্তি আৰু ভাৰতীয় সংবিধানক অৱমাননা কৰা নাগৰিকত্ব সংশোধন বিধেয়ক ( Citizenship Amendment Bill )ৰ বিৰোধিতা কৰাৰ বাবে অহা জুলাই মাহত সংসদৰ অধিৱেশনৰ পূৰ্বে সকলো ৰাজনৈতিক দলৰে সাংসদসকলক সাক্ষাৎ কৰি আহ্বান জনাব অসম আন্দোলন সংগ্ৰামী সতীৰ্থ মঞ্চই।
আনহাতে বিধেয়কখন বাতিল কৰাৰ দাবীত মঞ্চটোৱে অহা ৩০ মে’ত গণেশগুৰিৰ গণেশ উদ্যানৰ পৰা ৰাজ ভৱনলৈ প্ৰতিবাদী পদযাত্ৰা কৰিব। মঞ্চৰ মুখ্য আহ্বায়ক, অগপৰ প্ৰাক্তন সাংসদ কুমাৰ দীপক দাসে আজি ২৪ মে’ত গুৱাহাটীৰ আৱৰ্ত ভৱনত সংবাদমেলযোগে এই কথা ঘোষণা কৰে।
পদব্ৰজ কাৰ্য্যসূচীৰ অন্তত মঞ্চৰ নেতৃবৰ্গই ৰাজ্যপালক সাক্ষাৎ কৰিব। দাসে কয় যে সাংবিধানিক মুৰব্বী হিচাপে এগৰাকী ৰাজ্যপালে কেতিয়াও অসাংবিধানিক সিদ্ধান্ত ল’ব নোৱাৰে। অসম চুক্তিৰ আধাৰত বিদেশী চিনাক্তকৰণ হ’ব লাগিব বুলিও মঞ্চই ৰাজ্যপালক দাবী জনাব।
বিধেয়কখনৰ বিৰুদ্ধে মঞ্চই ল’ব লগা ধাৰাৱাহিক প্ৰতিবাদী কাৰ্য্যসূচীৰ বিষয়ে সদৰী কৰি দাসে লগতে কয় যে মঞ্চই দিল্লীত এলানি ধৰ্ণা-বিক্ষোভৰ কাৰ্য্যসূচীও হাতত ল’ব|
সংবাদমেলখনত প্ৰাক্তন মুখ্য মন্ত্ৰী প্ৰফুল্ল কুমাৰ মহন্তৰ লগতে অসম আন্দোলনকাৰী, মঞ্চৰ কে’বাগৰাকীও বিষয়-ববীয়াও উপস্থিত আছিল।
