নগাঁৱৰ ৰহাৰ ৰাষ্টীয় ঘাই পথৰ কাম সম্পূৰ্ণ নোহোৱাকৈ টোলগেট আৰম্ভ কৰিবলৈ চৰকাৰে সিদ্ধান্ত লোৱাৰ সময়তে বিভিন্ন দল-সংগঠনে প্ৰতিবাদ সাব্যস্ত কৰিছে। ইতিমধ্যে ৰহা টোল গেট বৃহস্পতিবাৰৰ পৰা মুকলি কৰা হ’ব বুলি কৰ্তৃপক্ষই ঘোষণা কৰিছে।
১২ জুলাইৰ পৰা টোলগেটখনত কৰ সংগ্ৰহ আৰম্ভ কৰাৰ কথা ঘোষণা কৰাৰ পিছতে জাতীয় দল-সংগঠন জাঙুৰ খাই উঠিছে। টোল গেট মুকলিৰ প্ৰাকমহুৰ্তত বিভিন্ন দল সংগঠনে ৰহাত প্ৰতিবাদ সাব্যস্ত কৰি পৰিবেশ উত্তাল কৰি তুলিছে।
কৃষক মুক্তি সংগ্ৰাম সমিতি, জাতীয়তাবাদী যুৱ ছাত্ৰ পৰিষদকে ধৰি ১২ টাকৈ জাতীয় সংগঠনে ৰহাৰ চাৰিলেনযুক্ত পথৰ ওপৰত আজি তীব্ৰ প্ৰতিবাদ সাব্যস্ত কৰে। সংগঠন কেইটাই টোল গেটৰ সন্মুখত এক গণ প্ৰতিবাদ আৰু ধৰ্ণা কাৰ্যসূচী ৰূপায়ণ কৰি পৰিবেশ উত্তাল কৰি তোলে।
সংগঠনসমূহে চাৰিলেনযুক্ত পথৰ নিৰ্মাণ সম্পূৰ্ণ নোহোৱা পৰ্যন্ত টোল গেটটো মুকলি নকৰিবলৈ দাবী জনাই উক্ত সংগঠনসমূহে প্ৰতিবাদ সাব্যস্ত কৰিছে।
ইপিনে প্ৰশাসনে প্ৰতিবাদস্থলীত পৰিস্থিতি নিয়ন্ত্ৰণৰ বাবে আৰক্ষী, মহিলা আৰক্ষীৰ লগতে অৰ্ধসামৰিক বাহিনীৰ দল মোতায়ন কৰিছে।
উল্লেখযোগ্য যে পূৰ্বেও ৰহাৰ টোল গেট এবাৰ মুকলি কৰা হৈছিল যদিও অখিল গগৈৰ নেতৃত্বত কৃষক মুক্তি সংগ্ৰাম সমিতিৰ লগতে অন্যান্য সংগঠন তথা স্থানীয় ৰাইজে ব্যাপক প্ৰতিবাদ সাব্যস্ত কৰাৰ পিছত টোল গেট বন্ধ কৰি দিয়া হৈছিল।
এতিয়া প্ৰশাসনে বৃহস্পতিবাৰৰ পৰা পুনৰ টোল গেট মুকলি কৰিলে কৰ সংগ্ৰহ প্ৰক্ৰিয়া পুনৰ আৰম্ভ হ’ব আৰু টোল গেটেৰে পাৰ হৈ যোৱা যান-বাহনসমূহে কৰ আদায় দিব লাগিব।
