‘মুখ্য মন্ত্ৰী সৰ্বানন্দ সোণোৱাল নেতৃত্বাধীন বিজেপি চৰকাৰৰ দক্ষ মন্ত্ৰী ড০ হিমন্ত বিশ্ব শৰ্মাৰ স্বাস্থ্য বিভাগত ১,২৭৩ গৰাকী প্ৰাৰ্থীৰ নিযুক্তিৰ নামত বিয়াগোম দুৰ্নীতি চলি আছে’।— এই অভিযোগ দুলাল বৰাৰ।
আজি দিছপুৰ প্ৰেছ ক্লাবত অনুষ্ঠিত এখন সংবাদমেলত এই গুৰুতৰ অভিযোগ উত্থাপন কৰিছে আৰটিআই কৰ্মী দুলাল বৰাই।এই সন্দৰ্ভত বৰাই কয়— স্বাস্থ্য সঞ্চালক ডাঃ ৰথীন্দ্ৰ ভূঞাই অকৰ্তৃত্বশীলভাৱে পৰীক্ষা অনুষ্ঠিত কৰিবলৈ লাইফ ইনভ’লভমেন্ট নামৰ এটা এনজিঅ’ক দায়িত্ব দিছিল।
স্বাস্থ্য বিভাগত সংঘটিত ১,২৩৭ গৰাকী ষ্টাফ নাৰ্ছ, ৱাৰ্ড বয়, ৱাৰ্ড গাৰ্ল, নৈশ চকীদাৰৰ নিযুক্তি কেলেংকাৰীৰ নেতৃত্বত আছে স্বাস্থ্য সঞ্চালক ডাঃ ৰথীন্দ্ৰ ভূঞা। ১,২৩৭ গৰাকী পৰীক্ষাৰ্থীৰ ভিতৰত ৮৮২ গৰাকী ষ্টাফ নাৰ্ছ, ১৬৮ গৰাকী ৱাৰ্ড বয়, ১৬৮ গৰাকী ৱাৰ্ড গাৰ্ল আৰু ৫৫ গৰাকী নৈশ চকীদাৰ আছিল।
আজিৰ সংবাদমেলত বৰাই এই প্ৰাৰ্থীসকলৰ পৰা ভূঞা বাহিনীয়ে কোটি কোটি টকা লোৱাৰ গুৰুতৰ অভিযোগ তুলি কয়— ‘চতুৰ্থ শ্ৰেণীৰ পদৰ বাবদ ৪-৫ লাখ টকা আৰু ষ্টাফ নাৰ্ছৰ পদৰ বাবে ৬-৭ লাখ টকা উৎকোচ ৰবীন ভূঞা বাহিনীয়ে সংগ্ৰহ কৰিছিল’।
তাৎপৰ্যপূৰ্ণভাবে তেওঁ তথ্য সহকাৰে অভিযোগ কৰে যে উক্ত পদসমূহৰ কাৰণে মুঠ ১,১০,০০০ হাজাৰজন প্ৰাৰ্থীয়ে আবেদন কৰিছিল। ইয়াৰ ভিতৰত ১০ হাজাৰ গৰাকী প্ৰাৰ্থীয়ে অনলাইনযোগে আৰু ১ লাখ প্ৰাৰ্থীয়ে অফলাইনযোগে আবেদন কৰিছিল বুলিও তেওঁ সদৰী কৰে। উক্ত এন জি অ’টোৱে যোৱা ৬ মে’ত এই পদসমূহৰ লিখিত পৰীক্ষা অনুষ্ঠিত কৰিছিল আৰু ১৭ মে’ত পৰীক্ষাৰ ফলাফল ঘোষণা কৰে।
বৰাই কৰা অভিযোগ অনুসৰি অনলাইনযোগে যিসকলে আবেদন কৰিছিল সেইসকলক পৰীক্ষাত বহিবৰ বাবে সুবিধা প্ৰদান কৰাৰ বিপৰীতে ১ লাখ পৰীক্ষাৰ্থীক পৰীক্ষা দিয়াৰ পৰা বঞ্চিত কৰা হৈছে।
উল্লেখযোগ্য যে দুলাল বৰাই অলপতে দিছপুৰ আৰক্ষী থানাত ৰথীন্দ্ৰ ভূঞা বাহিনীৰ বিৰুদ্ধে ভাৰতীয় দণ্ডবিধি ৪২০/৪০৯ ধাৰাৰ অধীনত ১৩০০/১৮ নম্বৰৰ এটা গোচৰ ৰুজু কৰাৰ লগতে স্বাস্থ্য মন্ত্ৰী ড০ হিমন্ত বিশ্ব শৰ্মাকো কথাটো অৱগত কৰে।
তেওঁ লগতে আজিৰ সংবাদ মেলৰ জৰিয়তে চৰকাৰক স্বাস্থ্য বিভাগৰ সঞ্চালক ৰথীন্দ্ৰ ভূঞাক গ্ৰেপ্তাৰ কৰাৰ বাবে দাবী উত্থাপন কৰে।
