মাজুলীৰ প্ৰসিদ্ধ ম’হকিনা গাওঁবাসীৰ দীৰ্ঘদিনীয়া সপোন, অতি মৰম তথা কষ্টোপাৰ্জিত ধনেৰে নিৰ্মাণ কৰি উলিওৱা নৱনিৰ্মিত নামঘৰ-মণিকূটৰ দ্বাৰ দেওবাৰে উদঘাটন আৰু গুৰু আসন প্ৰতিষ্ঠা কৰা হয়। উদঘাটন কৰে আউনীআটি সত্ৰৰ সত্ৰাধিকাৰী ড০ পীতাম্বৰ দেৱগোস্বামীয়ে।
উদঘাটন কৰি পীতাম্বৰ দেৱগোস্বামীয়ে কয়, ‘মহাপুৰুষ শ্ৰীমন্ত শংকৰদেৱৰ অনুপম সৃষ্টি নামঘৰ অসমৰ জাতীয় জীৱনৰ নাট্যশালা। গুৰুজনাই বৰদোৱাত নামঘৰৰ বীজ ৰোপন কৰাৰ পাছৰে পৰা নামঘৰে অসমীয়া সমাজক একত্ৰিত কৰি ঐক্য-সম্প্ৰীতি ৰক্ষা কৰাত বলিষ্ঠ ভূমিকা গ্ৰহণ কৰি আহিছে’।
মাজুলীৰ ম’হকিনাৰ গাঁওবাসীয়ে দান বৰঙণিৰে নিৰ্মাণ কৰি উলিওৱা মাজুলীৰ ভিতৰতে সুন্দৰ নামঘৰটোৱে অসমীয়া জাতিৰ ধৰ্ম, ভাষা-সাহিত্য, সভ্যতা-সংস্কৃতি, ক’লা- কৃষ্টিৰ এক স্বৰ্ণময় স্তম্ভ স্বৰূপ হৈ জিলিকি উঠিব।
উল্লেখযোগ্য যে অসমীয়া জাতিৰ গঠন আৰু বিকাশত গুৰুত্বপূৰ্ণ ভূমিকা পালন কৰা নামঘৰকে আশ্ৰয় কৰি অসমীয়া কলা সংস্কৃতিৰ বিকাশৰ ধাৰা ১৬শ শতিকাতে প্ৰবাহিত হৈছিল সমগ্ৰ অসমজুৰি । সেই ধাৰা, সেই সংস্কৃতি আজিও আমাৰ সমাজত প্ৰবাহিত।
মাজুলীৰ আটাইতকৈ ধুনীয়া নামঘৰটো ম’হকিনা গাঁৱৰ প্ৰায় ১৩০ টা পৰিয়ালে আগবঢ়োৱা দান-বৰঙণিৰ সহায়ত প্ৰায় ৮০ লাখ টকা ব্যয় সাপেক্ষে বিগত চাৰি বছৰৰ শ্ৰমৰ অন্তত নিৰ্মাণ কাৰ্য সম্পূৰ্ণ হৈ উঠিছে।
দুদিনীয়া কাৰ্যসূচীৰে আয়োজন কৰা নামঘৰ প্ৰতিষ্ঠা উৎসৱৰ আজি দ্বিতীয় দিনা ঊষা কীৰ্তন, পৰিৱেশ নিকাকৰণ, নাম-প্ৰসংগ আৰু কীৰ্তন পাঠৰ পাছত সমহুৱা নাম অনুষ্ঠিত হ’ব। নিশা উক্ত গাঁৱৰ শিল্পীসকলৰ দ্বাৰা প্ৰদৰ্শন কৰা কৰা হ’ব ‘মৎস্য অৱতাৰ চাৰি বেদ উদ্ধাৰ’ ভাওনা।
নামঘৰটো সম্পূৰ্ণ হৈ উঠা তথা দ্বাৰ উদঘাটনক লৈ এতিয়া ম’হকিনা গাঁৱত এক উখল মাখল পৰিৱেশে বিৰাজ কৰা পৰিলক্ষিত হৈছে।
