মহাত্মা গান্ধী ৰাষ্ট্ৰীয় গ্ৰাম্য নিযুক্তি নিশ্চিতকৰণ আঁচনিৰ (মনৰেগা) অধীনত কাম কৰা কোটি কোটি শ্ৰমিক এই বছৰ মজুৰি বৃদ্ধিৰ বাবে অপেক্ষা কৰিবলগীয়া হ’ব পাৰে। ইণ্ডিয়ান এক্সপ্ৰেছৰ এক প্ৰতিবেদন অনুসৰি, কেন্দ্ৰীয় চৰকাৰে যেতিয়ালৈকে নতুন আঁচনি ‘বিকশিত ভাৰত-গেৰাণ্টী ফৰ ৰোজগাৰ এণ্ড আজীৱিকা মিছন (গ্ৰামীণ)’ চমুকৈ ভিবি-জি ৰাম জি কাৰ্যকৰী নকৰে, তেতিয়ালৈকে মজুৰিৰ নতুন হাৰ ঘোষণা নকৰে।
যোৱা দুটা দশকত এইটোৱেই প্ৰথমবাৰৰ বাবে ঘটিছে যে কেন্দ্ৰীয় চৰকাৰে ফেব্ৰুৱাৰী-মাৰ্চ মাহত মনৰেগাৰ সংশোধিত মজুৰিৰ হাৰৰ অধিসূচনা জাৰি কৰা নাই। সাধাৰণতে প্ৰতি বছৰে বিত্তীয় বৰ্ষ আৰম্ভ হোৱাৰ আগতে নতুন হাৰ ঘোষণা কৰা হয়, যিটো ১ এপ্ৰিলৰ পৰা কাৰ্যকৰী হয়। সূত্ৰৰ পৰা জানিব পৰা মতে, গ্ৰামোন্নয়ন মন্ত্ৰালয়ে ৰাজ্যসমূহক জনাইছে যে ২০২৬-২৭ বৰ্ষৰ বাবে নতুন মজুৰিৰ হাৰ ভিবি-জি ৰাম জি আঁচনি কাৰ্যকৰী হোৱাৰ পিছতহে নিৰ্ধাৰণ কৰা হ’ব। তেতিয়ালৈকে ২০২৫-২৬ বৰ্ষৰ বৰ্তমানৰ মজুৰিৰ হাৰেই বাহাল থাকিব।
শেহতীয়াকৈ হোৱা এক ভিডিঅ’ কনফাৰেন্সত মন্ত্ৰালয়ৰ বিষয়াসকলে ৰাজ্যৰ প্ৰতিনিধিসকলক এই তথ্য প্ৰদান কৰে। মন্ত্ৰালয়ৰ এগৰাকী বিষয়াই জানিবলৈ দিয়া মতে, নতুন আঁচনিখন কাৰ্যকৰী হোৱাৰ লগে লগে মজুৰিৰ হাৰ সংশোধন কৰি অধিসূচনা জাৰি কৰা হ’ব আৰু তেতিয়ালৈকে বৰ্তমানৰ হাৰতে ধন পৰিশোধ কৰি থকা হ’ব। মনৰেগাৰ অধীনত মজুৰিৰ হাৰ উপভোক্তা মূল্য সূচকাংকৰ (কৃষি শ্ৰমিক) ভিত্তিত নিৰ্ধাৰণ কৰা হয়, যিয়ে গ্ৰামাঞ্চলৰ মুদ্ৰাস্ফীতিক প্ৰতিফলিত কৰে।
চৰকাৰী তথ্য অনুসৰি, ২০২৬ চনৰ ১৪ এপ্ৰিললৈকে মনৰেগাৰ অধীনত ১১.০৩ কোটি সক্ৰিয় শ্ৰমিক পঞ্জীয়নভুক্ত হৈ আছিল আৰু ২০২৫-২৬ বিত্তীয় বৰ্ষত ৫.৩৪ কোটি পৰিয়ালে (প্ৰায় ৭.২ কোটি লোক) এই আঁচনিৰ অধীনত কাম কৰিছিল। যোৱা বছৰ ২৭ মাৰ্চত কেন্দ্ৰই নতুন মজুৰিৰ হাৰ ঘোষণা কৰিছিল, য’ত ২ৰ পৰা ৭ শতাংশলৈকে বৃদ্ধি কৰা হৈছিল। কিন্তু এইবাৰ এতিয়ালৈকে কোনো অধিসূচনা জাৰি কৰা হোৱা নাই।
উল্লেখযোগ্য যে ২০২৫ চনৰ ডিচেম্বৰ মাহত কেন্দ্ৰীয় চৰকাৰে ভিবি-জি ৰাম জি আইন, ২০২৫ গৃহীত কৰিছিল, যাৰ জৰিয়তে প্ৰায় দুটা দশক পুৰণি মনৰেগা আঁচনিখন বাতিল কৰি এখন নতুন গ্ৰাম্য নিযুক্তি আঁচনি কাৰ্যকৰী কৰাৰ প্ৰস্তাৱ দিয়া হৈছে। অৱশ্যে এই নতুন আইনখনৰ বহুকেইটা ব্যৱস্থাক লৈ বিৰোধীয়ে উদ্বেগ প্ৰকাশ কৰিছে। বিশেষকৈ পুজিৰ আৱণ্টন আৰু খেতিৰ ব্যস্ত বতৰত নিযুক্তি নিশ্চিতকৰণ সাময়িকভাৱে বন্ধ কৰাৰ দৰে ব্যৱস্থাসমূহক সমালোচনা কৰা হৈছে।
নতুন আঁচনিখনৰ অধীনত ৰাজ্যসমূহৰ অংশগ্ৰহণো বৃদ্ধি কৰা হৈছে। ভিবি-জি ৰাম জি আইন অনুসৰি, ১১ খন বিশেষ ৰাজ্যৰ বাবে কেন্দ্ৰ আৰু ৰাজ্যৰ মাজত পুজিৰ অনুপাত ৯০:১০ হ’ব, আনহাতে আন ৰাজ্যসমূহৰ বাবে ই ৬০:৪০ হ’ব। ইয়াৰ বিপৰীতে মনৰেগাত মজুৰিৰ সম্পূৰ্ণ খৰচ কেন্দ্ৰীয় চৰকাৰে বহন কৰিছিল আৰু সামগ্ৰী তথা প্ৰশাসনিক ব্যয়ৰ ৭৫ শতাংশও কেন্দ্ৰই দিছিল।
নতুন আঁচনিখন কেতিয়াৰ পৰা কাৰ্যকৰী হ’ব সেয়া এতিয়ালৈকে চৰকাৰে স্পষ্ট কৰা নাই। তেতিয়ালৈকে মনৰেগা চলি থাকিব, যাৰ বাবে ২০২৬-২৭ বৰ্ষৰ কেন্দ্ৰীয় বাজেটত ৩০,০০০ কোটি টকা আৱণ্টন কৰা হৈছে।
