প্ৰাক্তন মুখ্য মন্ত্ৰী তৰুণ গগৈয়ে আজি কইনাধৰাৰ তেওঁৰ বাসগৃহত দিয়া সংবাদমেলত শেহতীয়াকৈ চৰ্চালৈ অহা সুকীয়া বৰাক ৰাজ্যৰ প্ৰসংগটো নিজৰ মত বেকত কৰিলে। গগৈয়ে কয় যে তেওঁ বৰাক পৃথক হোৱাটো নিবিচাৰে। বৰং এনেকুৱা দাবীৰ বিৰোধিতা কৰে।
আনহাতে সততে মুখ্য মন্ত্ৰী সৰ্বানন্দ সোণোৱালে বৰাক-ব্ৰহ্মপুত্ৰৰ সমন্বয়ৰ কথা কৈ থকাৰ কথাটো টানি আনি তেওঁ সোণোৱালক কটাক্ষ কৰে। “মুখ্য মন্ত্ৰীয়ে যিমানেই বৰাক-ব্ৰহ্মপুত্ৰৰ সমন্বয়ৰ কথা কৈ আছে, সিমানে তেওঁলোকৰ নেতাই ফাট মেলাই আছে।” এইদৰে কয় গগৈয়ে।
উল্লেখযোগ্য যে যোৱা ১১ জুলাইত সদৌ কাছাৰ-কৰিমগঞ্জ হাইলাকান্দি ছাত্ৰ সন্থা, চমুকৈ অকছাৰ প্ৰাক্তন প্ৰতিষ্ঠাপক সভাপতি তথা বৰ্তমান অঞ্চলটোত বিজেপিৰ এজন প্ৰভাৱশালী নেতা প্ৰদীপ দত্ত ৰয়ে সুকীয়া বৰাক ৰাজ্যৰ পোষকতা কৰি সংবাদমেল দি এক নতুন বিতৰ্কৰ সৃষ্টি কৰিছিল।
গগৈয়ে এই অভিযোগ কৰে যে প্ৰদীপ দত্ত ৰয়ক বিজেপিয়ে উচটাইছে। নাগৰিকত্ব সংশোধনী বিধেয়কৰ বিৰুদ্ধেও এইজন নেতাই বিজেপিৰ নিৰ্দেশত কাম কৰা বুলি কয়। ইয়াৰ উপৰি বৰাকৰ খিলঞ্জীয়াই বিলখনৰ সমৰ্থন নকৰে বুলি দাবী কৰে প্ৰাক্তন মুখ্য মন্ত্ৰী গগৈয়ে।
