প্ৰাক্তন মুখ্য মন্ত্ৰী তৰুণ গগৈয়ে আজি এক সংবাদমেলৰ জৰিয়তে উত্তৰ-পূবৰ তিনিখন ৰাজ্যৰ সদ্যসমাপ্ত নিৰ্বাচন আৰু ৰাজনৈতিক গতিবিধিকে ধৰি কেইবাটাও বিষয়ত গুৰুত্বপূৰ্ণ মন্তব্য প্ৰকাশ কৰে। ঘাইকৈ বিজেপিৰ নীতিৰ সমালোচনা কৰি গগৈয়ে সংবাদমেলত কয়, ”এটাজাতি, এটা নিৰ্বাচন আৰু এটাদল-এই নীতিৰে বিজেপিয়ে সমগ্ৰ ভাৰততে স্বৈৰাচাৰী শাসন প্ৰৱৰ্তন কৰিব বিচাৰিছে।
প্ৰাক্তন মুখ্য মন্ত্ৰীজনে কয়, ‘বিজেপি এনে এটা দল যি বিষ খুৱাই সকলো ৰাজ্যৰে আঞ্চলিক দলসমূহক ধ্বংস কৰাৰ চেষ্টা চলাই আছে। মেঘালয়ত দলটোৱে মাত্ৰ দুখন আসনহে পাইছে।’
আনহাতে ত্ৰিপুৰা সম্পৰ্কত কয়, ‘২৫ বছৰে চি পি আই (এম)ৰ শাসনত থাকি জনসাধাৰণে তিক্ততা বোধ কৰাৰ বাবে বিজেপিক জয়ী কৰালে।’ নিজৰ দলৰ অৱস্থা সম্পৰ্কতো কয়, ‘নাগালেণ্ড আৰু ত্ৰিপুৰাত কংগ্ৰেছৰ অৱস্থা একেবাৰে বেয়া।’
বিজেপিয়ে ফটা ঢোলত চাপৰ মৰা বুলি মন্তব্য কৰি গগৈয়ে কয় ‘নিৰ্বাচনৰ পূৰ্বে বিজেপিৰ উচ্চ পৰ্য্যায়ৰ নেতা সকলে নিৰ্বাচনী সভা অনুষ্ঠিত কৰিও মাত্ৰ দুখন আসনহে লাভ কৰিব সক্ষম হয়। মাত্ৰ দুখন আসন লাভ কৰি বিজেপিৰ অমৃত শ্বাহ, ৰাজনাথ সিং মেঘালয়ৰ নব-নিযুক্ত মুখ্য মন্ত্ৰী কমৰাড চাংমাৰ শপত গ্ৰহণ অনুষ্ঠানত অংশগ্ৰহণৰ বাবে অহাটো লাজৰ কথা। মেঘালয়ৰ জনসাধাৰণে বিজেপি দলক মুখথেকেচা খুওৱাৰ পিছতো তেওঁলোকে চৰকাৰ গঠন কৰাৰ দৰে দেখুৱাব বিচাৰিছে।’
এই কথাই কনৰাড চাংমাক হেয় প্ৰতিপন্ন কৰাৰ লগতে মেঘালয়বাসীকো অপমান কৰা বুলি গগৈয়ে মন্তব্য কৰে।
আনহাতে মেঘালয়ত কংগ্ৰেছে চৰকাৰ গঠন কৰিব নোৱাৰে নিৰ্বাচনৰ পূৰ্বৰে পৰা কৈ আছিলো বুলি মন্তব্য কৰি গগৈয়ে কয়,- ‘ধনৰ বলত বিজেপিয়ে মেঘালয়ত বিজেপিয়ে চৰকাৰ গঠন কৰিছে। মেঘালয়ৰ জনসাধাৰণেও এবছৰ পাৰ হোৱাৰ পিছত বিজেপি প্ৰকৃততে কি সেই কথা উপলব্ধি কৰিব।’
বিজেপি চৰকাৰে অসমৰ বাবে একো কৰা নাই বুলি কটাক্ষ কৰি গগৈয়ে মন্তব্য কৰে ‘বিজেপি চৰকাৰৰ নেব্ৰা (NEBRRA) ৰ জৰিয়তে ২০১৫ চনৰ ১৯ জুনত মোৰ সৈতে কেন্দ্ৰীয় চৰকাৰৰ জলসম্পদ বিভাগৰ আলোচনা হৈছিল। কিন্তু ২০১৮ চন হোৱাৰ পিছতো এই বিষয়ত তেওঁলোকে কোনো সিদ্ধান্ত গ্ৰহণ কৰিব নোৱাৰিলে।’
তদুপৰি তেওঁ বিটিচি কেবিনেটে অবড়ো লোকসকলৰ ভূমি কাঢ়ি ল’ব বিচৰা কথাটো উত্থাপনেৰে কয় ‘মুখ্য মন্ত্ৰী সৰ্বানন্দ সোণোৱালে বৰ্তমান সময়তো এই বিষয়ত সম্পূৰ্ণ ৰূপত নিমাত। কংগ্ৰেছ চৰকাৰৰ দিনত এনেকুৱা পৰিস্থিতি কেতিয়াও হোৱা নাছিল আৰু হ’বলৈও দিয়া নাছিলো।’
আনহাতে প্ৰাক্তন মুখ্য মন্ত্ৰী গৰাকীয়ে কিৰেণ ৰিজিজুক কিহৰ বাবে নাগা ফ্ৰেমৱৰ্ক চুক্তিখন তিনি বছৰে গোপন কৰি ৰাখিছে বুলি প্ৰশ্ন উত্থাপন কৰে।
এই সন্দৰ্ভত তেওঁ কয় ‘যদি অসম নাইবা মণিপুৰৰ কোনো অংশই নাগালেণ্ডৰ অন্তৰ্ভুক্ত নহয় তেন্তে ইয়াক গোপন কৰি ৰখাৰ যুক্তি ক’ত?’
ত্ৰিপুৰাত বিজেপি কৰ্মীয়ে মাৰ্ক্সবাদী নেতা লেনিনৰ মূৰ্তি বাগৰাই পেলোৱা সন্দৰ্ভত গগৈয়ে কয়, ‘লেনিন অথবা মহাত্মা গান্ধী, দীনদয়াল, জৱাহৰলাল নেহেৰুকে ধৰি অন্যান্য বিশিষ্ট লোকসকলৰ আদৰ্শক কোনোবাই সমৰ্থন নজনাব পাৰে। কিন্তু তাৰ অৰ্থ এইটো নহয় যে মূৰ্তি বগৰাই পেলাব।’
তেওঁ প্ৰাক্তন সতীৰ্থ ড০ হিমন্ত বিশ্ব শৰ্মা জেইললৈ যোৱাৰ ভয়ত বিজেপিলৈ যোৱা বুলি মন্তব্য কৰি কয় ‘হিমন্তক মই সুৰক্ষা দি আছিলো। বিজেপি দলত যোগদান কৰাৰ বাহিৰে তেওঁৰ হাতত অন্য উপায় নাছিল। কংগ্ৰেছত থকাহেঁতেন মোকো তেওঁ লেটিয়াই থাকিল হেঁতেন। গতিকে ময়ো বাছি গ’লো। ময়ো সাৰদা, লুই বাৰ্জাৰ কেলেংকাৰি, অস্ত্ৰ চুক্তি কেলেংকাৰিৰ বিষয়ে জানিছিলো। কিন্তু মই তেওঁক ছাঁ দি আছিলো।’
তাৎপৰ্য্যপূৰ্ণভাৱে তেওঁ কয় ‘মই হিমন্তৰ দোষবোৰ লুকুৱাই ৰাখিলো বাবে অপৰাধ কৰা হ’ল। কিন্তু বিজেপিয়ে এই বিষয়ে অৱগত হয় যদি কিয় কোনো ব্যৱস্থা হাতত লোৱা নাই। দুৰ্নীতিত লিপ্ত থাকিলেও বিজেপিলৈ যোৱাৰ পিছত সকলো সন্যাসী হৈ যায়।’
