উত্তৰ-পূৰ্বাঞ্চলৰ বাবে অৰ্থনৈতিকভাৱে অতি গুৰুত্বপূৰ্ণ চিটাগং বন্দৰক ৰাজ্যকেইখনৰ বাবে মুকলি কৰি দিবলৈ বাংলাদেশ চৰকাৰক অনুৰোধ জনাইছে ত্ৰিপুৰাৰ মুখ্য মন্ত্ৰী মানিক সৰকাৰে। ‘দুয়োখন দেশৰ মাজৰ এতিয়াও সমাধানৰ পথতে থকা অন্যান্য বিষয়বোৰৰ পৰা পৃথকভাৱে লৈ বাংলাদেশ চৰকাৰে উত্তৰ-পূবৰ ৰাজ্যকেইখনক চিটাগং আন্তঃৰাষ্ট্ৰীয় নৌবন্দৰটো ব্যৱহাৰ কৰিবলৈ অনুমতি দিব লাগে। মালবস্তু, খাদ্যসামগ্ৰী, ইন্ধন আৰু অন্যান্য প্ৰয়োজনীয় দ্ৰব্য ভাৰতৰ উত্তৰ-পূবৰ ৰাজ্যকেইখন পৰা আৰু এইবোৰলৈ অনা-নিয়াৰ বাবে বন্দৰটো ব্যৱহাৰ কৰিবলৈ অনুমতি দিব লাগে।’ এইদৰে কয় মানিক সৰকাৰে। তীস্তাৰ পানী ব্যৱহাৰ সম্পৰ্কীয় অনিৰ্ণীত বিষয়টো উল্লেখ নকৰাকৈ তেওঁ বাংলাদেশ চৰকাৰক কয় যে উত্তৰ-পূৰ্বাঞ্চলৰ সৈতে দুয়োখন দেশৰ আনবোৰ বিষয় একে দৃষ্টিৰে চাব নালাগে। কালি সীমান্তৰ চোটাখোলা গাৱঁত ১৯৭১ চনত বাংলাদেশৰ স্বাধীনতা যুঁজত মৃত্যু বৰণ কৰা ভাৰতৰ সৈনিক সকলৰ স্মৃতিত নিৰ্মাণ কৰি উলিওৱা এক স্মৃতিসৌধ আৰু উদ্যান মুকলি কৰা অনুষ্ঠানত ভাগ লৈ মানিক সৰকাৰে এই কথা কয়। তেওঁ আৰু কয় যে ভাৰতৰ উত্তৰ-পূৰ্বাঞ্চলৰ ৰাজ্যকেইখনৰ উন্নয়নৰ স্বাৰ্থত ভাৰত আৰু বাংলাদেশৰ মাজত ৰেইলপথ, বায়ুপথ, জলপথ আৰু দূৰসংযোগ ব্যৱস্থা অধিক উন্নত কৰা দৰকাৰ আছে।
আনহাতে ১৯৭১ চনৰ যুদ্ধত ত্ৰিপুৰাই বাংলাদেশলৈ আগ বঢ়োৱা সহায়ৰ হাতৰ কথা সুঁৱৰি মুখ্য মন্ত্ৰীজনে কয় যে তেতিয়াৰ ত্ৰিপুৰাৰ মুখ্য মন্ত্ৰী শচীন্দ্ৰলাল সিঙৰ নেতৃত্বাধীন কংগ্ৰেছ চৰকাৰখনে গুৰুত্বপূৰ্ণ ভূমিকা পালন কৰিছিল। বাংলাদেশৰ পৰা যুদ্ধৰ বিভীষিকাত পলাই অহা লাখ লাখ লোকক ত্ৰিপুৰাত আশ্ৰয় আৰু খাদ্য দিয়া হৈছিল। তেওঁৰ লগতে ত্ৰিপুৰাৰ স্বাস্থ্য মন্ত্ৰী আৰু পি ডব্লিউ ডি মন্ত্ৰী বাদল চৌধুৰীয়ে উপস্থিতসকলক উদ্দেশ্যি ভাষণত কয় যে ভাৰতে এতিয়া আটাইতকৈ ভাল প্ৰতিৱেশী দেশখনৰ সৈতে অধিক ঘনিষ্ঠতা বিচাৰে। উল্লেখযোগ্য যে ১৯৭১ চনত ত্ৰিপুৰাত জনসংখ্যা আছিল ১৫ লাখ, কিন্তু যুদ্ধৰ সময়ছোৱাত বাংলাদেশৰ পৰা অহা প্ৰায় ১৬ লাখ লোকক ত্ৰিপুৰাই আশ্ৰয় আৰু খাদ্য দিছিল। ভৌগোলিকভাৱেও ত্ৰিপুৰাৰ অৱস্থান বাংলাদেশৰ বাবে গুৰুত্বপূৰ্ণ, কাৰণ ঢাকাৰ পৰা ত্ৰিপুৰা মাত্ৰ ১৩৫ কিলোমিটাৰ দূৰত।
