অসম ডাইনী হত্যা (নিষিদ্ধ, প্ৰতিৰোধ আৰু সুৰক্ষা) বিধেয়ক, ২০১৫’ অসম অসম বিধান সভাই গৃহীত কৰাৰ দুবছৰতকৈয়ো অধিক সময় পাৰ হৈ যোৱাৰ পিছত ভাৰতৰ ৰাষ্ট্ৰপতি ৰাম নাথ কোবিন্দে বিধেয়কখন আইনলৈ পৰিণত কৰাৰ বাবে অনুমোদন জনাইছে।
জানিব পৰা মতে ৰাষ্ট্ৰপতিয়ে যোৱা ১৩ জনুত বিধেয়কখনত স্বাক্ষৰ কৰিছিল আৰু আইনখন ৰূপায়নৰ বাবে এক অসম গেজেট নটিফিকেশ্যনৰ অপেক্ষাত আছে।
অসমৰ ৰাজ্যপালে স্বাক্ষৰ কৰাৰ পিছত ২০১৫ চনৰ ডিচেম্বৰত বিধেয়কখন ৰাষ্ট্ৰপতিলৈ প্ৰেৰণ কৰা হৈছিল।
ভাৰতীয় দণ্ডবিধিৰ সৈতে কেইটামান বিষয়ত সংঘাত হোৱাৰ বাবে বিধেয়কখনত ৰাষ্ট্ৰপতিৰ অনুমোদনৰ প্ৰয়োজন হৈছিল।
আইনখনক আদৰণি জনাই ডাইনী কাণ্ডৰ বিৰুদ্ধে অভিযান চলাই অহা সামাজিক কৰ্মী দিব্যজ্যোতি শইকীয়াই নৰ্থইষ্ট নাওক তামিলনাডুৰ পৰা টেলিফোন যোগে জনায় যে যদিওবা ঝাৰখণ্ড, বিহাৰ, উৰিষ্যা আৰু মহাৰাষ্ট্ৰত ডাইনী-হত্যা বিৰোধী পৃথক আইন আছে, অসমৰ আইনখন এনেধৰণৰ ঘটনাৰ ক্ষেত্ৰত অক্ষমণীয় অপৰাধ হিচাপে গণ্য কৰা, জামিন বিহীন অপৰাধ আদি ব্যৱস্থা সন্নিৱিষ্ট এখন শক্তিশালী আইন হ’ব।
২০০৯ চনৰে পৰা শইকীয়াই এই আইনখনৰ বাবে সংগ্ৰাম কৰি আহিছিল।
‘’ভাতৃত্ববোধ আৰু সাম্প্ৰদায়িক সম্প্ৰীতিৰ হ’কে কাম কৰি থকাৰ সময়তে মই এনেকুৱা বহু ঘটনাৰ সৈতে মুখামুখি হৈছিলো য’ত মহিলাক ডাইনী সজাই নিৰ্যাতন চলোৱাৰ লগতে হত্যা পৰ্যন্ত কৰা হৈছে। আৰক্ষীয়ে অন্ধবিশ্বাস আৰু ইয়াৰ অনুশীলনৰ ক্ষেত্ৰত অসহায় হৈ পৰিছিল কিয়নো ইয়াৰ বাবে আইনত কোনো ব্যৱস্থা নাছিল। তেওঁলোকে এইবোৰক গণ হিংসা আৰু হত্যা হিচাপে ধৰি ভাৰতীয় দণ্ডবিধিৰ ৩০২ ধাৰাৰ অধীনত অনা উচিত,’’-শইকীয়াই কয়।
শইকীয়াই লগতে কয় যে তেওঁ আইনখনৰ বিষয়টোত লাগি পৰিছিল আৰু ২০১৪ চনৰ অক্টোবৰত এটা সপ্তাহত দুবাৰ তদানীন্তন মুখ্যমন্ত্ৰী তৰুণ গগৈক সাক্ষাৎ কৰি এখন পৃথক আইনৰ প্ৰয়োজনীয়তাৰ বিষয়ে যুক্তি দাঙি ধৰিছিল আৰু বিধেয়কখনৰ খচৰা প্ৰস্তুত কৰাত চৰকাৰক সহায় কৰিছিল।
এগৰাকী ব্যক্তিক ডাইনী বুলি অভিহিত কৰা বা চিনাক্ত কৰাৰ বাবে আইনখনত সাত বছৰ পৰ্যন্ত কাৰাদণ্ডৰ লগতে ৫ লাখ টকালৈকে জৰিমনাৰ ব্যৱস্থা ৰখা হৈছে।
ডাইনীৰ নামত কোনোবাই হত্যা কৰিলে এয়া ভাৰতীয় দণ্ডবিধিৰ ৩০২ ধাৰাৰ অধীনত গোচৰ ৰুজু কৰা হ’ব।
আনহাতে, এগৰাকী ব্যক্তিক ডাইনী হিচাপে অভিহিত কৰি নিৰ্যাতন চলালে, অপমানিত কৰিলে বা অভিযোগ আনিলে যাৱজ্জীৱন কাৰদণ্ডৰ লগতে ৫ লাখ পৰ্যন্ত জৰিমনা হ’ব পাৰে।
আইনখনত উল্লেখ আছে যে আৰক্ষীৰ প্ৰতিবেদন দাখিলৰ এবছৰৰ ভিতৰত এনে ধৰণৰ ঘটনাৰ বিচাৰৰ বাবে চৰকাৰে অতিৰিক্ত ন্যায়িক দণ্ডাধীশৰ আদালতক এখন বিশেষ আদালত হিচাপে ৰাখিব।
আইনখনত লগতে ডাইনী কাণ্ডৰ বিষয়ে ৰাইজক শিক্ষিত কৰি তুলিবলৈ বেচৰকাৰী সংস্থা আৰু নাগৰিক সমাজৰ সহযোগত প্ৰশাসন তথা আৰক্ষীয়ে গ্ৰহণ কৰিবলগীয়া বিভিন্ন ব্যৱস্থাৰ বিষয়ে উল্লেখ আছে।
আইনখনে ৰাজ্যখনত বৃদ্ধি পোৱা গণ হিংসাৰ ঘটনাসমূহ ৰোধক কৰিব বুলি আশা কৰা হৈছে।
২০১৫ চনত সেই সময়ৰ সংসদীয় পৰিক্ৰমা মন্ত্ৰী ৰকিবুল হুছেইনে সদনত জনাইছিল যে ২০১০ চনৰ পৰা গোটেই অসমত ডাইনীৰ নামত সংঘটিত ঘটনাত কমেও ৭৭ জন লোকে প্ৰাণ হেৰুওৱাৰ লগতে আন ৬০ জন লোক আহত হৈছিল।
ৰাজ্য বিধানসভাত এপ্ৰিলত ঘোষণা কৰা হৈছিল যে ২০০৬ চনৰ পৰা ডাইনীৰ সন্দেহত আক্ৰমণৰ ফলত ৮০ গৰাকী লোকৰ মৃত্যু হৈছিল।
২০১৩ চনত অধিবক্তা ৰাজীৱ কলিতাই ২০০২ চনৰ পৰা কমেও ১৭ খন জিলাত এনে আক্ৰমণৰ ঘটনাত ১৩০ জন লোকৰ মৃত্যু হোৱাৰ কথা উল্লেখ কৰি এখন ডাইনী হত্যা বিৰোধী আইন বিচাৰি গুৱাহাটী উচ্চ ন্যায়ালয়ত এখন ৰাজহুৱা স্বাৰ্থজনিত আবেদন দাখিল কৰিছিল।
দিব্যজ্যোতি শইকীয়াই কয় যে আৰক্ষীয়ে এতিয়া এনেধৰণৰ ঘটনাৰ মোকাবিলা কৰিবলৈ যথেষ্ট সাহস পাব আৰু ইয়াত থকা ব্যৱস্থাসমূহে সম্ভৱত: ডাইনীৰ নামত সংঘটিত এনেধৰণৰ অপৰাধ ৰোধ কৰাত সহায় কৰিব।
