আজি মহানগৰীৰ টাজ ভিভান্তা হোটেলত দ্য টেলিগ্ৰাফ বাতৰি কাকতৰ উদ্যোগত ‘অসম শ্ৰেষ্ঠ বঁটা প্ৰদান’ শীৰ্ষক এক সম্বৰ্ধনা অনুষ্ঠানৰ আয়োজন কৰা হয়।
ভাৰতীয় তেল নিগম, অসমৰ কাৰ্যবাহী বিষয়া দীপাংকৰ ৰয়ে উদ্বোধনী ভাষণ প্ৰদান কৰাৰ পিছতে আৰম্ভ হোৱা সম্বৰ্ধনা অনুষ্ঠানটোত অসমৰ বহু গণ্যমান্য ব্যক্তি উপস্থিত থাকে। সুদীৰ্ঘ জীৱন সংগীত, নৃত্য, অভিনয় তথা অন্যান্য কলাৰ সৈতে নিজকে জড়িত ৰাখি অসমীয়া সংস্কৃতিলৈ অৰিহনা যোগোৱা শিল্পী সকলক দ্যা টেলিগ্ৰাফ বাতৰি কাকতে অসম শ্ৰেষ্ঠ বঁটা প্ৰদান কৰে।
চলচ্চিত্ৰ জগতৰ লগত ওতপ্ৰোতভাৱে জড়িত অভিনেতা নিপন গোস্বামীক প্ৰথমে ‘অসম শ্ৰেষ্ঠ বঁটা’ প্ৰদান কৰে। পিয়লি ফুকন চলচ্চিত্ৰত সৰু ল’ৰাৰ চৰিত্ৰ এটাৰে অভিনয় জীৱন আৰম্ভ কৰা নিপন গোস্বামী উৎফুল্লিত হৈ পৰা দেখিবলৈ পোৱা যায়। লগতে তেওঁ টেলিগ্ৰাফ বাতৰি কাকতক কৃতজ্ঞতা জ্ঞাপন কৰে।
ইয়াৰ পিছতে ১৯৬০ চনৰে পৰা ভ্ৰাম্যমান নাট্যজগতৰ লগত ওতপ্ৰোতভাৱে জড়িত কৃষ্ণ ৰয়ক এই বঁটা প্ৰদান কৰা হয়। জানিব পৰা মতে ৩৭ বছৰত ১৪০ খন নাটক পৰিচালনা কৰা কৃষ্ণ ৰয়ে বৰ্তমান ভ্ৰাম্যমান জগতৰ প্ৰযোজক তথা পৰিচালক হিচাপে কৰ্মৰত। সাহিত্যৰ ক্ষেত্ৰত ওৰেতো জীৱন নিজকে জড়িত কৰি ৰখা বিশিষ্টা সাহিত্যিক লক্ষ্যহীৰা দাসকো টেলিগ্ৰাফ বাতৰি কাকত তৰফৰ পৰা অসম শ্ৰেষ্ঠ বঁটাৰে বিভূষিত কৰা হয়। লক্ষ্যহীৰা দাসৰ পিছত গুৱাহাটী বিশ্ব বিদ্যালয়ৰ পৰা প্ৰথম ডক্টৰেট ডিগ্ৰী লাভ কৰিবলৈ সক্ষম হোৱা ড০ কিশোৰী মোহন পাঠক এই বঁটা প্ৰদান কৰা হয়। বিশিষ্টা শিক্ষাবিদ পাঠক প্ৰথমজন উপাচাৰ্যা আছিল তেজপুৰ বিশ্ব বিদ্যালয়ৰ।
ইয়াৰ পিছত বিশিষ্ট সংগীত শিল্পী পুলক বেনাৰ্জীক এই বঁটা প্ৰদান কৰা হয়। সংগীত জগতত তেওঁৰ যি অহোপুৰুষাৰ্থ তাৰ বাবেই এই বঁটা প্ৰদান কৰা হয়।
ইয়াৰ পিছত সংগীত নাটক একাডেমী বঁটা প্ৰাপক যতীন গোস্বামীক সত্ৰীয়া সংস্কৃতিৰ সৈতে ওতঃপ্ৰোতভাৱে জড়িত হৈ থকাৰ বাবে অসম শ্ৰেষ্ঠ বঁটা প্ৰদান কৰা হয়। জানিব পৰা মতে তেওঁ বৰ্তমানলৈকে ১২০ খনৰো অধিক নৃত্যনাটিকা ৰচনা কৰিছে। তেওঁ ৰাষ্ট্ৰপতিৰ পৰা পদ্মশ্ৰী বঁটাও পাবলৈ সক্ষম হৈছিল। ইয়াৰ পিছত বিখ্যাত চিত্ৰকৰ পুলক গগৈক এই বঁটা প্ৰদান কৰা হয়।
মহানগৰীৰ মাতৃ মন্দিৰ আমৰ এটা শিশু সেৱাশ্ৰমৰ স্বত্তাধিকাৰী বি পি শৰতক এই অসম শ্ৰেষ্ঠ বঁটা প্ৰদান কৰা হয়। জৃগল ট্ৰেভেলছ অব ইণ্ডিয়াৰ সৈতে জড়িত আশিস ফুকন আৰু জাহ্নৱী ফুকনক পৰ্যটন ক্ষেত্ৰলৈ যুগুটোৱা অৰিহণাৰ বাবে এই বঁটা প্ৰদান কৰা হয়। পৰম্পৰাগত সাজপাৰ ডিজাইন কৰা শুৱালকুচিৰ ডিজাইনাৰ পায়েল চৰ্দাৰক এই বঁটা প্ৰদান কৰা হয়। এই বঁটা বিতৰণী সবাত কেশৱ মহন্ত, পৰিমল শুক্লবৈদ্য আৰু জয়ন্ত মল্ল বৰুৱাও উপস্থিত থাকে।
