ৰাজস্থান উচ্চ ন্যায়ালয়ৰ বিচাৰকৰ দায়িত্বত থকা অজয় ৰস্তোগীয়ে বৃহস্পতিবাৰে ত্ৰিপুৰা উচ্চ ন্যায়ালয়ৰ মুখ্য ন্যায়াধীশৰূপে কাৰ্যভাৰ গ্ৰহণ কৰিব।এই কথা জানিবলৈ দিয়ে ত্ৰিপুৰা উচ্চ ন্যায়ালয়ৰ এজন বিষয়াই।
উল্লেখ্য যে বৰ্তমান ত্ৰিপুৰা উচ্চ ন্যায়ালয়ৰ দায়িত্বত থকা মুখ্য ন্যায়াধীশ টি ভাইফেইৰ কাৰ্যকাল বুধবাৰে অন্ত পৰিব সেয়ে অজয় ৰস্তোগীক মুখ্য ন্যায়াধীশৰূপে দায়িত্ব প্ৰদান কৰে দেশৰ সৰ্বোচ্চ ন্যায়ালয়ে।
আনহাতে মঙলবাৰে ত্ৰিপুৰা বাৰ এছ’ছিয়েশ্যনে উচ্চ ন্যায়ালয়ৰ ন্যায়াধীশ টি ভাইফেইক এক আড়ম্বৰপূৰ্ণ অনুষ্ঠানৰ মাজেৰে বিদায় সম্ভাষণ জনায়।
উল্লেখ্য যে ত্ৰিপুৰা উচ্চ ন্যায়ালয়ৰ মুখ্য ন্যায়াধীশ টি ভাইফেই মুখ্য ন্যায়াধীশৰূপে কাৰ্যভাৰ গ্ৰহণ কৰাৰ পূৰ্বে ২০১৬ চনৰ ১৬ মেৰ দিনা ত্ৰিপুৰা উচ্চ ন্যায়ালয়ৰ বিচাৰকৰূপে শপত গ্ৰহণ কৰিছিল।
ইয়াৰ উপৰি বিচাৰকৰ দায়িত্বভাৰ গ্ৰহণ কৰা টি ভাইফেই সেই বছৰৰে ২১ ছেপ্তেম্বৰৰ দিনা ত্ৰিপুৰা উচ্চ ন্যায়ালয়ৰ পূৰ্ণকালীন মুখ্য ন্যায়াধীশৰূপে শপত গ্ৰহণ কৰিছিল।
ইফালে নতুন মুখ্য ন্যায়াধীশ নিযুক্তি সম্পৰ্কত ৰাজ্য চৰকাৰে প্ৰেছ বিজ্ঞপ্তিৰ জৰিয়তে জানিবলৈ দিয়ে যে ১ মাৰ্চ অৰ্থাৎ বৃহস্পতিবাৰে আগৰতলাস্থিত ৰাজ ভৱনৰ দৰবাৰ হলত শপত গ্ৰহণ সমাৰোহৰ আয়োজন কৰিছে।
নতুনকৈ নিযুক্তি দিয়া মুখ্য ন্যায়াধীশ অজয় ৰস্তোগীক ৰাজ্যখনৰ ৰাজ্যপাল তথাগত ৰয়ে শপত বাক্য পাঠ কৰাব বুলি জানিবলৈ দিয়ে।
