পৰিৱৰ্তনৰ ধ্বনিৰ পিঠিত উঠি চৰকাৰ গঠন হৈছিল যদিও পৰিৱৰ্তন হোৱা নাই ৰাজ্য চৰকাৰৰ বিভিন্ন বিভাগৰ পুঁজি ব্যয়ৰ নীতি তথা গতি। চলিত বিত্তীয় বৰ্ষৰ অন্ত পৰোঁ পৰোঁ, অথচ বিভাগবোৰত নিৰ্ধাৰিত পুঁজিৰ ৫০ শতাংশই ব্যয় নোহোৱাকৈ ৰৈ গৈছে। ফলত বিভাগবোৰত কৰিব লগীয়া কাম-কাজো যে আকাংক্ষিত গতিত হৈ থকা নাই এই ছবিখনো পোহৰলৈ আহিছে। পুঁজি ব্যয় আৰু তাৰ সৈতে সম্পৰ্ক থকা বিভাগবোৰৰ কাম-কাজৰ এই হতাশাজনক তথ্য জানিব পৰা গ’ল চলিত বিধানসভাৰ অধিৱেশনত। বিধানসভাত এ আই য়ু ডি এফৰ বিধায়ক আমিনুল ইচলামৰ এটা প্ৰশ্নৰ উত্তৰত ৰাজ্যৰ বিত্ত বিভাগে দিয়া তথ্যত এই কথা জানিব পৰা গৈছে।
বিত্ত বিভাগে দিয়া তথ্যৰ পৰা গম পোৱা গৈছে যে চলিত বিত্তীয় বৰ্ষত ৰাজ্য চৰকাৰৰ বিভিন্ন বিভাগবোৰলৈ মুঠ প্ৰায় এক লাখ কোটি টকা (৯৫,৮৫৬.৩১ টকা) ধাৰ্য কৰা হৈছিল। কিন্তু যোৱা জানুৱাৰি মাহ পৰ্য্যন্ত আটাইবোৰ বিভাগে খৰচ কৰা পুঁজিৰ পৰিমাণ হ’ল ৪২,৯৩৪.৮৯ কোটি টকা (৪৪.৭৯ শতাংশ)। অৰ্থাৎ এতিয়াও আধাতকৈ অধিক টকা ব্যয় কৰিবলৈ বাকী আছে। অথচ হাতত মাত্ৰ ডেৰ-দুমাহ বাকী আছে।
তাৎপৰ্য্যপূৰ্ণভাৱে বিত্ত মন্ত্ৰী ড০ হিমন্ত বিশ্ব শৰ্মাৰ দায়িত্বত থকা গুৱাহাটী উন্নয়ন বিভাগে নিৰ্ধাৰিত পুঁজিৰ মাত্ৰ ৩.২৪ শতাংশহে ব্যয় কৰাৰ তথ্যও পোহৰলৈ আহিছে। সেইদৰে নিৰ্ধাৰিত পুঁজিৰ এই পৰ্য্যন্ত জলসম্পদ বিভাগে মাত্ৰ ৯.০৭ শতাংশ, নগৰ উন্নয়ন বিভাগে মাত্ৰ ১৩.২৮ শতাংশ, জলসিঞ্চন বিভাগে ২৪.৬১ শতাংশ, পঞ্চায়ত আৰু গ্ৰামোন্নয়ন বিভাগে মাত্ৰ ২৪.৮৪ শতাংশ ব্যৱহাৰ কৰাৰ তথ্য পোৱা গৈছে।
এই হতাশাজনক তথ্যই এই কথা প্ৰমাণ কৰে যে চৰকাৰ পৰিৱৰ্তন হ’লেও বিভাগবোৰৰ বছৰটোৰ কৰ্ম পৰিকল্পনা যুগুতোৱা তথা কাৰ্য্যকৰী কৰা নীতিৰ কোনো পৰিৱৰ্তন হোৱা নাই। পুঁজি থাকিও ব্যৱহাৰ নকৰাৰ ফলত বিভাগবোৰত উন্নয়নমূলক কামৰ গতি অতি লেহেমীয়া হোৱাৰ লগতে কোনো নতুনত্ব দেখা পোৱা নাযায়। এইদৰেই পূৰ্বৰ চৰকাৰবোৰৰ দিনতো হাজাৰ হাজাৰ কোটি টকা অব্যৱহৃত হৈ ৰৈ গৈছিল। আনকি কেন্দ্ৰীয় চৰকাৰৰ পৰা অহা পুঁজিও ব্যৱহাৰ কৰিব নোৱৰা বাবে ঘূৰি যোৱাৰ উদাহৰণ প্ৰায়ে ৰাইজে দেখি আহিছে।
