৯০ ৰ দশকৰ জনপ্ৰিয় অসমীয়া চলচ্চিত্ৰ ‘বোৱাৰী’ৰ প্ৰযোজক তপোব্ৰত বৰুৱাৰ আজি কাহিলি পুৱাতে দিল্লীৰ মুলচান্দ হস্পিটেলত মৃত্যু হয়। তেওঁ অসমীয়া চলচ্চিত্ৰ জগতৰ যশস্বী অভিনেত্ৰী মৃদুলা বৰুৱাৰ স্বামী আছিল। তেওঁ প্ৰযোজনা কৰা আৰু বিজু ফুকন আৰু মৃদুলা বৰুৱাই মুখ্য চৰিত্ৰত অভিনয় কৰা বোৱাৰী ছবিখন ১৯৮২ চনৰ ১৫ জানুৱাৰীত মুক্তি লাভ কৰিছিল।
মৃত্যুৰ সময়ত তেওঁৰ বয়স আছিল ৭৬ বছৰ। তেওঁ দিল্লীৰ চিকিৎসালয়খনত ভালেমান দিনৰ পৰা চিকিৎসাধীন হৈ আছিল।
জনপ্ৰিয় ছবি বোৱাৰীৰ প্ৰযোজক হিচাপে সকলোৰে মাজত পৰিচিত বৰুৱাৰ মৃত্যুত গভীৰ শোক প্ৰকাশ কৰিছে অসমীয়া চলচ্চিত্ৰ জগতৰ সৈতি জড়িত শিল্পী তথা বিভিন্ন ব্যক্তিসকলে।
অসমীয়া চলচ্চিত্ৰ তথা অসমীয়া ধাৰাবাহিকৰ পৰিচালক, প্ৰযোজক প্ৰমোদ দাসে শোক প্ৰকাশ কৰি নৰ্থ-ইষ্ট নাওক কয়, ‘পুৱাই সংবাদ মাধ্যমত তেখেতৰ মৃত্যুৰ খবৰটো পাই অতি দুখ পাইছো। তেখেত এগৰাকী গুণী ব্যক্তি আছিল। তেখেতক মই চলচ্চিত্ৰ পৰিচালনা কৰোঁতে মৃদুলা বৰুৱাৰ সৈতে বহু বাৰ লগ পাইছিলোঁ। লগতে সভা অথবা অন্য অনুষ্ঠানতো লগ পোৱাৰ সৌভাগ্য ঘটিছিল।
তেখেতৰ ছবিয়ে এসময়ত মাইলৰ খুঁটি প্ৰতিষ্ঠা কৰি থৈ গৈছিল।’
তদুপৰি তেওঁ দুখ প্ৰকাশ কৰি কয়, ‘বোৱাৰী চলচ্চিত্ৰখনে অসমৰ গাঁৱে-ভূঞে আলোড়নৰ সৃষ্টি কৰিছিল। তেনেকুৱা ৰসাল ছবি বৰ্তমান সময়ত পোৱা নাযায়। তেওঁৰ নিৰ্বাচন প্ৰক্ৰিয়া সুন্দৰ হোৱাৰ লগতে প্ৰযোজনা কৰি ৰাইজৰ সন্মুখত সুন্দৰভাৱে উপস্থাপন কৰিব পাৰিছিল। তেখেতৰ মৃত্যুত চলচ্চিত্ৰ জগতখনে এগৰাকী ভাল প্ৰযোজক হেৰুৱাবলগীয়া হ’ল। তেওঁৰ মৃত্যুত মই গভীৰ শোক প্ৰকাশ কৰিছো।’
আনহাতে চলচ্চিত্ৰ পৰিচালক তথা অভিনেতা দীপক কুমাৰ ৰয়ে নৰ্থ-ইষ্ট নাওক কয়, ‘চলচ্চিত্ৰ প্ৰযোজক তপোব্ৰত বৰুৱা ছাৰৰ মৃত্যু অসমীয়া চলচ্চিত্ৰজগতৰ বাবে এক বৃহৎ ক্ষতি বুলি মই ভাবো। তেখেতক আমি মৰমতে ভেকু-দা বুলি মাতিছিলো। তেখেত এগৰাকী অভিজাত্যপূৰ্ণ প্ৰকৃত সাধাৰণ ব্যক্তি আছিল। তেখেতৰ সান্নিধ্য পোৱাৰ মোৰ সৌভাগ্য ঘটিছিল। তেওঁ পূৰ্বতে এগৰাকী চাহ খেতিয়কো আছিল। নৰ্থ-ইষ্ট নাওৰ জৰিয়তে তেখেতৰ মৃত্যুত পৰিয়ালৰ লোকসকল বিশেষকৈ মৃদুলা বাইদেউলৈ সমবেদনা জ্ঞাপন কৰিছো। লগতে তেওঁৰ বিদেহ আত্মাৰ চিৰশান্তি কামনা কৰিছো।’
ইয়াৰোপৰি অভিনেতা তথা চলচ্চিত্ৰ পৰিচালক মহেন্দ্ৰ দাসে নৰ্থ-ইষ্ট নাওক কয়- ‘’আজি পুৱাই এই খবৰটো শুনি আমি বহু দুখ পাইছো। যেতিয়া আমি চলচ্চিত্ৰ জগতত প্ৰথম খোজ দিছিলোঁ তেতিয়া তপোব্ৰত বৰুৱা ছাৰে অভিনয় ক্ষেত্ৰৰ পৰা অৱসৰ লৈছিল। তথাপি চলচ্চিত্ৰ জগতৰ প্ৰতি তেখেতৰ যি অৱদান সেয়া চিৰস্মৰণীয় হৈৰ’ব। তেখেতৰ মৃত্যুত আমি গভীৰ শোক প্ৰকাশ কৰিছো। তেওঁৰ বিয়োগত চলচ্চিত্ৰ ক্ষেত্ৰখনৰ পৰা যেন এটা নক্ষত্ৰ খহিপৰিছে তেনে অনুভৱ হৈছে।’
জানিব পৰা মতে এই প্ৰযোজকগৰাকীৰ মৃত্যুৰ সময়ত তেওঁৰ পত্নী মৃদুলা বৰা তেওঁৰ সৈতে একেলগে আছিল। বাতৰি সংগ্ৰহ কৰা সময়লৈকে তেওঁৰ মৃতদেহটো দিল্লীৰ পৰা অনা হোৱা নাছিল।
