ডিব্ৰুগড়ৰ পুৰণা ৰে’ল ষ্টেশ্যনৰ হনুমান মন্দিৰত আজি দেওবাৰে বিশ্ব হিন্দু পৰিষদে আয়োজন কৰিছে ৰাম নৱমী অনুষ্ঠানৰ। অযোধ্যাত ৰাম মন্দিৰ নিৰ্মাণ আন্দোলনৰ সমৰ্থনত আৰু মন্দিৰটোৰ নিৰ্মাণ সফলতাৰে সম্পূৰ্ণ হোৱাৰ কামনাৰে সদস্যসকলে পূজা আৰু যজ্ঞ অনুষ্ঠিত কৰে।
আয়োজকসকলে জনোৱা মতে ৰামৰ আদৰ্শ সম্পৰ্কে নতুন প্ৰজন্মক সজাগ কৰি ৰাম মন্দিৰ নিৰ্মাণ বিষয়টোক আগুৱাই লৈ যোৱাৰ বাবে এই ৰাম নৱমী আয়োজন কৰা হৈছে।
সংগঠনটোৰ এজন নেতাই জনাই, ‘অযোধ্যাত ৰাম মন্দিৰ নিৰ্মাণৰ বাবে আমি পূজা আৰু যজ্ঞ আয়োজন কৰিছো। অযোধ্যাত ৰাম মন্দিৰ সাজিবৰ বাবে যোৱা বহু বছৰ ধৰি আমি যুঁজ কৰি আহিছো কিন্তু এইবাৰ মন্দিৰ সজা হ’ব বুলি আমি আশাবাদী।’
যজ্ঞত ভাগ ল’বলৈ মন্দিৰ প্ৰাংগণত যথেষ্ঠসংখ্যক লোক উপস্থিত হয়।
সংগঠনটোৰ প্ৰে’ছ বাৰ্তাত কোৱা হৈছে, ‘এই বছৰৰ পৰা আমি ৰাম নৱমী উদযাপন আৰম্ভ কৰিছো। প্ৰতি বছৰে বিপুলভাৱে ৰাম নৱমী আয়োজন কৰিব পাৰিম বুলি আমি আশাবাদী।’