ডিব্ৰুগড়-ৰঙিয়া এক্সপ্ৰে’ছ ৰে’লৰ শৌচালয়ত এগৰাকী যুৱতীৰ মৃতদেহ উদ্ধাৰ হোৱাক লৈ শিৱসাগৰৰ শিমলুগুৰি ৰে’ল ষ্টে’শ্যনত আজি ১০ জুলাইত তীব্ৰ চাঞ্চল্যৰ সৃষ্টি হৈছে।
গোলাঘাটৰ ফৰকাটিঙলৈ বুলি শিৱসাগৰ ষ্টে’শ্যনত ৰে’লখনত উঠাৰ ২০ মিনিটৰ ভিতৰত দিন দুপৰতে এনেদৰে এগৰাকী যুৱতীক হত্যা কৰি যোৱাটোৱে ৰে’লৰ সুৰক্ষা বিশেষকৈ নাৰীৰ সুৰক্ষাৰ বিষয়টোক লৈ গুৰুতৰ প্ৰশ্নৰ অৱতাৰণা কৰিছে।
শিমলুগুৰি ৰে’ল ষ্টে’শ্যনত পুৱা ৮.১৫ বজাত আহি পোৱা ৰে’লখনত উদ্ধাৰ হোৱা দেহটো অসম কৃষি বিশ্ববিদ্যালয়ৰ ছাত্ৰী ৰাধা কুমাৰীৰ বুলি চিনাক্ত কৰা হৈছে।
তিনিচুকীয়াৰ পৰা ৰে’লৱে’ সুৰক্ষা বাহিনীৰ এগৰাকী জ্যেষ্ঠ বিষয়াই নৰ্থ ইষ্ট নাও-ক জনোৱা মতে শিৱসাগৰ যুৱতীগৰাকীয়ে গোলাঘাটৰ ফৰকাটিঙলৈ বুলি যাত্ৰা কৰিছিল আৰু মাকে ৰাধাক শিৱসাগৰ ষ্টে’শ্যনত আগবঢ়াই থৈ গৈছিলহি। ‘শিৱসাগৰ ষ্টে’শ্যনত যদি ছোৱালীগৰাকীয়ে পুৱা ৭.৫৫ বজাত ৰে’লখনত উঠিছিল, তেন্তে শিমলুগুৰি ষ্টে’শ্যনত ৮.১৫ বজাত আহি পোৱা ৰে’লখনত মাত্ৰ ২০ মিনিটৰ ভিতৰতে হত্যাকাণ্ডটো সংঘটিত হৈছিল,’ তেওঁ কয়।
ডিঙিত এখন গামোচা মেৰ খাই থকাৰ ফলত যুৱতীগৰাকীক ডিঙি চেপি মৰা বুলি সন্দেহ কৰা হৈছে।
মৰণোত্তৰ প্ৰতিবেদন এতিয়াও পোৱা হোৱা নাই বাবে ঘটনাটোৰ কিদৰে সংঘটিত হৈছে জানিব পৰা হোৱা নাই।
ৰাধা থকা অসম কৃষি বিশ্ববিদ্যালয়ৰ ১২ নং ছাত্ৰী নিৱাসৰ ৱাৰ্দেন পূৰ্ণিমা দাসে সংবাদ মাধ্যমক জনোৱা মতে মৃত ৰাধা পঢ়া-শুনাত ভাল, শান্ত আৰু বুদ্ধিমতী আছিল।
যোৰহাটৰ অসম কৃষি বিশ্ববিদ্যালয়ৰ বিএচচি ২য় ষান্মাষিকৰ ছাত্ৰী ৰাধাই মেট্ৰিকত ৮৭ শতাংশ আৰু উচ্চতৰ মাধ্যমিকত ৮২ শতাংশ নম্বৰ লৈ উত্তীৰ্ণ হৈছিল।
ইফালে ছাত্ৰীগৰাকীৰ হত্যাত শোকাহত অসম কৃষি বিশ্ববিদ্যালয় সমাজে ঘটনাটোৰ ক্ষীপ্ৰ আৰু উচিত তদন্ত দাবী কৰিছে।
