অসমৰ মুখ্যমন্ত্ৰী সৰ্বানন্দ সোণোৱালৰ ডিব্ৰুগড় চহৰৰ ১ নং লক্ষী নগৰত থকা বাসগৃহলৈ যোৱা পথটোৰ অৱস্থা যোৱা কেইবা বছৰো ধৰি শোচনীয় হৈ পৰি আছে।
প্ৰতি বছৰে বাৰিষা কালত বোকাময় পথটোৰ অৱস্থা ইমান শোচনীয় হৈ পৰে যে অঞ্চলটোৰ লোকসকলে যাতনাৰ সন্মুখীন হ’বলগীয়া হয়। পথটোৰ অৱস্থা এনেকুৱা পৰ্যায় পাইছে যে এজাক ধাৰাসাৰ বৰষুণ দিলেই পথটো যাতায়তৰ বাবে অনুপযোগী হৈ পৰে।
মুখ্যমন্ত্ৰীৰ বাসগৃহটো লক্ষী নগৰ পথৰ আৰম্ভণিতে অৱস্থিত। একমাত্ৰ তেওঁৰ বাসগৃহটো পাৰ হোৱালৈকে পথছোৱা পকী কৰা হৈছে যদিও বাকী গোটেই পথটো বোকাময়।
লক্ষীনগৰ উন্নয়ন সমিতিৰ সভাপতি তথা আঞ্চলিকবাদী অসম গণ পৰিষদৰ (এএজিপি) সভাপতি সুনীল ৰাজকোঁৱৰে কয় যে ১৯৯৯ চনত সৰ্বানন্দ সোণোৱালে ১ নং লক্ষী নগৰ পথৰ আধাৰশিলা স্থাপন কৰিছিল। সোণোৱাল তেতিয়া আছুৰ সদস্য আছিল।
‘’বাৰিষা কালত বিদ্যালয়লৈ যোৱা ছাত্ৰ-ছাত্ৰী আৰু চিকিৎসালয়লৈ যাবলগীয়া ৰোগীসকলে পথটোৰ শোচনীয় অৱস্থাৰ বাবে তীব্ৰ অসুবিধাৰ সন্মুখীন হয়। পূৰ্বৰ চৰকাৰখনেও পথটো নিৰ্মাণ নকৰিলে। ‘পৰিৱৰ্তন’ৰ প্ৰতিশ্ৰুতিৰে ক্ষমতালৈ অহা বিজেপি চৰকাৰৰ দিনতো এতিয়ালৈকে মুখ্যমন্ত্ৰীৰ বাসগৃহলৈ যোৱা পথটোৰে এনে জৰাজীৰ্ণ অৱস্থা। আমাৰ ঘৰলৈ যেতিয়া আলহী ফুৰিবলৈ আহে পথটো এতিয়াও একেদৰে পৰি থকাৰ বাবে আমি লজ্জাবোধ কৰো,’’-১নং লক্ষী নগৰৰো বাসিন্দা সুনীল ৰাজকোঁৱৰে কয়।
তেওঁ লগতে কয় যে শীঘ্ৰে এই পথছোৱা নিৰ্মাণ কৰা হ’ব বুলি তেওঁ আশাবাদী।
তদুপৰি, বহু আৱেদনৰ পিছত ১ নং লক্ষী নগৰৰ এগৰাকী বাসিন্দা গোৱিন চাংমাইয়ে পথটোৰ জৰাজীৰ্ণ অৱস্থাৰ কথা ফেচবুকত প’ষ্ট কৰি দিছিল। সংবাদ মাধ্যমৰ আগত প্ৰকাশ কৰি চাংমাইয়ে কয় যে বহু আৱেদনৰ পিছতো কোনোৱে বিষয়টো গুৰুত্ব সহকাৰে নল’লে। ‘’মই ৰাইজৰ দুৰ্দশাৰ কথাটো ফেচবুকৰ দৰে ছচিয়েল মিডিয়াৰ জৰিয়তে উপস্থাপন কৰিছিলো।‘’
চাংমাইয়ে লগতে কয় যে ‘’ ১ নং লক্ষী নগৰৰ ৰাইজে পথটো নিৰ্মাণ কৰিবলৈ স্থানীয় বিধায়কক আবেদন জনাইছিল কিন্তু তেওঁলোকে বিষয়টোত গুৰুত্ব নিদিলে। ১০০০ তকৈয়ো অধিক লোকে এই অঞ্চলটোত বাস কৰে কিন্তু চৰকাৰ তথা স্থানীয় বিধায়কে বিষয়টোত গুৰুত্ব প্ৰদান কৰা নাই।‘’
