আজি লতাশিল আৰক্ষীয়ে হোজাই সমষ্টিৰ ভাৰতীয় জনতা দলৰ বিধায়ক শিলাদিত্য দেবৰ বিৰুদ্ধে এটা গোচৰ ৰুজু কৰিছে। অন আৰ চিৰ খচৰাৰ বিষয়ত উচটনিমূলক মন্তব্য দিয়াৰ অভিযোগৰ বিপৰীতে এই গোচৰ ৰুজু কৰা হৈছে বুলি আৰক্ষীৰ সূত্ৰই জনায়। আৰক্ষীয়ে জনোৱা মতে বিধায়কজনৰ বিৰুদ্ধে গোচৰ দিয়ে গৰীয়া-মৰীয়া দেশী যুৱ পৰিষদ আৰু কৃষক শ্ৰমিক কল্যাণ পৰিষদে গোচৰ দিছে। বিধায়কজনৰ বিৰুদ্ধে ভাৰতীয় দণ্ডবিধিৰ 295-A অনুচ্ছেদৰ অধীনত (ধৰ্মীয় উত্তেজনা বিয়পোৱাৰ বাবে উদ্দেশ্য প্ৰণোদিত আৰু বিদ্বেষমূলক আচৰণ) no-01/2018 নম্বৰৰ গোচৰ ৰুজু কৰা হয়।
উল্লেখযোগ্য যে যোৱা সোমবাৰে বিধায়ক শিলাদিত্য দেবে কৈছিল যে এন আৰ চিত সন্দেহযুক্ত বাংলাদেশীৰ নাম অন্তৰ্ভুক্ত হৈছে।
কৃষক মুক্তি সংগ্ৰাম সমিতিয়ে বিধায়কজনক তাৎক্ষণিকভাৱে গ্ৰেপ্তাৰ কৰিবলৈ দাবী জনাইছে।
‘এনেকুৱা আপত্তিকৰ মন্তব্য কৰা বাবে তেওঁক অতি শীঘ্ৰে গ্ৰেপ্তাৰ কৰিব লাগে। তেওঁৰ মন্তব্য উচ্চতম ন্যায়ালয়ৰ এন আৰ চি সম্পৰ্কীয় নিৰ্দেশনাৰ পৰিপন্থী।’ এইদৰে কয় কৃষক মুক্তিৰ উপদেষ্টা অখিল গগৈয়ে।
একেদৰে গৰীয়া-মৰীয়া দেশী যুৱ ছাত্ৰ পৰিষদে তেওঁলোকৰ এজাহাৰত কয় যে উচ্চতম ন্যায়ালয়ৰ তত্ত্বাৱধানত শান্তিপূৰ্ণ আৰু শৃংখলাবদ্ধভাৱে চলি থকা এন আৰ চিৰ উন্নীতকৰণ প্ৰক্ৰিয়াটোৰ ওপৰত আপত্তিজনক আৰু সাম্প্ৰদায়িক মন্তব্য কৰিছে।
আনহাতে বিৰোধী দল এ আই য়ু ডি এফেও বিজেপিৰ বিধায়কজনৰ বিৰুদ্ধে ব্যৱস্থা গ্ৰহণৰ দাবী তুলিছে।
উল্লেখযোগ্য যে যোৱা বছৰৰ নৱেম্বৰ মাহতো বিধায়ক শিলাদিত্য দেবে আপত্তিজনক তথা সাম্প্ৰদায়িক মন্তব্য কৰাৰ বাবে কৰিমগঞ্জ মুখ্য ন্যায়িক দণ্ডাধীশৰ আদালতত এজন লোকে তেওঁৰ বিৰুদ্ধো গোচৰ দিছিল।
