অসমৰ নামৰূপত জন্মগ্ৰহণ কৰা তথা ৫৩ ৰাষ্ট্ৰীয় ৰাইফলছৰ মেজৰ লিটুল গগৈক সেনা অনুসন্ধান অদালতে দোষী সাব্যস্ত কৰাৰ সম্ভৱনা আছে। তেওঁ সেনা বাহিনীৰ নীতি উলংঘা কৰি কাশ্মীৰৰ এগৰাকী স্থানীয় মহিলাৰ সৈতে বন্ধুত্বপূৰ্ণ সম্পৰ্ক গঢ়ি তোলাৰ বাবে তেওঁৰ ওপৰত এই পদক্ষেপ গ্ৰহণ কৰা হ’ব বুলি এটা সূত্ৰৰ প্ৰতিৱেদনত প্ৰকাশ।
সেনা অনুসন্ধান অদালতৰ সূত্ৰই জনাইছে যে মেজৰ লিটুল গগৈ অতি কমেও দুটা দোষত দোষী। এটা হৈছে কৰ্তব্যৰত অৱস্থাত কৰ্তব্য স্থানৰ পৰা দূৰলৈ যোৱা আৰু আনটো হৈছে এগৰাকী স্থানীয় সূত্ৰ মহিলাৰ সৈতে বন্ধুত্ব গঢ়ি তোলা।
‘ইণ্ডিয়ান এক্সপ্ৰেছ’ৰ প্ৰতিৱেদনত প্ৰকাশ পাইছে যে সেনা অনুসন্ধান অদালতে মাৰ্চৰ ২৩ তাৰিখে মেজৰ গগৈক শ্ৰীনগৰৰ এখন হোটেলত প্ৰত্যক্ষ কৰিছিল। হোটেল গ্ৰেণ্ড মমতাৰ কৰ্মচাৰীৰ সৈতে বাক বিতণ্ডাত লিপ্ত হোৱাৰ পাছত তাৰ পাছত তেওঁৰ সংগী মহিলাগৰাকী আৰু ছমিৰ আহমেদ নামৰ এজন সেনাৰ লোকসহ মেজৰ গগৈক শ্ৰীনগৰৰ এখন থানাত জেৰা কৰা হৈছিল।
যোৱা মে’ৰ ৩১ তাৰিখে জম্মু কাশ্মীৰ আৰক্ষীয়ে শ্ৰীনগৰ আদালতক জনাইছিল যে লিটুল গগৈ, হোটেলৰ মালিক অথবা মহিলাগৰাকী কাৰো বিৰুদ্ধেই গোচৰ ৰুজু কৰা হোৱা নাই। ব্ৰিগেডিয়াৰৰ অধীনত গঠিত হোৱা সেনা অনুসন্ধান অদালতে মেজৰ গগৈ, মহিলাগৰাকী আৰু গোচৰটোৰ সৈতে জড়িত সংশ্লিষ্ট সেনা বিষয়াসকলৰ সাক্ষ্য গ্ৰহণ কৰে। সূত্ৰই জনাইছে যে অনুসন্ধানত লাভ কৰা তথ্যসমূহ মেজৰ জেনেৰেলৰ পৰামৰ্শক্ৰমে গ্ৰহণ কৰা হৈছে আৰু এতিয়া ১৫ কৰ্পছৰ কামাণ্ডাৰৰ অনুমোদনলৈ অপেক্ষা কৰি থকা হৈছে। অতি শীঘ্ৰেই অনুমোদন লাভ কৰা হ’ব বুলি সূত্ৰটোৱে জনাইছে।
১৫ কৰ্পছৰ কামাণ্ডাৰৰ অনুমোদন লাভ কৰাৰ পাছত সেনা কৰ্তৃপক্ষই সেনা আইনৰ অধীনত মেজৰগৰাকীৰ বিৰুদ্ধে গোচৰ ৰুজু কৰিব। তাৰ পাছত তেওঁলোকে হয়োত মেজৰ গগৈক শাস্তি দিয়া অথবা তেওঁৰ বিচাৰ চলোৱাৰ বাবে সেনা আদালত আহ্বান কৰিব পাৰিব।
সূত্ৰই জনাইছে যে আনুষ্ঠানিকভাৱে গোচৰ সমাপ্ত হোৱাৰ পূৰ্বে সেনা অনুসন্ধান অদালতৰ এই বিষয়ত কোনো মন্তব্য দিয়াৰ এক্তিয়াৰ নাই। এই সম্পৰ্কে ২৬ মে’ত পাহালগামত জেনেৰেল বিপিন ৰাৱটে কৈছিল যে দোষী সাব্যস্ত হ’লে মেজৰ লিটুল গগৈক দৃষ্টান্তমূলক শাস্তি প্ৰদান কৰা হ’ব।
উল্লেখ্য যে শ্ৰীনগৰত যোৱা বছৰ মেজৰ গগৈয়ে উপ নিৰ্বাচনৰ পূৰ্বে শিল দলিওৱা সকলৰ বিৰুদ্ধে এগৰাকী ব্যক্তিক জীপত বান্ধি মানৱ ঢাল হিচাপে ব্যৱহাৰ কৰা কাৰ্যক জেনেৰেল বিপিন ৰাৱটে সমৰ্থন কৰিছিল। এই কামৰ বাবে মেজৰ গগৈক জেনেৰেল ৰাৱটে ‘চীফ অব আৰ্মি ষ্টাফ কমেণ্ডেশ্যন কাৰ্ড’ প্ৰদান কৰিছিল। এই ঘটনাক কেন্দ্ৰ কৰি সমগ্ৰ ভাৰততে তীব্ৰ বিতৰ্কৰ ঢৌ উঠিছিল।
উল্লেখ্য যে ডিব্ৰুগড়ৰ পৰা ৮০ কি: মি: দূৰত্বত অৱস্থিত মেজৰ গগৈৰ গৃহ চহৰ নামৰূপ অতীতত আলফাৰ ডেৰা হিচাপে পৰিগণিত আছিল।
