বাৰিষাৰ বানে সমগ্ৰ ৰাজ্যতে সংহাৰী ৰূপ ধাৰণ কৰাৰ মাজতে মাজুলীতো বানৰ তাণ্ডৱ সৃষ্টি হৈছে। শেহতীয়াকৈ বানৰ কবলত পৰিছে নামনি মাজুলীৰ ছখনকৈ গাঁও। ব্ৰহ্মপুত্ৰ আৰু সোঁৱনশিৰি নদীৰ জলপৃষ্ঠ বৃদ্ধি পোৱাৰ পাছতে নদীৰ দাঁতিকাষৰীয়া অঞ্চলসমূহ প্লাৱিত হৈছে।
ব্ৰহ্মপুত্ৰৰ বাঢ়নি পানীত আজি পুৱতি নিশা নামনি মাজুলীৰ বৰজান কৃষি বান্ধটো ছিন্ন বিছিন্ন হৈ পৰে। ইয়াৰ ফলত নামনি মাজুলীৰ চাৰিঘৰীয়া,মহৰিচুক,বিৰিনাবাৰী, বৰমুকলি,গোৱালগাঁও আদি ৬খন গাঁৱৰ কৃষকৰ মাজত হাহাকাৰ সৃষ্টি হয়।
কৃষিবান্ধটোৱেদি সোমাই অহা বানে কেইবা হেক্টৰ কৃষি পথাৰ প্লাৱিত কৰাত আহু ধান আৰু বৰো ধান নিমিষতে বিনষ্ট হৈ পৰিছে। ফলত কৃষকে মুৰে কপালে হাত দিব লগা হৈছে।
প্ৰত্যেক বছৰে এই কৃষি বান্ধটো মাজুলী জিলা প্ৰশাসনে বান্ধিব লাগে যদিও এই বছৰ কোনো গুৰুত্ব নিদিয়াৰ বাবেই কৃষকৰ এই দুদৰ্শা হ’বলৈ পালে।
