ত্ৰিপুৰাৰ ঐতিহাসিক বিজয়ক আদৰ্শগত বিজয়ো বুলিছে প্ৰধান মন্ত্ৰী নৰেন্দ্ৰ মোদীয়ে।
এই বিজয়ক সাধাৰণ বিজয় নহয় বুলি অভিহিত কৰি টুইটাৰযোগে মোদীয়ে কয়, ‘বিকাশৰ দৃঢ় কাৰ্য্যসূচী আৰু আমাৰ সংগঠনৰ শক্তিৰ বাবে শূন্যৰ পৰা শিখৰলৈ এই যাত্ৰা সম্ভৱ হ’ল। বছৰ বছৰ ধৰি গ্ৰাউণ্ডত বিৰাট যত্নৰে কাম কৰি অহা বাবে বিজেপিৰ প্ৰতিজন কৰ্মকৰ্তাক মই মূৰ দোঁৱাইছো।’
তেওঁ কয়, ‘মোৰ ত্ৰিপুৰাৰ ভাই, ভনীসকলে যি কৰিলে সি অভূতপূৰ্ব। ত্ৰিপুৰাত বিজেপিলৈ আগবঢ়োৱা অভূতপূৰ্ব সমৰ্থনৰ বাবে তেওঁলোকক ধন্যবাদ দিবলৈ কোনো শব্দই যথেষ্ঠ নহয়। ত্ৰিপুৰাক পৰিৱৰ্তন কৰিবৰ বাবে আমি সকলো প্ৰচেষ্টা কৰিম।’
মোদীয়ে লগতে ‘মেঘালয়, নাগালেণ্ড আৰু ত্ৰিপুৰাৰ জনসাধাৰণে ৰায় দিলে! সুশাসনৰ কাৰ্য্যসূচী আৰু আমাৰ মূল্যৱান সংগীসকলৰ ‘এক্ট ইষ্ট নীতি’ৰ প্ৰতি জনোৱা সমৰ্থনৰ বাবে মই এই ৰাজ্যকেইখনৰ জনসাধাৰণক ধন্যবাদ জনাইছো।’ পশ্চিম বংগ, অ’ড়িছা আৰু কেৰালা জয়ৰ লগে লগে বিজেপিৰ সোণালী যুগ আৰম্ভ হ’ব বুলি কৈছে বিজেপি সভাপতি অমিত শ্বাহে। শ্বাহে কয়, ‘আমি কৰ্নাটকত নিশ্চিতভাৱে জিকিম।’
নতুন দিল্লীৰ বিজেপি মুখ্য কাৰ্য্যালয়ত শ্বাহে কয়, ‘ত্ৰিপুৰাৰ বিজয় ঐতিহাসিক। বাওঁপন্থা ভাৰতৰ কোনো ঠাইৰ বাবেই ঠিক নহয়।’
তেওঁ কয়, ‘যোৱা বছৰে ত্ৰিপুৰাৰ বিকাশৰ বাবে চিপিএমে একো নকৰিলে।’
আনহাতে ৰাজ্যখনত বিজেপিৰ দায়িত্বত থকা অসমৰ মন্ত্ৰী হিমন্ত বিশ্ব শৰ্মাই শনিবাৰে তেওঁৰ টুইটাৰ হেণ্ডলত ‘বাওঁ দূৰ্গ বিধ্বস্ত কৰা হ’ল’ বুলি কৈ ত্ৰিপুৰাৰ ৰাইজক অভিনন্দন জনাইছে।
আনহাতে পৰাজয়ৰ পিছত চিপিআই (এম)ৰ নেতা সীতাৰাম য়েচুৰীয়ে কয় যে বিজেপিয়ে ধন, বল ক্ষমতা অবিধভাৱে ব্যৱহাৰ কৰিছে। য়েচুৰীয়ে কয়, ‘সকলো বাওঁবিৰোধী শক্তিক একগোট কৰিবলৈ সক্ষম হৈছে। কিন্তু বাওঁ মৰ্চাই ৪৫ শতাংশ ভোট পাইছে।’
