পথ সুৰক্ষা সপ্তাহৰ সৈতে সংগতি ৰাখি বৰপেটা জিলাৰ বিভিন্ন স্থানৰ লগতে পাঠশালাটো ২৯ সংখ্যক ৰাষ্ট্ৰীয় পথ সুৰক্ষা সপ্তাহ আৰম্ভ কৰা হৈছে।
বৰপেটা জিলাৰ উপায়ুক্ত থানেশ্বৰ মালাকৰে আজিৰে পৰা ৩০ এপ্ৰিললৈকে বিভিন্ন কাৰ্যসূচীৰে উদ্যাপিত পথ সুৰক্ষা সপ্তাহটো উদ্বোধন কৰে।
এইবাৰৰ পথ সুৰক্ষা সপ্তাহৰ শ্লোগান হৈছে, ‘পথ পুৰক্ষা-জীৱন সুৰক্ষা’। গণ সচেতনতা অনাৰ বাবে বৰপেটাৰ উপায়ুক্ত থানেশ্বৰ মালাকৰক সভাপতি, বৰপেটাৰ আৰক্ষী অধীক্ষক ভায়োলেট বৰুৱা আৰু জিলা পৰিবহন বিষয়া গৌতম বৰুৱাক সদস্য সম্পাদক হিচাপে লৈ বৰপেটা জিলা পথ সুৰক্ষা সমিতি এখন গঠন কৰা হয়। পথ সুৰক্ষা সপ্তাহটো ভাৰত চৰকাৰৰ স্থলপথ পৰিবহণ মন্ত্ৰালয় আৰু অসম চৰকাৰৰ পৰিবহন বিভাগৰ নিৰ্দেশক্ৰমে উদ্যাপন কৰা হৈছে।
পুৱা স্বচ্চ ভাৰত অভিযান সম্পন্ন কৰা হয়। পাটাছাৰকুছি বিধানসভাৰ বিধা.ক পবিন্দ্ৰ ডেকাই বন্তু প্ৰজ্বলন কৰে। উপায়ুক্ত থানেশ্বৰ মালাকৰে সপ্তাহটো উদ্বোধন ঘোষণা কৰে। তেওঁ সকলোকে বিশেষকৈ শিক্ষাৰ্থীসকলক হেলমেট পৰিধান কৰিবলৈ কঠোৰ নিৰ্দেশ জাৰী কৰাৰ বাবে শিক্ষানুষ্ঠানসমূহক আহ্বান জনায়।
বজালী মহকুমাৰ মহকুমাধিপতি বিজয় ভাস্কৰ ৰেড্ডী আৰু অসম চৰকাৰৰ পৰিৱেশ আৰু বন বিভাগৰ ব্ৰেণ্ডএম্বেছাডৰ আনন্দ খাটনিয়াৰে গছপুলি ৰোপন কাৰ্যসূচী উদ্বোধন কৰে।
পাটাছাৰকুছি, বাঘমাৰাকে ধৰি জিলাখনৰ বিভিন্ন স্থানত পত সুৰক্ষা সপ্তাহ উদ্যাপন কৰা হ’ব। এই সময়চোৱাৰ ভিতৰত যান-বানসমূহৰ নথি-পত্ৰো পৰীক্ষা কৰা হ’ব।
২৫ এপ্ৰিলত পাঠশালা বাছ মালিক সন্থা আৰু মটৰ শ্ৰমিক সন্থাৰ উদ্যোগত এটা স্বস্থ্য পৰীক্ষা শিবিৰৰ আয়োজন কৰা হ’ব। তথ্য আৰু জন সম্পৰ্কৰক্ষী বিভাগৰ বৰপেটা কাৰ্যালয়ে পথ সুৰক্ষা বিষয়ক ঘোষণা কৰাৰ বাবে মাইকেৰে ঘোষণা কৰাৰ যাৱতীয় আয়োজন কৰিব।
২৬ তাৰিখে যান-বাহনৰ নথি পৰীক্ষা কৰাৰ লগতে ভৱানীপুৰ, পৰুপেটা, পাঠশালা আদি অঞ্চলৰ ব্যক্তিগত আৰু চৰকাৰী খণ্ডৰ শিক্ষাৰ্থীসকলৰ মাজত ঠাইতে লিখা ৰচনা প্ৰতিযোগিতাৰ আয়োজন কৰা হ’ব। ২৭ তাৰিখে বৰপেটাৰ বিভিন্ন স্থানত মাইকেৰে পথ সুৰক্ষা বিষয়ক ঘোষণা কৰাৰ লগতে প্ৰচাৰ-পত্ৰিকা বিতৰণ কৰা হ’ব।
জিলা পৰিবহন বিষয়া গৌতম বৰুৱা সমল ব্যক্তি হিচাপে লৈ বাঘমাৰা হাইস্কুলত এখন বিশেষ সভা অনুষ্ঠিত হ’ব। সেইদিনাই স্থানীয় ছাত্ৰ-ছাত্ৰীসকলে এখন বাটৰ নাট পৰিৱেশন কৰিব।বাঘমাৰাত ২৮ তাৰিখে সচেতনতা ঘোষণাৰ উপৰিও এখন বিশেষ সভা অনুষ্ঠিত কৰা হ’ব। ১৯ এপ্ৰিলত সৰুপেটা, চৌলিয়াবাৰী, ভৱানীপুৰ, শালাবাৰী আদি এলেকাত পথ সচেতনতা সন্দৰ্ভত মাইকেৰে ঘোষণা কৰা হ’ব।
৩০ তাৰিখে জিলা পৰিবহন বিষয়া কাৰ্যালয়ত সচেতনতা সপ্তাহৰ সামৰণি পৰিব।
