কলিয়াবৰৰ শিলঘাটত ঐতিহাসিক অশোকষ্টমী মেলা যোৱা ২৪ মাৰ্চৰ পৰা আৰম্ভ হৈছে। এই মেলা অহা ৩০ মাৰ্চলৈকে চলিব।
প্ৰবাদ আছে যে অষ্টমী তিথিৰ দিনা গঙ্গা নদীৰ কিছু জলধাৰ আহি ব্ৰহ্মপুত্ৰ নদীত পৰি ব্ৰহ্মপুত্ৰ নদীখন গঙ্গাৰ দৰেই পবিত্ৰ হৈ পৰে। সেয়েহে, চ’ত মাহৰ অষ্টমী তিথিত বহু লোকে নিজৰ আত্মীয় কুটুম্বৰ মৃত্যুৰ পিছত সাঁচি ৰখা কিছু অংশ অস্থি শ্ৰাদ্ধৰ অন্তত ব্ৰহ্মপুত্ৰৰ বুকুত বিসৰ্জন দিয়ে ।
তদুপৰি, কিছু লোকে এই তিথিত ব্ৰহ্মপুত্ৰৰ বুকুত স্নান কৰি ব্ৰাহ্মণক দক্ষিণা দি লুইতৰ পাৰৰ বালিচৰত বহি চিৰা, মুৰী, দৈ, গুৰ, কল আদিৰে এক খাদ্য সম্ভাৰ প্ৰস্তুত কৰি ভোজন কৰে ।
এইদৰে অষ্টমী তিথিত ব্ৰহ্মপুত্ৰত স্নান কৰি নদীৰ পাৰত ভোজন কৰিলে মানোকামনা পূৰ্ণ হয় বুলি এক পুৰণিকলীয়া বিশ্বাস আজিও প্ৰচলিত হৈ আছে ।
সেয়ে বিগত বৰ্ষৰ দৰে এইবাৰো কলিয়াবৰৰ শিলঘাটত সাত দিনীয়াকৈ ২৪ মাৰ্চৰ পৰা ৩০ মাৰ্চলৈকে অনুষ্ঠিত কৰা হৈছে অশোকষ্টমী মেলাৰ। দেওবাৰে স্নানৰ দিনা ৰাজ্যৰ বিভিন্ন প্ৰান্তৰ লোকে লুইতৰ বুকুত স্নান কৰাৰ লগতে বিভিন্নজনে নিজ নিজ আত্মীয়ৰ অস্থি বিসৰ্জন দিয়াও পৰিলক্ষিত হ’ল ।
মেলাৰ লগত সংগতি ৰাখি বিভিন্ন লোকে বিভিন্ন ধৰণৰ বিপণীৰে গ্ৰাহকৰ চাহিদা পূৰণৰ লক্ষ্যৰে মেলাস্থলীত ভিৰ কৰিছে ।
ঐতিহাসিক মেলাখনত ৰাইজৰো বিপুল উপস্থিতি দেখা গৈছে। ইয়াৰ লগতে শিলঘাটৰ কামাখ্যা মন্দিৰৰ চৌহদত বিভিন্ন দূৰ দূৰণিৰ পৰা ভক্ত প্ৰাণ ৰাইজে মা- কামাখ্যাক পূজা-সেৱা আগবঢ়াই আশিস বিচৰা দেখা গৈছে।
পৰম্পৰাগতভাৱে চলি অহা শিলঘাটৰ এই ঐতিহাসিক অশোকাষ্টমী মেলাৰ আয়োজকসকলে মেলাখন অধিক পৰিকল্পিতভাৱে বৰ্ণাঢ্য ৰূপত আয়োজন কৰি পৰ্যটকক আকৰ্ষণৰ চেষ্টা চলোৱা উচিত বুলি উপস্থিত ৰাইজে মত প্ৰকাশ কৰে।