নাগৰিকত্ব সশোধনী বিধেয়ক ২০১৬ বাতিলৰ দাবীত সদৌ অসম ছাত্ৰ সন্থা ( AASU )কে ধৰি বিভিন্ন জাতীয়-জনগোষ্ঠীয় দল-সংগঠনে ধাৰাবাহিক আন্দোলন কাৰ্যসূচী চলাই নিয়াৰ মাজতে বুধবাৰে আছুৰ উপদেষ্টা ড: সমুজ্জ্বল কুমাৰ ভট্টাচাৰ্য, সভাপতি দীপাংক নাথ আৰু সাধাৰণ সম্পাদক লুৰিণ জ্যোতি গগৈ সমন্বিতে যোৱা এটা প্ৰতিনিধি দলে বিহাৰৰ মুখ্যমন্ত্ৰী তথা বিজেপিৰ সহযোগী দল জনতা দল (ইউনাইটেড)ৰ নেতা নীতিশ কুমাৰক সাক্ষাৎ কৰে। পাটনাৰ বাসগৃহত হোৱা সাক্ষাৎকালত আছুৰ প্ৰতিনিধি দলে বিহাৰৰ মুখ্যমন্ত্ৰীগৰাকীক নাগৰিকত্ব সংশোধনী বিধেয়ক বাতিলৰ বিষয়ত সন্মতি বিচাৰি বিভিন্ন তথ্যপাতিসহ এখন ১৬ দফীয়া স্মাৰক পত্ৰ প্ৰদান কৰে।
বৃহস্পতিবাৰে গুৱাহাটীৰ শ্বহীদ ন্যাসত এক সংবাদ মেল অনুষ্ঠিত কৰি আছুৰ উপদেষ্টা ড: সমুজ্জ্বল কুমাৰ ভট্টাচাৰ্য, সভাপতি দীপাংক নাথ আৰু সাধাৰণ সম্পাদক লুৰিণ জ্যোতি গগৈয়ে এই কথা সদৰি কৰাৰ লগতে আছুৰ দাবীৰ প্ৰতি নীতিশ কুমাৰে পূৰ্ণ সমৰ্থন আগবঢ়োৱা বুলি জানিবলৈ দিয়ে।
সংবাদমেলত প্ৰকাশ কৰা অনুসৰি দুঘন্টাযোৰা সাক্ষাতৰ সময়ছোৱাত আছুৰ প্ৰতিনিধিবৃন্দক নীতিশ কুমাৰে অতি স্পষ্ট আৰু দৃঢ়তাৰে কয়, ‘ভাৰতবৰ্ষ এখন ধৰ্মনিৰপেক্ষ দেশ। ধৰ্মৰ ভিত্তিত নাগৰিকত্ব নিৰূপণ হ’ব নোৱাৰে’। তেওঁ লগতে অবৈধ বিদেশীৰ প্ৰব্ৰজনে অসমৰ খিলঞ্জীয়া মানুহৰ পৰিচয় আৰু অস্তিত্বৰ প্ৰতি ভাবুকিৰ সৃষ্টি কৰা বুলি মত প্ৰকাশ কৰি অসম চুক্তিৰ ক্ষীপ্ৰ ৰূপায়নৰ প্ৰয়োজনীয়তাৰ কথা দোহাৰে বুলিও ছাত্ৰ সন্থাৰ প্ৰতিনিধি দলে জানিবলৈ দিয়ে।
সাক্ষাতকালত ছাত্ৰ সন্থাৰ প্ৰতিনিধি দলটোৱে নাগৰিকত্ব সংশোধনী বিধেয়ক বাতিলৰ বিষয়টোৰ উপৰিও অসম চুক্তিৰ আধাৰত অসমৰ খিলঞ্জীয়া মানুহক সাংবিধানিক ৰক্ষাকৱচ প্ৰদান, ভাৰত-বাংলাদেশ উন্মুক্ত সীমান্ত যুদ্ধকালীনভাৱে চীল কৰা, অবৈধ বাংলাদেশী বহিষ্কাৰৰ বাবে ভাৰত-বাংলাদেশৰ মাজত দ্বিপাক্ষিক চুক্তি সম্পাদন কৰা, অসম চুক্তি নিৰ্দিষ্ট সময়সীমাৰ ভিতৰত কাৰ্যকৰী কৰা বিষয়ত বিহাৰৰ মুখ্যমন্ত্ৰী গৰাকীৰ পৰা সন্মতি আৰু সহযোগীতা বিচৰাত তেওঁ স্পষ্ট আৰু দৃঢ়তাৰে ছাত্ৰ সন্থাৰ দাবীসমুহৰ প্ৰতি পূৰ্ণ সন্মতি আগবঢ়ায় বুলি বৃহস্পতিবাৰৰ সংবাদমেলত আছু নেতৃত্বই জানিবলৈ দিয়ে। লগতে বিহাৰৰ মুখ্যমন্ত্ৰী নীতিশ কুমাৰে নাগৰিকত্ব সংশোধনী বিধেয়ক বাতিল কৰাৰ উপৰিও ছাত্ৰ সন্থাই উত্থাপন কৰা বিষয় সমুহৰ স্থায়ী সমাধানৰ বাবে প্ৰধানমন্ত্ৰী নৰেন্দ্ৰে মোদীলৈ অতি সোনকালেই পত্ৰ প্ৰেৰণ কৰিব বুলিও সংবাদমেলত আছু নেতৃত্বই অৱগত কৰে।
উল্লেখ্য যে, নীতিশ কুমাৰক সাক্ষাতৰ সময়ত জে.ডি.ইউৰ ৰাষ্ট্ৰীয় সাধাৰণ সম্পাদক, সাংসদ তথা যুটীয়া সংসদীয় সমিতিৰ সদস্য হৰিবনচ্ সিং, জে.ডি.ইউৰ ৰাষ্ট্ৰীয় সম্পাদক আফাক আহমেদ খান, জে.ডি.ইউৰ নাগালেণ্ডৰ ৰাজ্যিক সভাপতি এন,এচ.এন লোথা আৰু জে.ডি.ইউৰ বিহাৰ বিধান সভাৰ সদস্য সঞ্জয় গান্ধী উপস্থিত আছিল।
নাগৰিকত্ব সংশোধনী বিধেয়ক বাতিলৰ প্ৰসংগ লৈ ছাত্ৰ সন্থাই অন্ধ্ৰ প্ৰদেশৰ মুখ্যমন্ত্ৰী চন্দ্ৰবাবু নাইডু, পশ্চিমবংগৰ মুখ্যমন্ত্ৰী মমতা বেনাৰ্জী আৰু উৰিষ্যাৰ মুখ্যমন্ত্ৰী নৱীন পাটনায়ককো সাক্ষাৎ কৰিব বুলি সংবাদ মেলত আছু নেতৃত্বই প্ৰকাশ কৰে।
ইতিমধ্যে নাগৰিকত্ব সংশোধনী বিধেয়ক বাতিলৰ বিষয়টো লৈ দেশৰ মুঠ ১১ টা ৰাজনৈতিক দলৰ বহুকেইগৰাকী নেতাৰ সৈতে ছাত্ৰ সন্থাই আলোচনাত মিলিত হৈছে। দল কেইটা ক্ৰমে- উৰিষ্যাৰ বিজু জনতা দল, পশ্চিম বংগৰ তৃণমূল কংগ্ৰেছ, পঞ্জাৱৰ শিৰোমণি আকালি দল, অন্ধ্ৰ প্ৰদেশৰ তেলেগু দেশম পাৰ্টি, তামিলনাডুৰ ডি.এম.কে আৰু এ.আই.এ.ডি.এম.কে, চি.পি.এম, চি.পি.আই, বিপিএফ, কংগ্ৰেছ(আই) আৰু বিজেপি নেতা তথা কেন্দ্ৰীয় গৃহমন্ত্ৰী ৰাজনাথ সিং, গৃহ ৰাজ্যমন্ত্ৰী কিৰেণ ৰিজিজু আৰু সাংসদ ৰমেন ডেকা।
সংবাদমেলত নাগৰিকত্ব সংশোধনী বিধেয়ক বাতিলৰ বাবে ছাত্ৰ সন্থাই কৌশলগতভাৱে আগবাঢ়ি থকা বুলি প্ৰকাশ কৰি আছুৰ উপদেষ্টা ড: সমুজ্জ্বল কুমাৰ ভট্টাচাৰ্যই বিষয়টো ৰাষ্ট্ৰীয় স্তৰত উত্থাপনৰ বাবে অহৰহ আলোচনা চলাই থকা বুলি জানিবলৈ দিয়ে।
