১৫ ডিচেম্বৰত আলফা (স্বা)ৰ দ্বাৰা অপহৃত অৰ্ণৱ ফুকনৰ অপহৰণ সম্পৰ্কত কিছু নতুন খবৰ আহি পৰিছে। শেহতীয়া খবৰ অনুসৰি যুৱকজনক মুকলি কৰি দিয়াৰ বিনিময়ত অৰ্ণৱৰ পিতৃ দিলীপ ফুকনৰ পৰা আলফা (স্বা)য়ে ২ কোটি টকা দাবী কৰিছে। পৰিয়ালৰ লোকে জানিবলৈ দিয়া অনুসৰি দুৰ্ধৰ্ষ আলফা নেতা নয়ন জ্যোতি মেধিয়ে ফোন যোগে উক্ত ধন দাবী কৰে। উল্লেখযোগ্য যে তিনিচুকীয়া জিলাৰ প্ৰতিষ্ঠিত ব্যৱসায়ী দিলীপ ফুকনৰ পুত্ৰ অৰ্ণৱ ফুকন (২৪) ক যোৱা ১৫ ডিচেম্বৰত অৰুণাচল প্ৰদেশৰ জয়ৰামপুৰ আৰক্ষী চকীৰ অন্তৰ্গত খামডু গাঁৱৰ পৰা অহা পাঁচজন সন্দেহযুক্ত আলফা (স্বা) কেডাৰে অপহৰণ কৰি নিছিল। ইয়াৰ দুদিন পিছৰে পৰা অসম-অৰুণাচল সীমান্তৰ সমগ্ৰ অঞ্চলটোত অসম পুলিচ, জয়ৰামপুৰৰ ১৩নং আসাম ৰাইফলচ আৰু অৰুণাচল পুলিচে ব্যৱসায়ী পুত্ৰজনক বিচাৰি উলিয়াবলৈ যুটীয়া অভিযান চলাই আহিছে যদিও অপহৰণ কাণ্ডত ব্যৱহৃত গাড়ীখনৰ বাহিৰে অৰ্ণৱ ফুকনৰ কোনো শুং-সূত্ৰ উদ্ধাৰ কৰিব পৰা নাই।
আনহাতে অৰ্ণৱ ফুকনৰ ঘৰত সংবাদ সংগ্ৰহ কৰিবলৈ যাওঁতে সংবাদকৰ্মীক অৰ্ণৱৰ মাতৃয়ে দুৰ্ব্যৱহাৰ কৰা বুলি অভিযোগ উঠিছে।
