অহা মাহত ৰাজস্থানৰ জয়পুৰত অনুষ্ঠিত হ’বলগীয়া ৰাষ্ট্ৰীয় পৰ্যায়ৰ সৌন্দৰ্য প্ৰতিযোগিতা ‘শ্ৰীয়া মিছ ইণ্ডিয়া‘ ২০১৮ প্ৰতিযোগিতাৰ বাবে নিৰ্বাচিত হৈছে কোকৰাঝাৰৰ ২১ বছৰীয়া সুন্দৰী দেইজী বসুমতাৰী।
সুভাষ বসুমতাৰী আৰু মিনু বসুমতাৰীৰ জীয়ৰী দেইজীয়ে সৰুৰে পৰা ফেশ্বন জগতখনত প্ৰৱেশ কৰাৰ দুৰ্বাৰ হেঁপাহ পুহি ৰাখিছিল আৰু নিজৰ সোতৰ বছৰ বয়সতে এই ক্ষেত্ৰখনত সফলতাৰে খোজ পেলাইছিল।
সৌন্দৰ্য প্ৰতিযোগিতাখনত দেইজীয়ে দেশৰ ৫০ গৰাকী সুন্দৰীৰ লগত শ্ৰেষ্ঠত্বৰ মুকুটৰ বাবে সৌন্দৰ্যৰ প্ৰদৰ্শন কৰিব।
প্ৰতিযোগিতাখনৰ মূল পৰ্যায়লৈ নিৰ্বাচিত হোৱাৰ পূৰ্বে দেইজীয়ে গুৱাহাটীত অনুষ্ঠিত হোৱা অডিশ্যনত সকলোকে আকৰ্ষিত কৰিবলৈ সক্ষম হৈছিল। ইয়াৰ পৰিণতিতে কোকৰাঝাৰৰ সুন্দৰীগৰাকীক মূল পৰ্যায়লৈ নিৰ্বাচিত কৰা হয়।
দেইজীৰ লগতে প্ৰতিযোগিতাখনত উত্তৰ-পূবৰ আন দুগৰাকী সুন্দৰীয়েও অংশগ্ৰহণ কৰিব। ইয়াৰে এগৰাকী হ’ল অসমৰ দৰং জিলাৰ মঙলদৈৰ আৰু আনগৰাকী হ’ল অৰুণাচল প্ৰদেশৰ।
‘জয়পুৰত অহা মাহৰ পৰা অনুষ্ঠিত হ’বলগীয়া ৰাষ্ট্ৰীয় সৌন্দৰ্য প্ৰতিযোগিতাখনৰ বাবে মই অধিক আগ্ৰহেৰে বাট চায় আছো। প্ৰতিযোগিতাখনত মই অসম তথা উত্তৰ-পূবক প্ৰতিনিধিত্ব কৰিম। শ্ৰেষ্ঠত্বৰ মুকুট আজুৰি আনি গৃহ চহৰৰ লগতে অসম তথা উত্তৰ-পূবলৈ গৌৰৱ কঢ়িয়াই আনিব পাৰিম বুলি মই সম্পূৰ্ণ আশাবাদী’ এন ই নাওৰ সাংবাদিকৰ আগত এনেদৰে প্ৰকাশ কৰে দেইজীয়ে।
উল্লেখ্য যে ইয়াৰ পূৰ্বে তেওঁ ২০১৬ চনত অনুষ্ঠিত হোৱা মিছ বড়োলেণ্ডৰ খিতাপৰ লগতে মিছ হেইনাৰ উপখিতাপ দখল কৰিবলৈ সক্ষম হৈছিল।
শেহতীয়াকৈ মিছ মেগা নৰ্থ-ইষ্ট ২০১৭ সৌন্দৰ্য প্ৰতিযোগিতাত অংশ লৈ তেওঁ ছেমিফাইনেলৰ পৰা বাহিৰ হৈছিল।
দেইজীয়ে আৰু কয়, ‘নৰ্থ-ইষ্ট ২০১৭ সৌন্দৰ্য প্ৰতিযোগিতাখনৰ পৰা মই যথেষ্ট শিকিব পাৰিছো। আৰু এই অভিজ্ঞতাই মোক ভৱিষ্যত জীৱনত আগুৱাই যোৱাত যথেষ্ট সহায় কৰিব। মোক এই ক্ষেত্ৰত মায়ে যথেষ্ট সহায় কৰাৰ লগতে আগুৱাই যোৱাত অনুপ্ৰাণিত কৰিছে’।
কেন্দ্ৰীয় বিদ্যালয়ত শিক্ষা জীৱনৰ পাতনি মেলা দেইজীয়ে উচ্চতৰ মাধ্যমিকৰ শিক্ষা লয় পাঠশালাৰ পৰা আৰু ইংৰাজী বিষয়ত স্নাতক ডিগ্ৰী গ্ৰহণ কৰে কোকৰাঝাৰ চৰকাৰী মহাবিদ্যালয়ৰ পৰা।
জীয়ৰীৰ এই সাফল্যত মাক-দেউতাক তথা পৰিয়ালৰ লোকৰ লগতে সমগ্ৰ কোকৰাঝাৰবাসী যথেষ্ট উৎসাহী হোৱা পৰিলক্ষিত হৈছে।
