দুদিনীয়া ভ্ৰমণসূচী লৈ ডিমা হাচাওত উপস্থিত হৈছে অসম চৰকাৰৰ বিত্ত, স্বাস্থ্য আৰু গড়কাপ্তানি মন্ত্ৰী ড০ হিমন্ত বিশ্ব শৰ্মা। হাফলঙত উপস্থিত হোৱাৰ আগতে জিলাখনৰ লাঙটিঙত সাৰ্বজনীন দুৰ্গা বাড়িৰ এটা নতুন ভৱনৰ দুৱাৰ মুকুলি কৰে মন্ত্ৰী শৰ্মাই।
অনুষ্ঠানটোত উপস্থিত থাকে পাৰ্বত্য এলেকা উন্নয়ন দপ্তৰৰ মন্ত্ৰী চুম ৰংহাং, পাৰ্বত্য স্বায়ত্ত শাসিত পৰিষদৰ চিইএম দেৱলাল গাৰ্লোচা, হাফলঙৰ বিজেপি বিধায়ক বীৰভদ্ৰ হাগজেৰ, পৰিষদৰ অধ্যক্ষা ৰাণু লাঙঠাচা আদিকে ধৰি আন বহু বিশিষ্ট লোক।
দুৰ্গা বাড়িৰ নতুন মণ্ডপৰ দুৱাৰ মুকলি কৰি জনসভাত সংক্ষিপ্ত বক্তব্য আগবঢ়াই মন্ত্ৰী হিমন্ত বিশ্ব শৰ্মাই কয় বিজেপি দল এটা নীতি- আদৰ্শৰ দল। উন্নয়নেই এই দলৰ মূলমন্ত্ৰ। যাৰ কাৰণে প্ৰধানমন্ত্ৰী নৰেন্দ্ৰ মোডীয়ে ‘চবকা সাথ, চবকা বিকাশ’ নীতিৰ জৰিয়তে দেশৰ প্ৰতিটো অঞ্চলক আগুৱাই লৈ যোৱাৰ সপোন দেখিছে।
পূৰ্বৰ চৰকাৰে পাহাৰীয়া জিলাৰ উন্নয়নত গুৰুত্ব দিয়া নাই। কিন্তু বৰ্তমান চৰকাৰে অধিক গুৰুত্ব দিছে। সেই কাৰণে লাহে লাহে উন্নয়নৰ চকা ঘূৰিবলৈ ধৰিছে।
উল্লেখযোগ্য যে মন্ত্ৰী গৰাকীয়ে লাঙটিঙৰ অনুষ্ঠান সামৰি ঘাইপথেৰে মাইবাঙ হৈ হাফলং অভিমুখে ৰাওনা হৈছে। মাজবাটত মাহুৰত বিজেপি নেতা- কৰ্মী সকলে মন্ত্ৰী শৰ্মাক উষ্ণ আদৰণি জনায়।
উল্লেখনীয় যে আজি হাফলঙত জিলা বিজেপি কৰ্মকৰ্তাসকলৰ উপৰি বিজেপি শাসিত উত্তৰ কাছাৰ পাৰ্বত্য স্বায়ত্তশাসিত পৰিষদৰ চিইএমইএমৰ লগত আলোচনাত মিলিত হ’ব মন্ত্ৰী শৰ্মাই। এই বৈঠকতে সংশ্লিষ্ট বিভাগীয় প্ৰধানসকলৰ সৈতে বিভিন্ন উন্নয়নমূলক কাম-কাজৰ খতিয়ান ল’ব মন্ত্ৰীগৰাকীয়ে।
তদুপৰি বিভিন্ন চৰকাৰী কাৰ্যসূচীত অংশ লোৱাৰ বিপৰীতে হাফলঙৰ সমীপৱৰ্তী চাম্পাৰিদিচাত ইক’ ট্যুৰিজমৰ বুজ ল’ব মন্ত্ৰী শৰ্মাই।
আনহাতে আজি অগপ নেতা তথা কৃষিমন্ত্ৰী অতুল বৰা আৰু মন্ত্ৰী কেশৱ মহন্তও হাফলঙত উপস্থিত হ’ব। মংগলবাৰে হাফলঙত অগপৰ এখন কৰ্মী সমাবেশত ভাগ ল’ব দুয়োগৰাকী নেতাই।
